Aaqqissuisuuneq innersuussivoq: Mattusimaneq artornarpoq

Sulisut nunanit qulinit assigiinngitsuneersut, Nuummi mittarfiliortut, coronamut killilersuinerit sakkortuut pissutigalugit eqqarsartaatsimikkut sakkortuumik mangatsipput. Mittarfiup kinguaattoornissaa ernummatigaat.

Munck Gruppen Nuummi Ilulissanilu mittarfiliorpoq, Nunatsinni marlunnik mittarfissuaqalersitsisussaq.

Munck Gruppen Nuummi mittarfimmik suliaqartoq, corona pissutigalugu sakkortuumik mangatsippoq. Mittarfik kinguaattooratarsinnaavoq. Sulisullu maanna ilungersunartunik atugaqarlutik sulipput.

Coronaqarnerani killilersuinerit pissutigalugit sanaartorfimmi sulisut eqqarsartaatsimikkut artorsarput, suliniummi aqutsisoq Rasmus Schmidt-Petersen, Munck Gruppemeersoq oqaluttuarpoq.

Aaqqissuisuuneq innersuussivoq

Allaaserisaq una aviisimit AG-mit tigusaavoq, aaqqissuisuunermit Christian Schultz-Lorentzenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Sulisut nunanit assigiinngitsunit qulinit ikinnerunngitsuneersut sanaartorfimmiipput. Ilaat nunarsuup illuaneersuupput: Sri Lankamit, Philippinnerinit, Rumæniamit, Polenimit, Islandimit, Savalimmiunit, Sverigemit, Portugalimit, Danmarkimit. Kalaallillu sulisut.

- Piffissaq ilungersunartoq atorparput. Oqartussat conamut killilersuinerinut piumasaqaatit naammassiniarsaralugit aqqutissarsiorluta sulivugut. Ullut tamarluinnangajaasa nakorsaaneq oqaloqatigisarparput. Kisianni sulisunut ataasiakkaanut mattusimaneq artornarluinnarpoq – sanaartorfimmit anisinnaanani. Inuuvugummi. Mattusimaneq ilungersunarluinnarpoq kiserliornarlunilu, aamma nerinermi, Rasmus Schmidt-Petersen nassuiaavoq.

Pingasut suli covidimiteqqugaasut

Sanaartorfimmi qulinik coronamik tunillatsittoqarnerata kingorna – kingullermik sisamanngormat – mittarfimmi sulineq Corona pillugu allattoqarfimmit unitsinneqarpoq. Sulineq ulluni arfinilinni uninngavoq. Maannalu sakkortuumik killilersuilluni aallarteqqinneqarpoq.

Covidimik eqqugaasut arfinillit peqqisseqqipput. Kisianni sanaartorfimmi pingasut suli napparsimapput, taakku mattusimapput, Rasmus Schmidt-Petersen ilisimatitsivoq.

Sanaartorfimmi kantiina matoqqavoq. Sulisut tamarmik ineeqqaminni nerisarput.

Sanaartorfimmi mattusimaffeqarpoq, taamaalilluni sanaartorfik avatangiisiminut mattusimavoq. Sulisulli sanaartorfiup avataani najugaqartut sumiiffimmut mittarfiliornermi suliartorlutik isersissinnaatitaapput. Kisianni sulisut sanaartorfiup avataani najugaqartut Nuummi allanik naapitseqqusaanngillat – ilaquttatik najugaqatigisatik kisimik pinnagit.

Mittarfiliorlutik sulisut tamarmik minnerpaamik meterinik marlunnik ungasissuseqarlutik sulissapput. Malittarisassaq taanna malissallugu avataanit isigalugu ajornakusoorpasissinnaavoq.

- Kisianni maskiinani assigiinngitsuni suligaanni qanillinaveersaartoqarsinnaavoq, Rasmus Schmidt-Petersen oqarpoq.

Unitsinneqassaaq

Munck Gruppen nunarsuarmit tamaneersunit Sri Lankamit Polenimut, inunnik assigiinngilluinnartunik kulturilinnik sulisoqarmat, corona pissutigalugu killilersuinerit malinneqarnissaannut qulakkeerinninniarluni attaveqarniarneq ajornakusuunngila?

- Naagga, taakku inuit suliniutini allani ukiorpassuarni sulisoraagut. Malittarisassat tamarmik malippaat. Tassami tamatta ataatsimoorussamik covid-19-imik tuniluunniit unitsinnissaat aamma ingerlariaqqinnissaq soqutigisaraarput.

