Aaqqissuisuuneq innersuussivoq: Oqaluffik tusarnaartitsisarfittut
Oqaluffiit inersuartaat akuttoqatigiissaaraluni nipilersoriaatsinut tusarnaartitsivittut taallanillu isumaliutigeqqissaarinniffittut tulluartuusut Nunatta erinarsortartorsua Rasmus Lyberth isumaqarpoq. Oqaluffiit ataasiakkaat tamanna aalajangiiffigisassaraat. Nuummi ilagiit sinniisaanni siulittaasoq akuersaarpalaarpoq
Kitaarinut sakkortusaatip pattagissallu innaallagissamoortup nipai Nunatsinni oqaluffinni qaqutigorsuaannaq tusaaneqartarput. Tassanimi nipilersoriaaseq atugaanerusoq tassaavoq pattagiarsuarsorneq erinarsornerlu. Nunatsinni erinniarpassuit kitaarimik ingiorlugit atorneqartartut oqaluffinni appinneqarnissaminnut utaqqiinnartut, Rasmus Lyberth isumaqarpoq.
Maanna ukiut 21-it qaangiussimalerput Rasmus Lyberthip siullerpaamik Christians Kirkenimi Københavnimi tusarnaartitseqqaarneraniit. Tamanna maanna Rasmus Lyberthip ukiup kaajallakkiartornerani suliassaasa aalajangersimasut ilagaat aammalu akuttoqatigiissaaraluni nipilersoriaatsinik Danmarkimi oqaluffinni nipilersortarneq siaruaassimasoq qallunaanit nipilersortartunit arlalinnit tamanna atugaalersimalluni.
- Nunatsinni oqaluffiit nipaarsaarfittut imaluunniit alianartumik nalaataqarnermi amerlanertigut atorneqartarput. Kristumiussutsimmi oqariartuutit aamma nuannersorpassuupput oqaluffinni qiimanerusumik pissusilersornermut tunngavigineqarsinnaalluartunik. Tamanna ilaatigut naammassiniarneqarsinnaavoq nipilersoriaaseq akuttoqatigiissaarinertalik atorlugu, Rasmus Lyberth oqarpoq.
Rasmus Lyberth oqaluffissuarmi Christians Kirkenimi siullerpaamik ukiut 21-it matuma siorna tusarnaartitsivoq tamannalu matunik nutaanik ammaasimavoq.
- Pilersaarusiortartora taamanikkut ilisimatippata pikkunaagusuleqqallunga nutaamillu misileerusullunga. Eqqarsartaasera aamma malillugu nipilersussaaginnaraanni assigiinnarpaa nutarterusunneq pilerinerlu pigiunnaarsimagaanni. Isumaqatigiippugut juullerpaluttumik tusarnaartitsiniarluta. Sunaaffa akisoorujussuusoq. Aningaasatigut akisussaaffik nammanniarlugu akuersivunga qujanartumilli naatsorsuutit nammaqatigeeqqarluinnarput. Sunaaffa Folketingimiit kulturimut aningaasaliisarfimmi atorfilinnik najuuttoqartoq tusarnaartitsinerullu kingorna siunnersuutigineqarpunga qallunaat aningaasanut inatsisaannut ilanngunneqassasunga taamanerniillu taamatut inissisimavunga, Rasmus Lyberth oqarpoq nangillunilu:
- Taamani eqqarsaraluarpunga siullerpaamik kingullerpaamillu oqaluffimmi tusarnaartitsinnguatsiarama serraniarlunga. Aatsaat iluamik tusarnaariat nuannaattaannarput taamanerniillu tassa ukiut tamaasa Christians Kirkenimi tusarnaartitsisalerpunga. Aammattaaq oqaluffinni allani tusarnaartitsinernut qaaqquneqartalerpunga assullu nuannersumik tamakku misigisaqarfigisarlugit, Rasmus Lyberth oqarpoq.
