Skip to main content

Aaqqissuisuuneq innersuussivoq: Qitittut aliasunnartunik appisimaarfissaanngillat

Nipilersoqatigiit Asuki nutaamik saqqummersitsinissamut piareersarput. Qanittumi Nuummi tusarnaartitsineranni malunnarpoq ukiut qulikkaat sisamat sinnerlugit appisimaartareerlutik suli nuannarineqarluartut

- Ilimaginngilara erinarsuutit takkuteriasaaginnartartut. Qiorneeqqanik qarasaq toqqortaqartarpoq kingorna ilivitsutut erinarsuutinngortartunik.

Oqaatsinik taakkuninnga anitsisoq tassaavoq 64-nik ukiulik Søren Lange Qasigiannguaneersoq, ukiut qulikkaat sisamat sinnerlugit nipilersoqatigiinni Asukikkunni erinarsortuullunilu erinarsuusiortuusoq. Ukiorpassuit ingerlaneranni suliarpassuaqarpoq Asukikkullu peqatigalugit siullerpaamik 1985-mi saqqummersitsisarfiugaluartoq Qilaat Music aqqutigalugu saqqummersitseqataalluni.

Nipilersugaasa ilisarnaatigaat erinnat qiimasut nuannaarpaluttunik taallallit, taamalu asanninneq ajornartorsiutillu allat taallat imarisaannut ungasingaatsiartarlutik. 

- Taalliakka siulliit 18-19-nik ukioqarnerma nalaani suliakka misigissutsinut tunngasuupput. Taava isumaqatigiippugut qitittuni nipilersortartuulluta. Inuit qitsittarput nuannaariarlutik. Taamaattumik isumaqarpugut aliasuppaluttunik taallalinnik appisimaaraluarutta inuit taqitsinnaartussaallugit. Taamaattumik taallaativut taamaattuuppugut, Søren Lange oqaluttuarpoq, 1973-illu missaani siullerpaamik taalliorsimanerarpoq.

Ikinngutini peqatigalugit taamanikkut nipilersortartut allat assigalugit allat sanaavi tuluttut taallallit atortarsimagaluarpaat.

- Aamma taamanikkut akuttoqatigiissaarisarnerput pitsaanerpaajugunanngilaq, oqaatsini ilavai.
Inuunermi annersaa Qasigiannguani najugaqarpoq. Meeqqat atuarfianniit soraarummeertussaalluni Nuummi atuarnera eqqaassanngikkaanni Qasigiannguaniiginnarpoq. Aamma allaffissornermi niuernermilu ilinniarnermi nalaani Ikastimi najugaqarsimavoq.

Naalagissanut nipittuullugu

Qatanngutigiinni pingasuusuni angajullersaavoq angajoqqaavi tassaallutik aalisartoq piniartorlu Jonas Lange aamma Augusta Lange, sulisartutut inuussutissarsiortuusoq.
- Taamanikkut meerarpassuit allat assigalugit 1968-mi Danmarkimut ukiiartortinneqarpunga tassanilu atuarlunga. Taamanikkut qallunaatut paasisinnaanngilanga. Qallunaatut atuarsinnaagaluarpunga taakkuli imarisaat paasisinnaanagit. Ukiininnimi qallunaatut ilikkatsiarpunga, Søren Lange oqaluttuarpoq, ilanngullugulu oqaatigaa nukanganermini eqqaamasani ikittuinnaasut.

- Nukanganinniit eqqaamasaqarpianngilanga. Eqqaamasamali ilaat tassaapput taamanikkut raajarniartoqarluarnera. Aasakkut raajarniuterpaaluit Qasigiannguanut tikittarput raajaleriffimmut tulaassiartorlutik. Eqqaamavara sissamiittarluta raajarniutit isiginnaarlugit aammalu ooqanngitsunik raajatortarluta, Søren Lange oqaluttuarpoq.