Malittarisassat malinneqarnersut kikkut nakkutigaat?

- Politiit ilaannikkut misissuiartortarput. Uagut nammineerluta aamma inatsisinik atortitsivugut. Tassami iluatsinnissaa soqutigilluinnarparput. Sulisutta tamanna nalunngilaat, qanorluunniit nikallornartiginera apeqqutaatinnagu. Coronamut killilersuinerit malinnissaat aamma amerlanerusut akiuussusersornissaat ajornartorsiummit aniguiffissatuaavoq.

Sulisoq tunillatsittoq ataaseq ”napparsimasorujussuaq” eqqaassanngikkaanni, covid-19-mit eqqorneqartut amerlanerit niaqorlullutillu sakkukinnerusumik ersiuteqarput.

Akiuussutissanik kissaateqarneq

Covid-19-imik tuniluunnerit pinngitsoortinniarlugit sanaartorfimmi sulisut tamarmik akiuussutissamik kapineqarnissaat annertuumik kissaatigaa.

- Nuummi sulisut 120-130-iuvugut. Amerlanerit sapaatip-akunnerini arfineq-pingasuni Kalaallit Nunaanni suleriarlutik sapaatip-akunneri marluk angerlarsimasarlutik nikittarput. Taamaammat inuit akiuussusersornissaat pisariulaarpoq. Sulisut ikinnerit akiuussuserneqareerput. Nuummi akiuussusersuisoqarneranut ilanngunneqarnissarput neqeroorutigineqarpoq. Kisianni sulisutta ilaannaanut ajornartorsiummik aaqqiissaaq, tassami ukioqqortunerit maannakkut kisimik kapitipput, Munck Gruppenimi suliniummut pisortaq oqarpoq.

Sulisut mittarfiliornermik suliaqartut akiuussutissamik kapuinermi salliutinneqassanngillat. Kisianni Nuummiittut allat assigalugit neqeroorfigineqassapput.

Mittarfiliorfimmi coronamik tuniluuttoqarnera Nuummi ernumatitsivoq. Najugaqartunut attaveqarneq iluarsiniarlugu Munck Gruppen qanoq iliuuseqarpa?

- Pissutsinut paasinnittoqarnissaa oqariartuutigaarput. Ajuusaartorujussuuvugut. Uggornarlunilu qinngarnarpoq – aamma najukkami sulisutsinnut mattusimasunut. Nuummilu niuerfinnut. Pisut pillugit uagut ajuusaaqaagut, sulisuttalu mattusimaneqarnerat pillugu, Rasmus Schmidt-Petersen nassuiaavoq.

Piffissamut pilersaarummik ajornartorsiut

Mittarfiliornermi sulineq ulluni arfinilinni uninngatinneqarnikuuvoq, maannakkullu coronamut killilersuinerit atorlugit sulivusi. Nuummi mittarfiup piareernissaanut kinguaattoornermik kinguneqassava?

- Tamanna oqaaseqarfigisinnaanngilara. Kisianni Munck Gruppenip sanaartortitsisoq (Kalaallit Airports, aaqq.) piffissamut pilersaarut pillugu oqaloqatigaa.

- Ukiut marluk aappaa avillugu kingullerni coronaqarnera uagutsinnut ilungersunarpoq. Maskiinatsinnut kingoraartissanik pissarsiniarneq ajornakusoorpoq. Nunarsuarmi quersuit imaqanngillat, corona pissutigalugu fabrikkit matoqqanikuunerat pissutigalugu. Atortunik pissarsiniarnitsinnut tunngatillugu unammillernartoqartitsivugut. Sanaartornermut atortut allallu akii qaffannikuupput pissarsiariuminaallutillu. Taamaammat aqqummi kigaallassaaterpassuaqarpoq, Rasmus Schmidt-Petersen nassuiaavoq, taanna Uummannami meeraanermini peroriartorsimavoq.

Nuummi mittarfimmut piffissamik pilersaarummut tunngatillugu oqaaseqaqqinnianngilaq, isumaqatigiissut tunngaviusoq aallaavigalugu 2023-mi piareertussaavoq.

Pisortaaneq Hans Christian Munck, Munck Gruppen, ulluni makkunani Kalaallit Airports aamma Corona pillugu allattoqarfik isumaqatiginninniarfigiartorlugit Nuummiippoq.

Powered by Labrador CMS