Aaqqissuisuuneq innersuussivoq: Pisortaq angalasoq
Sulisitsisut kattuffii peqatigiiffiillu inissisimaffitsik isumaliutigeqqissavaat, taamatut isumaqarpoq GE-p pisortaa Christian Keldsen, taannalu qaammatini kingullerni immikkoortoqarfiit suleqatigisallu tikeraarlugit angalasimavoq.
Kalaallit Nunaanni Sulisitsisut Peqatigiiffiat immikkoortortaqarfinnik tunngaveqarpoq. Tamakkua peqatigiiffiup qimuttorai.
Taamatut isumaqarpoq Christian Keldsen, taannalu siorna ukiakkut Kalaallit Nunaanni Sulisitsisut Peqatigiiffianni pisortatut sulilerpoq. Tamannalu tunuliaqutaralugu qaammatini kingullerni immikkoortortaqarfiit tikeraarlugit nunami angalasimavoq.
- Novembarimi atorfinikkama angalanissamut periarfissaqarsimanngilanga coronamik killilersuinerit pissutigalugit. Taamaattumik aatsaat massakkut immikkoortoqarfiit tikeraarsinnaalersimavakka.
- Immikkoortortaqarfiit 13-it sulinerat pingaaruteqarpoq, taakkunani ilaasortanut naleqartitat pilersinneqartarmata. Immikkoortortarqarfiit Sulisitsisut Peqatigiiffiat saqqumilaarteqataatippaat, paasisitsisuuppullu inuiaqatigiit ineriartornerannut inuussutissarsiortut sooq taama pingaaruteqartigisut.
Attaveqarneq pingaarutilik
- Ingerlatsivinni Kalaallit Nunaanni Sulisitsisut Peqatigiiffiannut ilaasortaasuni sulisut katikkutsigit inunnut 7.000-inut sinniisuuvugut, tamakkualu sullitaraagut. Taamaattumik immikkoortortaqarfinnut attaveqarneq pingaaruteqarpoq.
- Tamatumunnga atatillugu uanga pisortatut Nuummilu allattoqarfik oqaaseqartartuinnaavugut. Uagut pingaaruteqanngilagut – immikkoortortaqarfiilli pingaaruteqarput.
- Angalaninni ilaasortat amerlasuut tunniusimasut, inuiaqatigiit ineriartornerannik soqutiginnittut, naapissimavakka. Inuiaqatigiit ineriartortinniarlugit piumassutsiminnik sulerusupput. Ilaatigut ilinniagaqarfiit qanimut attaveqarfigalugit, taamaasiluni inuusuttut paasiniassammassuk inuussutissarsiorluni sulineq sooq pisariaqarnersoq.
Assigiinngiiaartut
- Immikkoortortaqarfiit tikeraaraangakkit ilaasortat taama assigiinngiiaartiginerat kakkaginartittaqaaara. Aallarnisaasuaqqaniit ingerlatsivinnut angisuunut ingerlalluartunut – ingerlatsiviillu assigiinneqisunik sammisaqarfinneersut soorlu qullimiguulinnik ingerlatsiviit, immiaaraliorfiit, sanasut, sanaartornermik ingerlatsiviit, aammalu aalisarnermik niuernermillu ingerlatsiviit.
- Uannut aamma ersarippoq ingerlatsiviit, kinguaariit nikinnerannik ajornartorsiummi pissanganartumik unammilligassaqartut. Tamanna imatut pisassaaq, ingerlatsiviit ukiorpassuarni siuariartornermik pilersitsisimasut ingerlalluartullu, piginnittup/piginnittut inuunerminni naammassisaminnik tuniniarniagaat, pitsaasumik ingerlaqqittassasut pilersitsisunut, kingoraartaannut minnerunngitsumillu inuiaqatigiinnut iluaqutaasumik.
Immikkoortortaqarfinnut angalasarnerminut atatillugu Christian Keldsenip aamma ingerlatsiviit arlallit pulaartarpai borgmesterinillu ilassinnittarluni.
- Nuannaarutigaara sumiiffimmi politikerit amerlasuut, nuna tamakkerlugu politikerinit takusartakkatsinnit, inuussutissarsiortut atugassarisaannik paasinnilluarnerummata.
Christian Keldsenip aamma suleqatigisartik Dansk Industri tikeraarsimavaa, taannalu Sulisitsisut Peqatigiiffiata suliaata assinginik suliaqarpoq.
- Ingerlatsiviit ilaasortatta ilaat aamma Dansk Industrimi ilaasortaapput. Unammilligassavut assigiissuupput, tassa sulisitsisut kattuffiisut – aamma sulisartut kattuffii – inuiaqatigiinni inissisimaffipput isumaliutigeqqissagatsigu.
Nunarsuarmiunngorsaaneq
- Minnerunngitsumik nunarsuarmiunngorsaaneq eqqarsaatigalugu, nunarsuaq milligaluttuinnarluni. Tassa imaappoq, ingerlatsiviit nunanit allaneersut amerlanerusut Kalaallit Nunaanni takusalerpagut, aammattaarli kalaallit qallunaallu ingerlatsivii nunani allani ingerlatsisalersinnaapput. Tamatumani DI misilittagaqarluarpoq.
- DI-p suleqatiginerani aamma ataatsimeersuarneq Future Greenland ilaavoq, taannalu GE-p ukiut allortarlugit ingerlattarpaa. Ukioq manna taanna taamaatiinnartariaqarsimavarput, aappaaguli ingerlatissavarput, tassani atasinnaassuseq, sammineqartorujussuaq, inuussutissarsiortutullu isummerfigisariaqagarput, sammitissallutigu.
- Aamma pisortat ingerlatsiviinik allamut nuussisarnermi DI-p misilittagai tusassallugit soqutiginarpoq. Kalaallit Nunaannisut qallunaat politikerii illoqarfiit pingaarnersaata inuiaqatigiillu ikinnerusut akornanni oqimaaqatigiinnermik pitsaanerusumik pilersitsiniarsaripput.
- Kiisalu inatsisinik allanngortitsinermut atatillugu tusarniaanermi peqatigiittut qanimut suleqatigiittarpugut. Amerlasuutigut qallunaat inatsisaat kalaallit inatsisaannit siuarsimanerulaartarput – tamatumanilu suleqatigiinnitsigut Kalaallit Nunaanni nakkarfissaasinnaasut ajornerpaat pinngitsoorsinnaavavut.
Christian Keldsen siunissamut isumalluarpoq.
- GE-mi ilaasortat amerliartorput. Minnerunngitsumik immikkoortortaqarfiit tamatumunnga pissutaapput, taamaattumik siunissaq isumalluarnarpoq.