Eqqaamasaasa ilagaat raajarniat qaleraleeqqanik pisarisuugaqartartut qimmiutillit iluaqutigilluartagaannik. Qimmiutillit siumut raajarnianut isumaqatigiissuteqareertarput puussiarsuarnut qimmit nerisassaannik pissarsinissamut.

Søren Lange isumaqarpoq erinnat qiorneeqqatut ittut qaratsami toqqortat einannguukkiartortartut
Leiff Josefsen

Søren Langep nipilersortartunngorumaarnissamik eqqarsaateqalernera siusissukkut takkuppoq.

- 1967-ip nalaaniunnguatsiarpoq anaanannut oqarnikuuvunga nipilersortartunngorusullunga tusaamasaq, qungujulluni oqarpoq.

Eqqaaneqareersutut allat sanaavinik atuisarlutikk aallartipput aammalu akuttoqatigiissaarisarnerat pitsaanerpaajunani.

- Eqqaamavara sapaammi ullaap tungaani Qasigiannguit katersortarfitoqaanukarluta oqaluffiup eqqaaniittumut. Naalagissat soraarmata nipittuullugu nipilersorpugut. Kingorna paasisinnaavarput iliuuserisarput ippinnartoqartoq taamaasioqqinngilagullu, Søren Lange oqaluttuarpoq.
Meeqqat atuarfianniit soraarummeerami erngerluni ilinniakkamik aallartitsinngilaq, Nuummilu soraarummeereerluni Qasigiannguanut angerlarpoq.

- Anaanannit aataga Julius Olsvig pisiniarfiuteqarpoq tassanilu siusissukkut ikiuunniartalerpunga. Aamma nioqqutissanik akilersuinermut ilinniartinneqarpunga ikiortitullu assigiinngitsutigut sulisalerlunga, Søren Lange oqaluttuarpoq, kingornalu GTO-mi telefonilerisutut sulilerpoq.

- Innaallagisserisutut ilinniarusunnikuugaluarpunga. Eqqarsarpungali tamanna kingusinnerusukkut naammassiniarneqarsinnaasoq taamalu 1978-mi Ikast Handelskolemi tunngaviusumik ilinniarneq aallartillugu kingornalu Qasigiannguani kommunep allaffiani sulilerlunga. Aamma KNI-mi Tele Postimilu sulinikuuvunga kingornali kommunemi sulileqqillunga. Maanna Kommune Qeqertaliup immikkoortoqarfiani qullersaavunga. Atorfik taanna illoqarfimmi pisortatut taaguuteqaraluartoq uanga tamanna tusarnerivallaanngilara, Søren Lange oqaluttuarpoq.

Ukiorpassuarni Daniel Petersen qanimut suleqatigisarpaa aammalu Asukikkunni marluullutik erinarsortuusarlutik.

- 1983-84-mi erinarsuuterpaaluit sanavakka tamatumalu kinguneranik 1984-mik kassette siulleq saqqummersipparput, Søren Lange oqaluttuarpoq.

Qaffattoqassanngilaq

Qilaat Music aqqutigalugu kassettet pingasut tulleriisiinnarlugit saqqummersippaat. Saqqummersitaalli siulliit marluk nungunnermik kingorna pissarsiarineqarsinnaajunnaarnikuupput. Piffissap ilaa nipilersoqatigiit unikaallassimaartareerlutik 2001-mi immiusseqqipput – tamatumuunma Atlantic Musicimi. Saqqummersitaat ’Aqagumitaava’ tupinnaannartumik nuannarisaavoq piffissap sivisunngitsup ingerlanerinnaani 5.000-nngorluni tunisaalluni, tamannalu kalaallit saqqummersitsisarneranni qaqutigoortuuvoq.

- Tamanna assut tupaallaatigaarput. Taamaasimmat oqaloqatigiinnitsinni isumaqatigiippugut: Arlaannaalluunniit qaffattutut pissusilersussanngilaq. Taamaattumik allanut tusarnaartitsiartorsimatilluta meeqqanut nipilersortarpugut immikkut akissarsissutiginngikkaluarlugu. Nipilersoqatigiit aamma ingerlalluarpugut nipilersoriarsimatillutalu nuannisartaqaagut, Søren Lange oqaluttuarpoq.

