Aaqqissuisuuneq innersuussivoq: Nakkutilliisoqarfiup aningaasaliiniartut ersilersippai

Kommuneqarfik Sermersuup inissianut periusia Kommuneqarfiit Nakkutilliisoqarfiata sakkortoorujussuarmik isornartorsiorpaa, aalajangiinerlu tamanna Nuummi inissialiornermut kinguneqarpoq.

Soraarunerussutisiaqalernissamut aningaasaateqarfiit marluk, Danmarkimi PensionDanmark-ip nunatsinnilu Sisap, Qinngutsinni Pinguaqqami inissianik 200-nik, katillugit 400 millioner koruuninik akilinnik, sanaartornissamik suliniumminni kommunip inissiaatileqatigiiffia Iserit qanimut suleqatigaat.

Suleqatigiinneq tamanna maanna maangaannarpoq.

Nakkutilliisoqarfiup 2020-imi februaarip 12-ianni ingerlaannaq atuutilersussamik Kommuneqarfik Sermersooq peqquvaa Nuummi namminersortunit aningaasaliisunit manna tikillugu inissianik 416-inik attartukkami saniatigut amerlanerusunik isumaqatigiissuteqassanngitsoq.

Tamanna pissutigalugu PensionDanmarkip aalajangiivissoqarnissaata tungaanut Pinguaqqami suliniummi peqataanini unitsikkallarpaa.

– Namminersortut inissiaataat attartortittakkat pillugit inatsit qanoq paasineqassanersoq namminersorlutik oqartussat kommunilu maanna aaqqiagiinngissutigaat; aaqqiagiinngissuteqarneq tamanna Nuummi Kalaallit Nunaannilu inissianut attartortittakkanut, namminersortunit pigineqartunut, malittarisassanik siunissami qularnanngitsumik sunniuteqassaaq, soraarnerussutisiaqalernissamut selskabip illuutinut pisortaa Marius Møller taamani Sermitsiamut oqarpoq.

Nakkutilliisoqarfiup novembarip qulingiluaanni Kommuneqarfik Sermersooq peqquvaa inissianut periutsip atorneqartup assinga atorlugu amerlanerusunik attartornissamik isumaqatigiissuteqassanngitsoq. Periuseq taanna atorlugu kommuni aningaasaliisunit namminersortunit inissianik attartortarpoq tuniniaanermi akit atorlugit, inissiallu innuttaasunut akikinnerusumik attartorteqqittarlugit. Tamatumalu nikingassutaa kommunip akilertarpaa.

PensionDanmarkip illuutinut pisortaa Marius Møller ullumikkut Sermitsiamut oqarpoq soraarnerussutisiaqalernissamut aningaasaateqarfik Qinngutsinni Pinguaqqami suliniummut peqataajunnaartoq. Soraarnerussutisiaqalernissamut aningaasaateqarfiit nuannarineq ajorpaat suliniutinut, ilaasortat aningaasaataannik millionilinnik aningaasaliiffiginiakkaminnut, malittarisassat politikkikkut nalunartoqartarnerat.

– PensionDanmark maannangaaq Kalaallit Nunaanni aningaasaliissuteqanngilaq, Nakkutilliisoqarfiup aalajangiinerata kingorna Marius Møller oqarpoq.

Inatsit allanngorteqquvaat

Soraarunerussutisiaqalernissamut aningaasaateqarfiup Sisap Pinguaqqami suliniut aamma taamaatiinnarpaa.

– Suliniummi siunertarisimavarput illoqarfinni anginerusuni inissaaleqiffiusuni inissialiornissaq tamakkualu kommuninut attartortillugit, Nakkutilliisoqarfiulli aalajangiineratigut ilisimarpianngilarput taamaasiorsinnaanerluta taamaasiorsinnaannginnerlutaluunniit. Uagutsinnut aalajangiisuuvoq taamatut aningaasaliissuteqartinnata inatsisip malittarisassallu ersarissuussasut, tamannalu pisariaqartumik qulaajarneqassappat politikkikkut iliuuseqartoqartariaqarpoq, soraarnerussutisiaqalernissamut aningaasaateqarfiup Sisap siulittaasua Jess G. Berthelsen Sermitsiamut oqarpoq.

– Nakkutilliisoqarfiup aalajangiinera pakatsissutigaajuk?

– Soorunami pakatsivunga, taamatulli inerneqassasoq ilimasussimavunga. Sermersuup periusia periusaavoq pitsaasoq, naammaginartumik iluanaaruteqarnissamut Sisap piumasaqaataanik naammassinnittoq, taamaasilluni ilaasortatta sapinngisamik anginerpaamik soraarnerussutisiaqarnissaat qulakkeerneqassammat. Tamatumunnga atatillugu nakkartoorfigisinnaasat sapinngisamik siammarsarnissat pingaaruteqarpoq. Taamaattumik PensionDanmarkimik Iserimmillu suleqateqarnerput nuannaarutigisimavarput.

