Aaqqissuisuuneq innersuussivoq: Nammineq pilliuteqarnerussaatit

Pisortat ajornartorsiutit tamaasa isumaginiarsinnaanngilaat. Nammineerluta akisussaaffimmik tigusissaagut. Sanilit ikiortaruk. Qitornatit paarilluakkit, Martha Abelsen oqarpoq, tamattalu naveerpaatigut pisussaaffivut puigoratsigit. Pisinnaatitaaffivullu kisiisa eqqarsaatigalugit.

– Inunnit isigineqalersimavoq inuiaqatigiit sunik tamanik tunissagaatigut. Ullumikkut suut tamarmik akeqanngillat. Sualuppallaalersimavoq. Pisortanit ikiorsiissutit aatsaat pisariaqavitsillugu tunniunneqartassapput, Martha Abelsen isumaqarpoq.

Martha Abelsen tamatsinnut kajumissaaruteqarpoq. Taanna isumaqarpoq inuiaqatigiit innuttaasunik isumaginnippallaartut.

- Nammineerluta akisussaaffimmik tigusissaagut. Pisussaaffeqarpugut pisinnaatitaaffeqaannanngilagut, peqqissutsimut, isumaginninnermut inatsisinillu atuutsitsinermut naalakkersuisoq misilittagartooq oqarpoq.

Martha Abelsenip ernumanartoqartippaa 16-18-inik ukiullit 40 procentii meeqqat atuarfiannit anillutillu ingerlaqqinneq ajormata. Suliffeqanngillat ilinniagaqarnatilluunniit.

Aaqqissuisuuneq innersuussivoq

Allaaserisaq una aviisimit AG tigusaavoq, aaqqissuisuunermit Christian Schultz-Lorentzen toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

- Inuusuttut nammineersinnaassusiiagaasimapput. Pisortat inissisimanerat tigusimavaat. Inuusuttut pisortanit naatsorsuutigisarpassuaqarput. Naatsorsuutigaat ajornartorsiutitik inuiaqatigiit isumagissagaat. Inuiaqatigiittut inuusuttut ima isumaginiartigisimavavut akisussaaffiiarsimallutigit. Piviusulli imaapput tamakkua piumanerullugu qanoq piumaffigineqarnerminnik angajoqqaaminnit eqqortunik piumaffigineqarnissartik.

– Ilaqutariit perrassarneqassapput inuusuttunut annertunerujussuarmik iliuuseqartarnissaannut inuusuttullu nammineerlutik iliuuseqarnissaannut piareersarlugit, Martha Abelsen oqarpoq.

Meeqqat inissinneqarsimasut 700-t

Taanna ilanngullugu oqarpoq nammineq politikerillu allat inuusuttut oqaloqatigerusukkitik paasiniarlugu inuusuttut nammineq qanoq isumaqarnersut inuusuttorpassuarnik 16-18-inik ukiulinnik suliaqanngitsunik ajornartorsiut politikerit qanoq aaqqissinnaaneraat.

- Paaserusupparput sutigut kukkusimanersugut. Aammalu qanoq isilluta ataatsimoorluta suleqatigiilluta ajornartorsiut tamanna aaqqissinnaaneripput, taanna oqarpoq.

- Pisortanik isumaginnittunik peqalersimavugut. Pisinnaatitaaffiit amerlavallaarlutik pisussaaffiillu ikippallaarlutik. Taamaattumik pisariaqarpoq naatsorsuutigisat naligiissarnissaat. Akisussaaffik inuusuttunut angajoqqaavinullu utertinneqassaaq. Pisortat meeqqat atugarliortut pisariaqartitsilluinnartullu sammissavaat, Martha Abelsen oqarpoq.

Taassuma ullumikkut meeqqat 700-t angerlarsimaffiup avataani inissinneqarsimanerat innersuussutigaa.

- Inuiaqatigiinnguani 56.000-iinnarnik inulinni meeqqat pisortanit isumagineqartut amerlavallaarujussuaqaat. Meeqqat 200-t ulloq unnuarlu paaqqinnittarfinniipput, 100-t paaqqinnittarfinni namminersortuni, meeqqallu 300-400-t angerlarsimaffiup avataani ilaqutariinnut inissinneqarsimapput. Immaqalu allaat ilaminiinnannguaralugit.

– Isumaginninnikkut ajornartorsiuterujussuit inissiinerillu akisoorujussuit pissutigalugit amerlanerujussuit namminneq inuunerminnut akisussaaffimmik tigusitittariaqarpavut imaluunniit akisussaaffimmik tigusinissaannut ikiorlugit. Ilaqutariit ima atugarliortigissanngillat qitornaat angerlarsimaffiup avataanut inissittariaqarlutik. Ullumikkut amerlavallaaqaat oqartut pisortat tamanna isumagissavaat.

Akisussaaffimmik tigusigit

Pisinnaatitaaffiit pisussaaffiillu tamatigut ataqatigiissuupput, Martha Abelsen erseqqissaavoq.

- Sianigissavarput pisinnaatitaaffiit kisiisa oqaluuserissannginnatsigit. Tamatta pisussaaffeqarpugut. Taakkua marluk imminnut ataqatigiipput. Ilaqutariit ilisimanerulissavaat tamatta inuiaqatigiinni innuttaagatta akisussaaffimmik tigusisariaqartut. Angajoqqaat, ulluunerani paaqqinnittarfiit atuarfiillu meeqqat ilinniartissavaat pisussaaffeqartut namminnerlu akisussaaffimmik tigusisariaqartut.