Nipilersoqatigiit inuttaat allannguuteqarnikuupput. Søren Langep erneri Malik aamma Kuluk Lange nipilersoqatigiinni peqataalerput Hans Grønvold aamma Peter Rosbach peqatigalugit. Taakkuullutik katersuuteqqipput martsip aallaqqaataani Nuummi tusarnaartitsigamik, ukiunik 40-nngortorsiortut Qarsoq tusarnaartitseqatigalugit.

- Illoqarfinnut assigiinngitsunut avissaarsimagatta qaqutiguinnaq nipilersoqatigiittarpugut. Atortakkavulli tamatta immiussaatigigatsigit ataatsimuunngikkaluarluta tusarnaartitsissamaaleraangatta sungiusalaartuartarpugut. Ukiorpassuarni nipilersortareeraluarlunga appilernermi suli pissangaammilaartarpunga. Soorunami piareersarluarsimatilluni ajornannginnerusarpoq, Søren Lange oqarpoq.

Ukiormanna 65-nik ukioqalertussaavoq, taamaattoq nalunaaquttap akunneri arlallit tusarnaartitsinermi suli erinarsortarpoq.

- Qujangeqisatsinnik qulinik ernutaqarpugut. Nuannertaqaaq meeqqat erinarsuataaqatigalugit. Ilaatigut raajalerisut erinarsuutitoqaannik appisimaarfigerujoortarpakka, tamakkulu tamarmik pissutaaqataapput nipilersortuarnissamut piumassuseqarnermut, Søren Lange oqarpoq.

Taallat erinnallu Asukikkut atortagaasa ilaat allat sanaarivaat. Erinarsuut ’Kiatoq ikaarutitsiarlinga’ tusarnaartitsinermi aallarniutitut appittagaat assersuutissaavoq.

- Villads Villadseniugaluaq oqaloqatigerujoortarnikooqaara. Taamaalluni skrivemaskiinamik allatamik taallamik tunivaanga oqaasertalerlugulu: Inuusuppaluttumik taalliarereerpara illit inuusuppaluttumik erinnerniariuk, Søren Lange erinarsuutip ilisimaneqarluartup pinngornera pillugu oqarpoq.

- Taamaallunga angerlarsimaffitsinni erinaq pattagissamik aallarnisarujoorpara. Isumaqarlunga nuliara nalaasaarfimmi sinittoq, oqariasaarporli: Sunaana? Appeqqilaaruk, oqaluttuarpoq erinarsuutip ’Ila qiimmallak’ tusarnaartitsinerni qiimmatsitsilluartartoq pillugu, illoqarfiillu Ittoqqortoormiit aamma Paamiut kisiisa minillugit illoqarfiit tusarnaartitsiffigisareerpaat.

Maanna saqqummersitseqqinnissaminnut piareersarput taaguuteqartippaallu ’Nutaat pisoqqat’. Tassani erinnat pisoqqat aammalu nutaat suli saqqummersinneqarnikuunngitsut saqqummersinniarpaat.

- Eqqaaneqareersutut saqqummersitavut siulliit marluk pissarsiarineqarsinnaajunnaarnikuupput. Taamaattumik saqqummerseriikkat ilaat immiuteqqinniarlugit aalajangernikuuvugut, Søren Lange oqarpoq, oqaatigisinnaanngilaali qaqugorpiaq saqqummersikkumaarnerlugu.
Maanna nipilersoqatigiit illoqarfigisaminnut avissaarsimalerput Qasigiannguani, Ilulissani Nuummilu najugaqaramik.

- Qarasaasiami programmi Logic atorlugu saqqummersitassarput suliarerujoorsinnaavarput illoqarfeqatigiinngikkaluarluta, Søren Lange naggasiivoq.

Aviisi AG uani pisiariuk:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER