Aaqqissuisuuneq innersuussivoq: Meeqqat meeqqat angerlarsimaffiiniittut ilisimasaqarfiginerulerpavut

Meeqqat angerlarsimaffianni najugaqarluni qanoq ippa? Apeqqut tamanna meeqqanut nunami maani meeqqat angerlarsimaffiini najugaqartunut tupinnaraluartumik apeqqutigineqarneq ajorpoq. Maannali tamanna paasisaqarfiginerulerparput – ilisimatuutut misissuisoq Bonnie Jensen tamatumani qujaffissaavoq.

Meeqqat, meeqqat angerlarsimaffianniinnerminnik qanoq isiginnittarnerat assigiinngitsorujussuuvoq. Ilaasa toqqissisimanartippaat naammagisimaarlugulu, allalli akerlianik misigisarlugu. Ilaquttanik maqaasineq sakkortusinnaasaqaaq.

Meeqqat meeqqanut angerlarsimaffimmi peroriartortut 50 procentii, meeqqat angerlarsimaffianni inuunermik annersaanik naammagisimaarinnittarput.

Sinnerisa aliasuutigisarpaat – tamatiguunngikkaluartumik piffissalli ilarujussuani.

Ikittunnguit iluamik nuannaanngisaannarput.

– Tassa allaanngingajakkami eqqoriaaginnarluni aalajangiisoqartartoq. Aamma inuiaqatigiittut immitsinnut aperisariaqarpugut meeqqat angerlarsimaffimmik avataanni inissinneqarsimasut taamaallaat affaat ulluinnarni inuunerminnik naammagisimaarinnimmata ajunnginnersoq.

Aaqqissuisuuneq innersuussivoq

Allaaserisaq una aviisimit AG-mit tigusaavoq, aaqqissuisuunermit Christian Schultz-Lorentzenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Taama oqarpoq Bonnie Jensen, taanna ilaatigut Ilaqutariinnut Inatsiseqarnermullu Naalakkersuisoqarfimmi ulluunerani unnuamilu paaqqinnittarfinnut immikkoortortami pisortaasimavoq. Taanna maanna meeqqanut angerlarsimaffiup avataanut inissinneqarsimasunut ph.d.-mik allaaserisamut sukumiisumut allaaserinnittuusimalerpoq taannalu Ilisimatusarfimmi qanittukkut illersorlugu.

Suliassani annertooq aallartitsinnagu ilaatigut attaveqarfigeqqaarpai – paasiniaaffigalugillu – meeqqanut angerlarsimaffiit Nunatsinni 22-usut, anguniagassamisullu aalajangiullugu, allaaserisamini meeqqat oqaatigisaat pingaarnertut qitiutinniarlugit.

Siullermeersumik meeqqat namminneerlutik oqaaseqartinneqassapput.

– Inersimasunngorninniit meeqqanut atugarliortunut tunngasunik suliaqartuaannarsimavunga aamma meeqqat namminneq oqaatiginiagaat amigaatigiuaannarsimallugit. Taamaattumik taakku oqaatigisaat saqqummiukkusuppakka. Taakkumi tassaammata namminneq inuunerminni pingaarutilinnik oqaluttuarsinnaasut. Angerlarsimaffiup avataanut inissinneqarneq qanoq misigineqartarnersoq meeqqat kisimik ilisimavaat, Bonnie Jensen nassuiaavoq.

Naveersinnginnerusarnissaq

Taava meeqqanit sunik oqaluttuunneqarpa?

Bonnie Jensenip apeqqut tamanna Ilisimatusarfimmi maajip arfineq-aappaanni akissuteqarfigaa, allaaserisani 255-inik quppernilik paasiuminartumik naalisarlugu saqqummiukkamiuk, taassumalu taaguutigaa ”Meeraanermi angerlarsimaffik imaluunniit meeqqat angerlarsimaffiat? Meeqqat 38-t Kalaallit Nunaanni ullukkut unnuakkullu paaqqinnittarfinnut inissinneqarsimasut misigisartagaannik sukumiisumik misissuineq”.