- Tigooraaginnartoqarsinnaanngilaq. Aamma inuiaqatigiinni innuttaasutut uannut piumasaqartoqarpoq.

Martha Abelsen arlalinnik assersuusiorpoq pisussaaffillit tassaasut ilaqutariit meeqqallu, sanilerisat, aammattaarli inuk nammineq.

- Inuk peqqissuunissaminut nammineq akisussaaffeqarpoq. Seqinneraluartoq nammineq qitornat nasaqarnissaat oqortunillu atisaqarnissaat isumagineqassaaq. Angajoqqaatut qitornatsinnut ilaguutiinnartarutta toqqusaarluliinnassapput. Qitornat ataavartumik oqarfigineqartassapput piumaffigineqartut asaneqarnertik pissutigalugu. Ilami angajoqqaat qitornaminnut annertunerusumik akisussaaffeqassapput. Ullumikkut amerlanerpaat taamaasiorput. Ullulli ilaanni Kalaallit Nunaanni namminiilivissagutta akisussaaffik annertunerusumik angajoqqaanut utertittariaqarparput. Taamaasillutik pisortat sammissavaat meeqqat inersimasullu atugarliortut, atorfissaqartitsilluinnartut, isumaginninnikkut iliuuseqarfiginissaat, Martha Abelsen tikkuaavoq.

Pisortanit ikiorsiissutit pisariaqavitsillugu

– Tamatigut inuiaqatigiinni sanngiitsoqartarpoq ikiorneqartussanik. Ineriartornerli killormut saatissavarput. Taamaasilluni siunissami pisortanit ikiorsiissutit pisariaqavitsillugu aatsaat tunniunneqartalissallutik.

- Eqqarsartaaseq allanngortittariaqarparput. Taamaasilluni politikerit pisortallu kisimik sanngiitsunik isumaginnittassanatik. Aamma inuiaqatigiinni inuinnaat akisussaaffimmik tigusissapput.

- Suliassaq annertorpasippoq. Qanoq isilluni ingerlanneqassava?

- Siullerpaamik ajornartorsiut pillugu oqallinneq aallartinneqassaaq. Oqallinneq tamanna ingerlanneqassaaq peqatigiiffinni, kommunalbestyrelsini, ilinniagaqarfinni, meeqqat atuarfianni meeqqallu akornanni. Qanoq isilluta ilorraap tungaanut aallartitsissaagut? Inuiaqatigiittut ukiuni tusintilikkuutaani atugassarititaasut sakkortuut atorlugit atasimavugut. Taamaattumik ajornartorsiut tamanna ataatsimoorluta aaqqissinnaasariaqarparput, inuiaqatigiit tulluusimaarlutik oqarsinnaalersillugit: Ataatsimoorluta anguarput!

Martha Abelsenip qanittut taavai. Angajoqqaat qitornaminnut akisussaaffeqarnerat. Sanilitsinnut ilaquttatsinnullu pisussaaffeqarnerput.

- Inuiaqatigiinnut inukitsunut imminut illersoqatigiittarneq ilisarnaataavoq. Amerlavallaanik saarullissimagaanni sanilit atsalu tunineqartarput.

Inuiaqatigiit isumaginnittut

Abelsen naapertorlugu »inuiaqatigiinnik isumaginnittunik« pilersitsisimavugut, innuttaasut inunngorneranniit toqunerannut suut tamaasa isumagisarlugit. Kalaallit Nunaat piffissami sivikitsumi inuiaqatigiinnit piniartukkormiuniit naalagaaffimmut pigissaarfiusumut sukkasoorujussuarmik ineriartorsimavoq.

- Siusinnerusukkut amerlasuut eqqarsartarput suliffissarsiussallutik inissiartalimmik. Aatsaat kinguaariinni kingullerni marlussunni nammineerluni inissamik pissarsiniartoqartalerpoq. Amerlasuut isumaqarnerattut tamanna inuiaqatigiit pisussaaffiginngilaat. Sanngiitsut kisiisa nammineersinnaanngitsut, inissaqartinnissaat pisussaaffigaarput.

- Eqqarsartaaseq tamanna allanngortinniarlugu qanoq iliortoqassava?

- Suut tamarmik ataqatigiipput. Inunnit isigineqalersimavoq inuiaqatigiit sunik tamanik tunissagaatigut. Ullumikkut suut tamarmik akeqanngillat. Sualuppallaalersimavoq. Inuusuttut namminneq oqarput, inuunitsinnut akisussaaffiiarsimavatsigut. Nammineerluta eqqarsartariaqanngilagut.

- Naartunaveersaatit akeqanngillat, usuup-puui akeqanngillat. Taamaakkaluartoq naartuersittartut amerlasoorujussuupput, inunngortunit suli amerlanerullutik. Kinguaassiuutitigullu nappaaterpassuit atugaraavut.

- Imminut aperisariaqarpugut: sukkut ajortoqarsimava? Allaanerusumik eqqarsartariaqarpugut. Inuusuttut – nunarsuarmioqatigiinni peqataallualersimasut – nassuiaatissavavut aamma maani akisussaaffeqartut. Matuma kivinnissaanut atorfissaqartippavut. Aamma ikiuutissapput akisussaaffimmillu tigusillutik, Martha Abelsen oqarpoq.

Powered by Labrador CMS