Aaqqissuisuuneq innersuussivoq: Norwegian nunatsinnut timmisartuussisalissappat Air Greenlandip akitigut unammillerneqarnissaq ilimagisinnaavaa

Nuummi Ilulissanilu nunat tamalaat akornanni mittarfiit ammarsimaleriarpata ilaasutigut tunngavissat naammassappata Norwegian Kalaallit Nunaannut timmisartuussisalernissamik soqutiginnittorujussuuvoq, qularnanngitsumik Københavnimit.

Norwegian aasaru timmisartunik 85-inik ingerlatsissaaq. Tamanna Danmarkimit Norgemillu ingerlaarfinnik nutaanik qulit missaanniittunik ammaanissamut periarfissiisimavoq, ilaatigut Spaniamut, Italiamut, Tuluit Nunaannut Irlandimullu.

Nuummi Ilulissanilu nunat tamalaat akornanni mittarfiit ammarsimaleriarpata Norgemiut timmisartuutileqatigiiffiat Norwegian Danmarkip imaluunniit Norgep Kalaallit Nunaatalu akornanni timmisartuussisalernissamik soqutiginnittorujussuuvoq.

Norwegian ukiut tulliuttut marlussuit ingerlaneranni Kalaallit Nunaannut timmisartuussisalernissamik aalajangiussaqassappat, akikitsunik timmisartuutileqatigiiffik imarpik qulaallugu bilitsit akiini Air Greenlandip unammillernissaanut piareersimavoq.

Norwegianimi iserteraangat timmisartuutileqatigiiffinnullu pioreersunut ornigassani unammillileraangat, timmisartumut ilaasut nalinginnaasumik bilitsit akiinik appasinnerujussuarnik pissarsiassaqalersarpoq. Tamanna Norwegianip isertuutinngilaa.

Aaqqissuisuuneq innersuussivoq:

Allaaserisaq una aviisimit Sermitsiamit tigusaavoq, aaqqissuisuunermit Dorthe Olsenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Pilersaarutit malillugit Nuummi Ilulissanilu mittarfiit nutaat aappaagu ukiup naalernerani atoqqaartinneqassapput. Tamanna imarpik qulaallugu timmisartut Kangerlussuarmi mittarfiup atornissaanut taarsiullugu Kalaallit Nunaanni illoqarfiit pingaarnersaanni Nuummi nunatsinnilu takornariaqarfiit annersaanni Ilulissani missinnaalernissaannut periarfissiissaaq.

- Kalaallit Nunaat soqutigisorujussuuarput. Kalaallit Nunaannut ingerlaarfimmik imaluunniit ingerlaarfinnik aallartitsisinnaalernissamut ingerlatsisinnaalernissamullu ilaasussatigut naammattunik tunngavissaqarnera naammattunillu ilaasussaqarnera paasinarsissagaluarpat soorunami taamaaliorusulluinnassaagut. Ilaasussatigut tunngavissanik suli paasisaqarsimanngilagut, illoqarfiit arlaannut allamulluunniit, Norwegianimi nunani avannarlerni attaveqaqatigiinnermut pisortaq, Andreas Hjørnholm, Sermitsiamut oqarpoq.

Nuummi Ilulissanilu mittarfinnik 2200 meterinik takissusilinnik pilersitsisoqarneratigut timmisartuutileqatigiiffiit allat Danmarkimit Kalaallit Nunaannut timmisartuussinerni Air Greenlandimut unammillersinnaalernissaat ammaanneqarpoq, timmisartorsuit angisuut mittarfinni taakkunani marlunni missinnaammata.

KAIR oqaloqatigaarput

Norwegianimi, nunani avannarlerni timmisartuutileqatigiiffiit siuttuusut ilaanni SAS-imullu sakkortuumik unammillertaasumi, attaveqaqatigiinnermut pisortaq ilassuteqarluni oqarpoq, taamaattumik Norwegianip ilaatigut Kalaallit Airports, KAIR, aamma angalatitsiviit oqaloqatigilerusukkai. Tamanna pissaaq ilaasutigut naammattumik tunngavissaqarnersoq paasiniarlugu.

- Mittarfimmut nutaamut ingerlaarfimmik aallartitsisinnaalersinnata timmisartumut bilitsinik piumasaqarnerup qanoq isikkoqarneranik paasisaqaqqaartussaavugut. Tamatumani ilaatigut pineqartoq tassaavoq sumiiffimmi mittarfinnut allanut angallanneq qanoq ittuunersoq, Andreas Hjørnholm oqarpoq.

