Aaqqissuisuuneq innersuussivoq: Polar Seafoodip uulia qaqinniarsinnaanngilaa
Ukioq ataasinngulerpoq kilisaat Polar Aassik Qasigiannguit avataanni ikuallammat kivillunilu, tankimini uuliamik 52.000 liiterimik orsussamaateqarluni. Avatangiisinut Naalakkersuisoqarfiup isummani mumisippaa. Naalakkersuisoqarfiup nassuerutigaa umiarsuaq puttallartinneqarsinnaanngitsoq uulialu qaqinneqarsinnaanngitsoq.
Kilisaat Qeqertarsuup Tunuani kivinikoq suli immap naqqaniippoq. Tassaniiginnassaarlu umiarsuaq ikuallannermi kingorna kivisoq uuliamik 52.000 liiterimik useqaraluartoq. Tassami Avatangiisinut Naalakkersuisoqarfiup Polar Seafood piumaffigiunnaarallarpaa uulia qaqissagaa, avatangiisinut oqartussaasut suli isumaqaraluartut uulia aalisagaqarfimmi pingaarutilimmi imaani avatangiisinut ulorianartorsiortitsisoq.
Kilisaatip kivinerata kingorna Avatangiisinut Naalakkersuisoqarfiup Polar Seafood ersarisssorujussuarmik naalakkeraluarpaa. Kingusinnerpaamik juunip aallaqqaataani kilisaat puttallartinneqarsimassaaq uulialu qaqinneqarsimassalluni.,
Suliap suliarineqarnera taamalu sivikitsigisumik piffissalerneqarneq pillugit Polar Seafood Avatangiisinut Maalaaruteqartarfimmut maalaaruteqarmat killissaliussaq siorna oktobarip 31-iannut sivitsorneqarpoq.
Oktobarilli 20-ianni Polar Seafoodimut allakkatigut naalakkersuisoqarfimmi pisortaq Mette Skarregaard Pedersen nalunaarpoq piumasaqaat tamanna taamaatiinnarneqartoq. Massakkuugallartukkut.
Allakkatigut Skarregaard Pedersen allakkaluarpoq ”uuliap unioqqutitsilluni aniasoornissaanut suli ulorianartoqartoq taamaasillunilu imaani avatangiisinut inatsit naapertorlugu mingutsitsisinnaalluni”.
Aamma DCE-p, Nationalt Center for Miljø og Energi, siusinnerusukkut nalunaarusiaani alllassimavoq kilisaammit uulliamit aalisakkat aalisakkallu piaraat ajoquserneqarsinnaasut. Avatangiisinik ulorianartorsiortitsivoq, uulia kigaatsumik aniagaluarpat imaluunniit tassanngaannarluni anialeraluarpat, DCE inerniliivoq.
Uuliap qaqinnissaa ajornarluinnarpoq
Avatangiisinut oqartussaasut siusinnerusukkut Polar Seafoodimut sakkortuumik peqqusisimagaluarlutik allakkatigut sakkortuumik tunuarterput.
”SA-mit nalunaarusiaq (Survey Association, selskabi Polar Seafoodip suliassissimasaa, aaqqiss.) avataanillu paasisat nalunaarusiamut tunngaviusut tunuliaqutaralugit, oqartussaasut uppernarsarneqartutut isigaat maanna pissutsit atuuttut pissutigalugit uulia Polar Aassik-mit qaqinniarneqarsinnaanngitsut annertuumik – taamalu akuerineqarsinnaanngitsumik – inuup inuuneranik avatangiisinillu ulorianartorsiortitsisumik”, Mette Skarregaard allappoq.
Allatut oqaatigalugu: Avatangiisinut Naalakkersuisoqarfiup Polar Seafood ilumoornerarpaa.
Aasaq kingulleq naavillugu illua’tungeriit malartaasersimapput. Polar Seafoodip taamatut peqquneqarnermi kingorna Københavnimi eqqartuussissuserinermik selskabit nuimasuut marluk immikkullu ilisimasallit nunanit tamalaaneersut arlallit suliassamut akulerutsippai, tamakkua oqaatsit sakkortuut atorlugit oqarput uulia qaqinneqarsinnaanngitsoq. Tamanna ulorianarpallaaqaaq. Uuliap, umiarsuarmit 300 meterinik ititigisumiittumit qaqinnissaa teknikkikkut ajornarluinnarpoq – inuit inuunerannik ulorianartorsiortitsinani annertoorujussuarnillu aningaasartuutitaqassalluni, teknikerit umiarsuarmut tankeqarfiinullu drone-mik aalartitsereerlutik inerniliipput.
Nipaatsumik saammaateqatigiipput
Polar Seafoodip eqqartuussissuserisuisa suliassap Nunalerinermut, Imminut Pilersornermut Avatangiisinullu Naalakkersuisoqarfimmit suliarineqarsimanera aamma sakkortuumik isornartorsiorpaat.
Avatangiisinut Maalaaruteqarnermut Ataatsimiititaliap Polar Seafood isumaqatigaa oqartussaasunit peqquneqarnerminut atatillugu selskabi naammattumik tusaaniarneqarsimanngitsoq.
Oktobarimi aalajangiinerup kingorna Avatangiisinut Naalakkersuisoqarfik Polar Seafoodilu tutsaqaqqissimanngillat. Suliassami qissaarnartumi aalajangiineq pillugu illua’tungeriit tusagassiorfinnut nalunaarummik assigisaanilluunniit nassiussaqarsimanngillat – illua’tungeriit siusinnerusukkut assigiinngitsorujussuarnik isumaqarsimagaluarlutik.
