Aaqqissuisuuneq innersuussivoq: Maluginiutit atorlugit isiginnaagassiaq

Nunatta Isiginnaartitsisarfiata isiginnaagassiani nutaanerpaaq ”Angalasoq” atorlugu allaanerusumik isiginnaariarnissaq neqeroorutigaa. Taanna maluginiutit amerlanerit atorlugit misigisassaavoq

Nigalinngorluni issialluni qilaatip immikkut oqaluttuassartaanik tusarnaarneq.

- Angalaneq tassa inuuneq, H.C. Andersen oqarpoq.

Tassa imaappa virusip sumut angalasinnaanitsinnik killilerpatigut inuuneq unikkallassasoq? Tamanna Nunatta Isiginnaartitsisarfiata isiginnaagassiami nutaami misissuiffiginiarsaraa, isiginnaagassiarmi pisarnertut isiginnaartitsisarfeqarluni, isiginnaartitsisartoqarluni issiasunillu isiginnaartoqartussanngorlugu suliaanngilaq.

Aaqqissuisuuneq innersuussivoq

Allaaserisaq una aviisimit AG-mit tigusaavoq, aaqqissuisuunermit Christian Schulttz Lorentzenmit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

”Angalasumi” isiginnaartitsisarfiup isiginnaariat nalunaaquttap akunnerata affaani maluginiutit atorlugit assigiinngitsunik misigisaqarnissaannut tikilluaqquai. Takuteqqaarneqarnissaa sinerissamullu angallanneqarnissaa sioqqullugu tusagassiortut sapaatip akunnerani kingullermi misiligutaasumik isiginnaartinneqarput:

Siullermik kamillaqqaartoqassaaq.

Isiginnaariat tamarmik alersaannanngoramik isiginnaagassiap aallartinnerani natermut allequtsiunneqarsimasoq maavaartoq alumikkut malugisinnaavaat. Isiginnaartitsisartut kasserminnit putukkuminnut qaqortunik atukkersorsimasut angalasunik sallaatsumik angallassipput, taartuinnarmi isiginnaartitsiviusartup tunuatungaani pilersinneqarsimasumi.

Tikinneqartut ilaani angalasup uummatimi tillernera malugisinnaavaa, eqqorluarlugu oqaatigissagaanni mikrofoni uummatip nalaanut pisillugu nipaa tusarnaarutikkut tusaasinnaallugu.

Kingusinnerulaartukkut tungip qaqortup tunuatungaani tarranik isiginnaartitsinermik kusanartumik isiginnaarpugut. Inuit ittoorlutik naapinnerannut tunngasumik.

Pisut nikittaattumik nammineq inuttut aamma ataatsimoorluni misigisassaapput. Soorlu nigalinngorluta issaalluta qilaatip immikkut ittup Akilinermeersup oqaluttuassartaanik tusarnaarpugut. Tamatumani ataatsimoorneq immaqa siusinnerusukkut malunnanngikkaluartoq pilerpoq, immaqalu takkuteqqinnaviarani.

Angalanerli tamarmi qanilaartumik silaannaqarpoq tamatumunngalu qularnanngitsumik sakkortusaataalluni tamatta alersaannaalluta nipaarsaarluta pisuttarnerput.

Misigisat kingulliit ilaat uani paasissutissiissutigineqassanngilaq, tamatumanili atorneqarlutik isit siutillu aamma qamuuna sunniuteqarluni, AG-p peqataatitaata ullup sinnerani timimigut malugisinnaasaanik.

Isiginnaagassiaq “Angalasoq” oqaatsivut Tuluillu oqaasii atorlugit isiginnaartitsissutigineqarpoq, isiginnaagassiamilu siunnerfigineqartut tassaallutik kikkut tamarmik 15-ileereersimasut, taakkulu eqimattakkaarlugit qulinit amerlanerunngitsukkuutaarlugit isertinneqartarlutik. Nuummi ulluni tallimani isiginnaartitsissutigineqareerpat illoqarfiit Maniitsoq, Sisimiut, Ilulissat, Qeqertarsuaq aamma Paamiut angalaffigineqassapput.

Qamuuna angalaneq

Isiginnaartitsisarfiup pisortaata Susanne Andreassenip “Angalasoq” isiginnaagassiaraa, maluginiutit atorlugit isiginnaartitsinermik taaneqartartoq isumassarsiorfigineqarluni.

- Piffissami angalasinnaatitaannginnitsinni inuit allaanerusumik misigisaqartikkusukkatsigik, taanna oqarpoq.

Angalasoq

Isiginnaartitsinermik aqutsisoq: Susanne Andreassen

Isiginnaartitsivimmut siunnersorti: Camilla Nielsen

Isiginnaartitsisut/nipilersortut (najugallit): Kimmernaq Kjeldsen, Kristian Mølgaard, Karina Møller, Ujarneq Fleischer, Hans-Henrik Poulsen aamma Nukakkuluk Kreutzmann

Teknik isumaginnittoq: Gerth Lyberth

Isiginnaagassiornermi angalanermilu aqutsisoq: Pilutaq Lundblad

COVID-19-ip isiginnaartitsisarfiup ukioq manna pilersaarutai arlallit unitsippai. Soorlu isiginnaartitsinermi ilitsersuisartumik USA-meersumik isiginnaartitsinermik aaqqissuisussamik tikeraartoqartussaagaluarpoq, taamaatiinnarneqartariaqarlunili. Tamatumunnga taarsiullugu isiginnaartitsisarfik isiginnaartitsinermik nuannarisaqartunut nutaamik misigisassanik nassaarniartariaqarsimavoq.

- Coronap ajornartorsiortitsinera killiliisutut isiginiaannarnagu isumassarsiorfigalugu atorniarsarigatsigu, Susanne Andreassen oqarpoq.

Tamatuma inerneraa “Angalasoq”, taanna ataasiakkaarluni maluginiutit atorlugit misigisassarsiorneruvoq, tamatumanilu maluginiagassanut assigiinngitsunut qanoq ammatigineq apeqqutaassalluni.

- Naak pisarnitsitut angalasinnaanngikkaluarluta qamuuna angalasinnaavugut, matumanilu tamanna neqeroorutigaarput, Susanne Andreassen oqarpoq.

Aviisi AG uani pisiariuk:

Powered by Labrador CMS