Inuit amerlasoorsuunngikkaluit tusarnaartoralugit tusarnaartitsinerni qallunaat nipilersortartut arlallit oqaluffiit atortalerpaat. Pernille Rosendahl X-Factorimi siornatigut dommerioqataasoq, ilaatigut Christiansborg Slotskirkemi qulliit sakkukilleriarlugit pattagissat innaallagissamoortut ingiortigalugit oqaluffiup ilua nipimik immersorluaraa DR-ip kulturimut aallakaatitassiaani Gejstimi juulli sioqqullugu malinnaaffigineqarpoq.
Nunatsinni biskoppi Sofie Petersen oqaluffinni akuttoqatigiissaarutilinnik nipilersuuserluni tusarnaartitsisarsinnaanernut nangartuinngilaq.
Sumiiffinni assigiinngissutit
- Erseqqissarusuppara oqaluffiit ulluinnarni ingerlanneqarnerannut akisussaasut tassaammata sumiiffinni palasit ilagiillu sinniisaat. Taakku aalajangiisussaapput akuttoqatigiissaarutilinni nipilersuuserluni tusarnaartitsinissat akuersaarneqassanersut, Sofie Petersen oqarpoq.
Nunatsinni oqaluffinni ileqqut assigiinngissinnaapput. Allaammi nalliuttorsuarni tussiutit atorneqartarnerat allanngorarsinnaavoq.
Rasmus Lyberthip erseqqissarpaa oqaluffinni tusarnaartitsinerit upperisamut tunngasuunissaat pinngitsoorneqarsinnaasoq.
- Kalaallit nipilersortatut ukiut ingerlaneranni nuannersorsuarnik suliaqartarput oqaluffinni erinarsussallugit tulluarsinnaasunik taamalu nuannersumik misigisaqarfiusinnaasunik. Oqaluffimmi isersimanermi tusarnaarnermilu aamma eqqarsaatersornarsinnaasarpoq. Allaanermi ajorpoq taallani oqariartuutit ersarinnerulersartut, Rasmus Lyberth isumaqarpoq itisiliillunilu:
- Anders Brøns eqqaaniarlugu Vodskov Kirkemi naalagiarnermi qinnuigineqarpunga »Takuat paninnguaq« aamma »Uummatinni asanninneqarpoq« atussagikka. Oqaluffik nipaarulluinnarpoq allaanngilarmi taallat imarisaat immikkut isumaqalersut. Takorloorsinnaalluarpara kalaallit nipilersortartut allat erinniaat taamatut misigisaqarfiusinnaasut. Maluginiartarpara oqaluffinni tusarnaartitsisarninni tusarnaariat alapernaaserlutik takkuttartut, Nunatsinnilu oqaluffinni allatut tusarnaartitsisoqartalertuuppat tusarnaariat allat aamma takkuttalersinnaapput, Rasmus Lyberth oqarpoq. Ukiut ingerlaneranni kalaallit nipilersortartut saqqummersittagaat qiviaraanni ilorrisimaarutaasinnaasunik peqarpoq. 2018-mi Kodamut nersornaasiinermi aamma malunnarpoq saqqummersitat pisariitsut soqutigineqaleriartortut, Tiu erinarsorneq kitaarilu annermik atorlugit saqqummersitsisartut ukiumut nersornaamik tunineqarmata. Aamma nipilersuinnagassat kitaarimut suliarpassuit saqqummersinneqarnikuupput. Kalaallit nipilersortartut erinarsortartullu ilisinerni atorneqartarput. Nina Kreutzmann Jørgensen attortinnarluartumik erinarsorpoq Anders Brøns juullip ulluata aappaani Nuummi ilisaammat nipilersortartullu allat eqqaaniarnerni aamma appisinneqartarlutik. Nuummi ilagiit sinnisaat maanna oqaluffinni tusarnaartitsisarnerit pillugit alloriaqqinnissamik isumaliuteqarput.
- Ilisimaneqartutut juullilernerani porskilerneranilu oqaluffinni taamaallaat tusarnaartitsisoqartarpoq. Nalliuttorsuit avataasigut tusarnaartitsinerit pisarnissaat aamma soqutigaarput taamatullu aaqqissuussani akuttoqatigiissaarutilinnik nipilersuutit atorneqarsinnaalluarput, Nuummi ilagiit sinniisaanni siulittaasoq Leif Saandvig Immanuelsen oqarpoq.