Meeqqat oqaloqatiginerisigut paasisai pingaarnerit sisamat ukuupput:

1. Meeqqat sooq inissinneqarsimanerminnut tunngasunik paasitinneqarusupput – akuutinneqarnerunissartik kissaatigaat.

2. Meeqqat kissaatigaat peqqussutit ikinnerunissaat aamma naveerneqannginnerusarnissartik kiisalu najukkaminni inersimasut pitsaasut amerlanerunissaat.

3. Ilaquttatik attaveqarfiginerorusuppaat; angajoqqaatik, qatanngutitik aamma ilaquttatik allat.

4. Affaat maanna najugaqarfigisaminnik naammagisimaarinnipput.

Bonnie Jensenip oqaatigaa, meeqqat siunissaminnik paasitinneqannginnertik nukillaanganartikkaat. Tassami nalugamikku qanoq sivisutigisumik angerlarsimaffimmik avataani inissisimassanerlutik – aamma siunissami qanoq pinissartik.

– Matumani meeqqat qanoq misigisimanerat iserfiginiartariaqarpoq. Uagut inersimasutut allanngulaarnerit nalorninartorsiutigisinnaasarpavut. Allaffimmut allamut nuunnerinnaalluunniit nalorninartumik allannguerujussuarnertullu misinnarsinnaasarput. Matumani meeqqat pineqartut inuunerat tamakkerluni allanngortinneqartarpoq.

Meeqqat apersorneqartut ilaata ima oqaatigaa:

– Qanoq sivisutigisumik maaniinnissaq ilisimanagu annilaanganarsisarami. Tassanngaannaq oqartoqarami pigisanik poortueqqusisumik nuunnissamullu piareersaqqusisumik.

»Qamuuna attortinnartoq«

Bonnie Jensenip, sulisut – forstanderit imaluunniit sulisuni qaffasinnerit – isornartorsiunnginnamigit erseqqissarniartuarpaa.

Bonnie Jensen

– Meeqqat angerlarsimaffiini pitsaasunik sulisorpassuaqarpoq. Taamaattumik aamma tamanna pissutigalugu meeqqat inersimasunik pitsaasunik amerlanerusunik ujartuipput, taanna oqarpoq.

– »Inersimasoq pitsaasoq« qanoq ittuua?

– Meeqqat namminneq oqaatigaat, taakku tassaasut inersimasut namminerminnut piffissaqartut tusarnaartartullu.

– Sulisut ikippallaaramik?

– Naamik, aningaasat amigaatigineqanngillat. Ilinniarsimasunilli sulisussarsisinnaaneq ajornakusooqigami aamma sulisut nikerartorujussuusinnaasarlutik.

– Meeqqanik apersuinerpassuanni suut inuttut ilinnut ilungersunarnerpaasimappat?

– Meeqqat ilaquttaminnik maqaasinerisa misiginerat. Qamuuna attortinnaqaaq, Bonnie Jensen akivoq.

Taassuma ilisimatusaatigalugu allaatigisamini meeqqap aliasuutiminik oqaatiginninnera issuarpaa.

– Maani oqaloqatissaqanngilanga. Kiserliorpunga – aliortukkatut ippunga. Soorlu “takussaanngitsutupajaaq illunga”, meeraq taama nassuiaavoq.

Angerlarsimaffiup avataanut inissinneqartartut suli amerliartortut

Bonnie Jensenip Ilisimatusarfimmi saqqummiussinermini nassuiaatigaa, meeqqanik oqaloqateqarnini “maanna pisunik ersersitsinermut takussutissaasut”. Meeqqat piffissaq tamaat aliasunneq ajorput imaluunniit nuannaarneq ajorput. Tunngaviusunnilli misigissuseqarput, sullissisunit eqqumaffigineqartariaqartunik.

– Meeqqat ikinnerit (taakkunannga amerlanerit 12-init 18-inut ukiullit) aaliangersimasumik aliasuuteqarput aamma angerlarsimaffiup avataanut inissinneqarnertik toqqissisimananngitsutut maqaasinartumillu misigisarlugu.

