KL

DK

Aaqqissuisuuneq innersuussivoq: Nivi Olsen - arnaq nukittooq

Nivi Olsen Demokraatini siulittaasuugallartoq Qeqertarsuarmi eqqissisimanareqisamini, nuannarineqarluartumik cafémik ingerlataqarpoq. Illoqarfimmi mikisumi pinngortitarsuarmik kusanarluinnartumik avatangiiseqartumi najugaqarnini eqqissinarisarpaa.

Arne Mølgaard

33-nik ukiulik Nivi Olsen, namminersorluni inuussutissarsiuteqartoq, Inatsisartunilu ilaasortaasoq, meeqqanut marlunnut arfineq-pingasunik qulinillu ukiulinnut anaanaavoq kisimiittoq. Qeqertarsuarmi Blue Café maanna ulapaarfioqisoq ingerlappaa, Demokraatinilu siulittaasuugallartutut ivertinneqaqqammerluni.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutit inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Meeqqani ilagalugit Qeqertarsuarmut ukioq ataaseq sinnerlugu matuma siorna nuupput. Maannali illugisani ukiut pingasut matuma siornatigulli pisiarisimavaa. Meeqqanilu Qeqertarsuarmut nuukkamik, illumi pisiarisimasami immikkoortuani café ammarpaa, tallimanillu sulisoqarluni. Aasaaneranili sulisuni pangasunik ilaqqissallugit naatsorsuutigaa. Ilaqutariit ukiut kingulliit 15-it Qeqertarsuarmi sulinngiffeqarlutik feeriartarsimapput, taamaattumillu
Qeqertarsuarmi illusinissaq pissusissamisoorsimavoq. Illullu inuussutissarsiorfittut atornissaa periarfissaalluarmat atorluarusussimavaa.

- Periarfissanik pitsaasunik takunnissinnaaneq pigereersimagunarpara. Illoqarfitsinni suut pisariaqartinneqartut
amigaataasullu takusinnaavakka, anguniagassatullu siunniussimasama piviusunngortinnissaat pikkoriffigaara. Illuttalu initaata naqqaniittup cafénngortinnissaa periarfissatsialaasoq takusinnaasimavara. Maanna aasaanerani ulappuppugut, illoqarfimmiunik takornarianillu inoqarluartarluta, Nivi Olsen oqarpoq.

Nioqqutissat atortussallu allat avataaniit pissarsiariniartarnerat unammillernartoqarpoq.

- Avannaani illoqarfeeqqami cafémik ingerlataqarneq unammillernartoqarpoq, aningaasallu kaaviiaartissinnaajumallugit sulinerusariaqarluni. Kisianni namminersortutut ulapikkaluaqalunga,
politikkikkut sulinera siulliujuassaaq, taanna oqarpoq.

Taaguunneqarluartartoq

Nivi Olsen 2014-imi Inatsisartunut qinersinermi siullermeerluni Demokraatiniit qinigassanngortikkami, 1.428-init taaguunneqarluni qinersinermi taaguunneqarnerpaat sisamaattut inissippoq. Naalakkersuisooqatigiilersullu Siumut, Demokraatit Atassullu suleqatigiilermata, Nivi Olsen Kultureqarnermut, Ilinniartitaanermut
Ilageeqarnermullu Naalakkersuisutut ivertinneqarpoq.

- Qinikkatut sulileqqaarninni naalakkersuisunngortinneqarnera soorunami pikkunarsimavoq. Politikkili uannut soqutiginartuaannarsimavoq, inuiaqatigiinnullu pitsaanerpaaq anguniarlugu iliuuseqarnissaq tappiffigaara, Nivi Olsen oqarpoq.

Qinersisartulli politikerinut sakkortusinnaasartumik isiginnittaaseqarnerat pissutigalugu, politikeritut sulineq
unammillernartoqarsimavoq.

Inuiaqatigiinni kamassaqarneq

Qinersisartut qinikkanut sakkortusinnaasumik isummersortarnerat, politikerimut ulapaartuartuusumut inuttut akisusimavoq.

- Inuit oqallittarfiisigut politikkikkut saassutarineqaraangama isornartorsiorneqarnerma atuarnissai nukissaqarfigiunnaarnikuuakka. Oqaatsit atorneqartut sakkortuut inuttut politikkerisullu nakkartissanngippannga imminut paarisariaqarpunga, meeqqakka aamma eqqarsaatigisariaqarakkit. Taamaattumik nukikka oqaatsinut uannut nakkarsaaniutinut atorusunngilakka, Nivi olsen oqarpoq.

Inuiaqatigiinni ajortoqarsoraa inuit imminnut, inuit oqallittarfiisigut, kamassaqarfiginerat taama annertutigimmat. Paasisinnaalluarpaalu tamakku pillugit politikkerit amerlasuut politikki qimassallugu
aalajangertarnerat. Taarsiulluguli nuannaarutigaa inuit, oqallittarfiit atorlugit kamassatik annissuussinnaasarmatikkit.

- Aappaatigut uggornarpoq kamassaqarnerujussuup inuiaqatigiinnut ajortumik sunniinera akerleriinnernut nukippassuarnik atuiffiusoq. Kamassaqarnerli tamanna qinersisartunit kisimi atugaanngilaq, aammali politikkerinit atugaavoq. Inatsisartunulli qineqqusaarneq kingulleq siornatigumut sanilliullugu pissuserissaarnerusumik ingerlanneqarpoq, naliliivoq.

Inatsisartunut ilaasortat iluminni attaveqatigiinnerat ajunngitsuusoq naqissuserpaa.

- Assersuutigalugu uanga inuttut Kim Kielsenimut Hans Enoksenimullu ajunngitsumik attaveqarpunga. Sulili ilikkanngilarput oqallinnerit pissuserinnerusumik ingerlassinnaaneri. Oqalliseriaaseq sakkortooq atortarparput, taamaattumillu kamaattutut nipeqarsorineqartarluta. Isumaqarpunga politikkikkut oqalliseriaaseq uatsinnut suli nutaajusoq, politikkikkulli kinguaariit nikikkiartuaarnerat malitsigalugu oqalliseriaaseq pitsaasoq ilikkariartorneqarpoq, taanna oqarpoq.

Kommuneqarfik Sermersuumi kommunalbestyrelsimut 2016-imi qinigaavoq, 2018-imiilli kommunalpolitikkeritut sulinngiffeqarallarpoq, meeqqani marluk peqatigalugit Qeqertarsuarmut nuunnikuugami. Demokraatit siulittaasuat politikkimi sulinerminik qanittumi unitsitsivoq, tassungalu atatillugu Nivi Olsenip partiimi ulluinnarni aqutsineq tigullugu siulittaasuugallartutut inissippoq.

Aviisi Sermitsiaq nutaaq uani ataani pissarsiarisinnaavat:

inuiagatigiit politikki
Powered by Labrador CMS