Atlantikup Avannaani pinngortitaq kusanartoq kajungilersitsisoq

Norwegian Kalaallit Nunaannut timmisartuussivinnik aallartitsinissamut isumaliutinut atatillugu angalariaatsinik aamma qimerluuiniarpoq.

- Nunani avannarlerni Atlantikullu Avannaani feeriarnissamut soqutiginninnerup annertusiartornera aamma takusimavarput, taamaattumik Spaniamuinnaq inuit angalarusuttanngillat, aammali nunani avannarlerni Atlantikullu Avannaani pinngortitaq kusanartoq misigerusunneqartarluni, oqarpoq.

Skandinaviap Kalaallit Nunaatalu akornanni timmisartuussivimmik pilersitsinissamut ilaasussatigut naammattumik tunngavissaqarnera paasinarsissagaluarpat, taava Københavnimi mittarfimmit, CPH-mit, timmisartuussisalissavisi?

- Københavns Lufthavn tulluarnerpaagunarpoq. Kisianni aamma Oslominngaanneersinnaavoq, Norwegianimi attaveqaqatigiinnermut pisortaq oqarpoq.

2024-25-mi ukiut nikinnerannit imaluunniit 2025-mi aasaaneraniit Kalaallit Nunaannut timmisartuussisalernissarsi ilimanaateqarsinnaava?

- Tamanna takussavarput, Andreas Hjørnholm oqarpoq.

Siuariartupiloortoq

Norwegian nunani avannarlerni nukittuumik inissisimaffeqarpoq, pingaartumik Norgemi, aamma Atlantikup Avannaani.

- Norgep avannaani Svalbardimullu aamma timmisartuussisarpugut. Tamatuma saniatigut Oslop Islandillu akornanni ingerlaarfeqarpugut. Taamaattumik Kalaallit Nunaannut timmisartuussisalernissap apeqqutiginissaa attuumassuteqarluinnarpoq, Andreas Hjørnholm oqarpoq.

Norwegian 2023-mi aasaanerani timmisartunik ataatsimut katillugit 85-inik ingerlatsissaaq. Tamanna Danmarkimit Norgemillu ingerlaarfinnik nutaanik qulit missaanniittunik ammaanissamut periarfissiisimavoq, ilaatigut Spaniamut, Italiamut, Tuluit Nunaannut Irlandimullu.

Københavnimit ornigassat nutaat akornanniipput Italiami Palermo Napolilu, Frankrigimi Bordeaux, Spaniami Madrid Tenerifelu, Tuluit Nunaanni Manchester, Portugalimi Porto, Kroatiami Pula, aamma Litauenimi Vilnius.

Andreas Hjørnholmip Air Greenlandimi bilitsit akii oqaaseqarfigerusunngilai, oqarlunili, timmisartuutileqatigiiffik sumiiffinnut iserteraanga timmisartuutileqatigiiffinnullu pioreersunut unammillileraangat, Norwegian akinik appartitseqataasartoq:

- Sumiiffinnut unammillerterpassuaqarfiunngitsunut ingerlaarfinnik ammaanissamik soqutigisaqarpugut. Tamanna Norwegianimut pilerinarluinnartuuvoq, bilitsit amerlanersaanni akinik appasikannersunik neqerooruteqarsinnaasumut. Unammilleqatigiinneq annertuujutinnagu tamanna ingerlaarfimmik ammaassanersugut nalilersuinermut iluaqutigisarparput. Norwegian atuutilinngikkallarmat Oslomit Bergenimut timmisartumut bilitsip akiata ullumikkut Oslomit New Yorkimut timmisartup bilitsip akiata assigisimavaa, oqarpoq.

Norwegian 2022-mi Københavnip Bornholmimilu mittarfiup akornanni aasakkut ingerlaarfimmik ammaavoq. Tamannalu Norwegianip maannalu timmisartuussisartup DAT-ip akornanni bilitsit akiini unammilleqatigiinnermik pilersitsivoq.

- Tamatuma kinguneranik timmisartuutileqatigiiffik pioreersoq ingerlaarfimmini akinik 30-40 procentinik appaavoq, akigititavut nallersuuffigisinnaaniarlugit, Andreas Hjørnholm oqarpoq.

Norwegian Kalaallit Nunaannut ingerlaarfinnik ammaassagaluarpat taamalu Air Greenlandimut unammillilissagaluarpat bilitsit akii Bornholmimut ingerlaarfimmisut appartigissanersut Norwegianimi attaveqaqatigiinnermut pisortap neriorsuutigisinnaanngilaa.

Powered by Labrador CMS