– Paasisama aamma ilagaat meeqqat, meeqqat angerlarsimaffiini aaliangersimasuniittut allanit nalinginnaasumik nuannaarnerunerat, Bonnie Jensen nassuiaavoq.

Ataatsimut isiginninnerulluni misissueqqissaarnermini maluginiarsimavaa, angerlarsimaffiup avataanut inissinneqartartut piffissami sivisuumi amerliartuinnavissimanerat. Ullutsinni meeqqat 300-t missaat sinerissami siammarsimallutik ullukkut unnuakkullu paaqqinnittarfinni najugaqarput, taakku meeqqat nuna tamakkerlugu meeqqat amerlassusaasa 4,5 procenteraat.

– Danmarkimi Savalimmiunilu kisitsisit taakku 1 procentip missaanniipput, aamma soorlu Australiami New Zealandimilu 1 procentimit ikinnerungaatsiarlutik, tamatumunnga patsisaalluni nunani taakkunani meeqqat peroriartornerminni “attaveqatigiinnikkut isumaginniffiusuni” imaluunniit ilaquttani pissarissaarnerusuni peroriartornissaat pingaartillugu anguniarneqartarmat,

– Tamanna qanoq assigiinngissuteqarami?

– Assigiinngissutaa angeqaaq. Misissuinerit paasinarsisippaat, meeqqat ilaquttaminnit imaluunniit qanittumik attaveqarfigisaminnit peersinneqartut, nalinginnaasumik inuunerminni kingusinnerusukkut pitsaannginneroqisumik inuuneqartartut.

Atugarissaarnermik misissuinerit – meeqqanut tunngasut

Bonnie Jensenip erseqqissarpaa angerlarsimaffiup avataanut inissiinerit eqqortumik aaqqiinerit kisiartarisinnaasaraat.

– Angerlarsimaffiup avataanut inissiisoqarnerata kingunerisinnaavaa meeqqat ullut tamaasa nerisarnissaat aamma inersimasunit isumagineqarnerat. Erseqqissassallugu – aammaarlugu – pingaaruteqarpoq, meeqqat angerlarsimaffii pitsaasut amerlaqimmata inersimasullu pitsaasut meeqqanik isumaginnillutik, taanna oqarpoq.

Meeqqanut meeqqat angerlarsimaffiinut inissinneqarsimasunut inuunerminni atugassarititaasunut pitsaanerulersitsinissamut, Bonnie Jensenip tigussaanerusumik siunnersuummini tikkuarpaa, meeqqat tusaaniarneqarnerusariaqartut.

– Meeqqanut tunngasunik isiginninneq ukiut tamaasa atugarissaarnermut tunngasunik misissuisarnertigut annerulersinneqarsinnaavoq. Imminut aperisoqarsinnaavoq sooq paaqqinniffinni sulisut kisimik ukiumoortumik atugarissaarnermut tunngasunik misissuiffigineqartarnersut. Soormi meeqqat aamma taama misissuiffigineqartalerunik, taamaalilluta paasisaqarfiginerusinnaajumallugit. Meeqqat namminneq isiginninnerat paaqqinniffiit ukiumoortumik nalunaarutaanni saqqummiunneqarsinnaanissaat takorloorneqarsinnaavoq.

– Annerusumik iliuuseqartoqarsinnaava?

– Aap, inuiaqatigiit aaqqissuussaanerat pillugu imminut aperisoqartariaqarpoq, meeqqat angerlarsimaffiup avataanut inissinneqartartut sooq amerliartuinnarnersut. Aningaasat pisut ilaanni pitsaanerusumik atorneqarsinnaannginnersut, ilaqutariinnut atugarliortunut pitsaanerusumik tapersersuinermut atorneqarsinnaassammata, taamaalillutik angajoqqaatut isumaginnissinnaalerniassammata, Bonnie Jensen oqarpoq.

Aviisi AG uani pisiariuk:

Powered by Labrador CMS