– Taamatut aalajangiinerup kingorna Sisa qanoq iliorniarpa?

– Soraarnerussutisiaqalernissamut aningaasat nunami maani atorneqarnissaat soqutigisaraarput, uagutsinnullu pingaaruteqarpoq tamakkua inissianut atorneqarnissaat. Nakkutilliisoqarfiup aalajangiinera ilisimasalittatta misissorluaqqaalaassavaat. Taavalu takussavarput allanik periusissaqarnersoq kommunimi malittarisassanut akerliunngitsunik, Jess G. Berthelsen oqarpoq.

Iserit-ip sanaartorneq ingerlappaa

Soraarnerussutisiaqalernissamut aningaasaateqarfiit peqataajunnaarnerisa kingorna kommunip inissiaatileqatigiiffita Iserit A/Sip sanaartorneq kisimiilluni ingerlatilerpaa.

– Pinguaqqami inissiat attartortittakkat 48-t sanaartortippavut, EMJ-Atcon tamakkiisumik sanaartortoralugu, Iserit pisortaa Torben Kortegaard Sermitsiamut oqarpoq.

Naatsorsuutigineqarpoq inissiat 2022-ip naalernerani 2023-illuunniit aallartinnerani sanaartorlugit naammassineqarsimassasut. Soraarnerussutisiaqalernissamut aningaasaateqarfiit marluk peqatigalugit Pinguaqqami inissianik 200-nik sanaartornissaq suliniutigineqaraluarpoq.

Iserit A/S Pinguaqqami inissialiami 48-t saniatigut amerlanerusunik sanaartornianngilaq, naatsorsuutigaali sanaartornini Uppitalimmi nangissallugu, tamanna sanaartorfigissarneqareerpat.

Tamanna peqatigalugu Iserit Qernertunnguani inuusuttunut/utoqqarnut 24-inik inissialiorpoq, inissiatut tamatigoortutut taaneqartunik.

– Inissiat tamakkua pisortanit tapiiffigineqarani sanaartorneqaraluartut sanaartornermi akiat qaffasinngitsoq, nukissamik atuinikinnerunerat ingerlanneqarnerisalu akikinnerunerat pissutigalugu ineqarnermut akiliummut, inoqutigiinnit aningaasarsiornikinnerusunit akilerneqarsinnaasumik attartortinneqarsinnaapput, ineqarnermut tapiissummik qinnuteqarsinnaallutik, Torben Kortegaard oqarpoq.

Ineqarnermut akiliutissat naatsorsorneqassapput sanaartukkat naammassineqareerpata.

Iserit A/S ukiuni aggersuni ukiumut agguaqatigiissillugu inissianik 100-nik sanaartortarniarpoq, nunaminernik sanaartorfissaqarnera naapertorlugu.

Nuummi Kongevejimi inissialiorneq aappaagu aallartinneqassaaq. Kongevejimi Ceresvejimilu blokkit inissialiat (blok B-C-D aamma M-N-O) isaterneqassapput, inikuinilu nutaanik inissialiortoqassalluni.

– Naatsorsuutigaarput Kongevejimi Blok B isaterneqaqqaassasoq, tassanilu inissiat nutaat 70-it sanaartorneqassapput, Torben Kortegaard paasissutissiivoq.

Ukiut sisamat iluanni inissialiornissamik isumaqatigiissuteqarluni Iserit A/S-ip entreprenøritut ingerlatsivik EMJ-Atcon suleqatigaaa. Isumaqatigiissut 2020-imi suliarinnittussarsiuunneqarpoq, EMJ-Atconilu pitsaanerpaamk neqerooruteqarpoq.

Ajortoq imminut ikiorpoq

Kommunip Nuummi inissialiornera namminersorlutillu oqartussat illoqarfiit pingaarnersaanni inissialiornerat assigiinngitsorujussuupput.

Namminersorlutik Oqartussat inissiaatileqatigiiffiata Illuut A/S-ip Nuummi sanaartugai kingulliit tassaapput inissiaqarfiliat sisamat katillugit 48-nik inissiallit, taakkualu Qinngutsinni Suloqqami napasuliat qulit ataaniipput, 2016/2017-imilu atorneqalerlutik.

Illuut A/S piffissami 2006-imiit 2017-imut inissianik 900-ngajannik sanaartorpoq.

Taavali sanaartorneq unippoq.

Inissianik nalinginnaasumik attartortittakkanik amigaatigineqartunik sanaartornermut taarsiullugu namminersorlutik oqarttussat Nuummi sulisunut inissialiorniarput.

Ilaatigut peqqinnissaqarfik peqqinnissaqarfimmut sulisunut inissianik 60-inik sanaartorniarpoq, ilaatigullu Inatsisartut nuna tamakkerlugu politikerinut sinerissameersunut 25-inik inissialiorniarput.

Ilanngullugu oqaatigineqassaaq namminersorlutik oqartussat Nuummi Kujallerpaani kollegialiormata ilinniagaqartunut 218-inut inissalinnik.