Mette Skarregaardimit Polar Seafoodimut allakkani umiarsuup puttallartinnissaanut uuliallu qaqinnissaanut periarfissat assigiinngitsut taakkartorneqarput, tamarmillu atorsinnaanngitsutut tunuartinneqarput. Akisuvallaarnerat ulorianarpallaarnerallu pissutigalugu.
Selskabip Smit-ip siusinnerusukkut umiarsuit kiveqqasut grab-i atorlugu puttallartittarsimavai. Polar Aassiup immap naqqanit puttallartinneqarnera minnerpaamik 75 millioner koruuninik akeqassaaq. Taamatut puttallartitsiniarnermi uulia aniasuuleratarsinnaavoq.
Umiarsuaq qeqqatigut napisinnaavoq sananeqaataata kanngussaap sanngiillisimanera pissutigalugu. Imaluunniit kivigami arlaatigut ajoqusersimanera pissutigalugu.
Umiarsuaq aamma ”løfteåg”-imik taaneqartumik puttallartinneqarsimmaavoq. Akia: 55 millioner koruunit, momsia ilanngullugu. Taamaasiornikkut aamma uulia aniasuulersinnaavoq.
Periarfissat pingajuat tassaasinnaavoq umiarsuup betonimik qallersornissaa, tamannalu aamma taamatupajaaq akeqassaaq. Kilisaalli immap naqqani morsukkiartormat piffissallu ingerlanerani kinnganernik qallerneqassalluni, periuseq taanna aamma nalorninartoqarpoq.
Uulia nakkutigaat
Ukioq ataasinngulerpoq kilisaat Qasigiannguit avaataanni ikuallalermat tamatumalu kingorna kivilluni. Inuttat annaanneqarput. Inunnik ajoqusertoqanngilaq.
Uuliali imaanut aniavoq. Qanoq annertutiginersoq ilisimaneqanngilaq. Issittumi Sakkutooqarfiup umiarsuup kiviffikuata eqqaa qaammatialunni nakkutigaa. Kiveqqasumit uuliamik kingullermik takusoqarpoq siorna juunimi. Imaassinnaavorlu tankit imaarutereersimasut uulialu aalanngorsimasoq imaluunniit imaani suujunnaarsitaasimasoq.
Avatangiisinut Naalakkersuisoqarfiup aalajangiinerani allassimavoq oqartussaasut umiarsuup kiviffia suli nakkutiginiaraat “pissutsillu malinnaavigeqqissaarlugit”, soorlu allassimasoq.
“Taamaasilluni oqartussaasut mattutinngilaat Polar Seafood Greenland kingorna iliuuseqarfigineqarsinnaasoq, imaani avatangiisinut inatsit naapertorlugu”.
Allatut oqaatigalugu: Oqartussaasut kingusinnerusukkut peqqussuteqarsinnaapput.
Kalistat Lund attuumassuteqarpallaarpoq
Kristian Jeremiassen, IA, Inatsisartunut aamma Qeqqata Kommunalbestyrelsianut ilaasortaq, isumaqarpoq umiarsuaq kiveqqasoq qangarsuarli tassannga peersinneqarsimassagaluartoq. Imaluunniit uulia piuneerullugu.
- Pisimasuni uani qanoq pisoqannginnera akuerineqarsinnaanngilaq. Polar Seafoodip uulia qaqissavaa umiarsuarluunniit puttallartillugu. Selskabi pinngortitamut pisuussutitsinnullu akisussaaffeqarpoq. Saliisariaqarput. Tamaani raajaqarpoq aalisagaqarlunilu, taanna oqarpoq.
Kristian Jeremiassenip, Qasigiannguani najugallip. Múte Bourup Egede paragraf 37 naapertorlugu apeqquteqarfiginiarpaa. Taassuma suliassaq siornali tiguvaa, taamani Kalistat Lund, avatangiisinut naalakkersuisoq, suliassamut attuumassuteqarpallaarluni imminut oqaatigimmat. Taassuma Augusta Salling, Polar Seafoodimik piginnittut ilaasa Jens Sallingip nulia, qatanngutigaa.
Polar Seafood iluarinnippoq
Henrik Lethip, Polar Seafoodip siulersuisuini siulittaasup, Avatangiisinut Naalakkersuisoqarfiup aalajangiinera naammagisimaarpaa.
- Suliassaq allaffissornikkut suliarineqarnerlussimavoq, tamatumanilumi Avatangiisinut Maalaaruteqarnermut Ataatsimiititaliap ilalerpaatigut. Maannali isumaqarpunga naalakkersuisoqarfik silatuumik aaqqiissuteqartoq, Henrik Leth oqarpoq.
Tankimilli uuliamik aniasoqaqqilissagaluarpat?
- Taava qanoq pisoqassanersoq oqaloqatigiissutigissavarput. Pitsaasumik aaqqiissuteqarnissamut peqataarusuppugut. Oqaloqatigiinnissamut ammavugut, naalakkersuisoqarfillu attaveqarfigisimavarput. Taava takussavarput upernaaru annertunerusumik iliuuseqarnissamut pisariaqartitsisoqarnersoq. Ajornarluinnartulli iliuuseqarfigisinnaanngilagut. Pisimasumi matumani sapinngisarput tamaat iliuuseqarniarsimavugut, immikkullu ilisimasallit pitsaanerpaat atorsimallutigit.