Aaqqissuisuuneq innersuussivoq: Maanna qimminut nerukkaatissiussaagut
– Aalisakkat perlukuinik ima peqartigaagut atorluarsinnaallugit, igiinnarnagit, Sisimiuniit Ulloriaq Kreutzmann oqarpoq.
Nunatsinni Naatsorsueqqissaartarfik nalunaarpoq nunatsinni nerukkaatissat 2000 tonsit eqqussortarivut, taakkunannga qimminut nerukkaatissat annertullutik. Tamanna Ulloriaq Kreutzmannip allanngortikkusuppaa, neriuutigalugulu qaammatip matuma naanerani Narsami qimminut nerukkaatissanik tunisassiorsinnaalissalluni, nuliani Paarma Kreutzmann peqatigalugu.
Aallarnisaaleruttorpugut. Aallartinnitsinnili assigiinngitsunik naatsorsuutiginngisatsinnik nalaataqarpugut, taamaattumillu kinguaattuulaarsimallunga, Ulloriaq Kreutzmann oqarpoq.
Tunisassiassat nunatsinneersut
Qimminut nerukkaatissiornerminni ingammik nunatsinniit aalisakkat perlukui, puisit perlukui allallu pisat perlukui kiisalu Narsami Neqip savaaqqanik tunisassiorneraniit perlukut atorniarpaat.
- Neqi isumaqatigiissuteqarfigaarput, Ulloriaq Kreutzmann oqarpoq.
- Maskiinalli ingerlasinnaanissaat nalutillutigu aalisakkanik tunisassiortunut inaarutaasumik isumaqatigiissusiorsinnaanngilagut. Narsami ininik attartorpugut, maskiinanullu pisariaqartunut aningaasarpassuarnut aningaasaliilluta.
Tunisassiarineqassapput aalisakkat neqillu perlukui qerisut sequtserneqartussat. Kingorna imerpalasunngorlugit katersorneqassapput panertinnagit aalaterullugit. Inerinerissavaa nequkkaatissat issoqqaarissunngorlugit 20x20 centimeteritut aniatinnissaat, taakkulu puunut poortorneqarlutik. Issoqqaarissut ajornaatsumik qimminut agguuaanneqarsinnaassapput.
- Suli pukutassanngortissinnaanngilagut taamaaliornissamut maskiinat akisuupilussuussammata annertuumik aningaasaliisoqartariaqarluni. Taamaattumik qimminut nerukkaatissat issoqqaarissut aallarniutigissavavut, Ulloriaq Kreutzmann oqarpoq.
- Narsami tunisassiorneq ingerlalluariarpat sulisunik 7-8-nik suliffissaqartitsinissani naatsorsuutigaa. Sulisussaqareerpunga, allanillu piareersimasoqarlunga. Kisianni inunnik atorfinitsitsilersinnanga maskiinat aallartinnissaat suliareqqaartariaqarpara, Ulloriaq Kreutzmann oqarpoq.
Soqutigineqarluartoq
Suliniut nunatsinni tamarmi soqutigineqarluarpoq. Amerlaqisut suliniut tapersersorpaat. Kingunerisimavaattaaq Wildlifemiit Nalik Venturemiillu aningaasaleeqataasoqarnera.
- Aallartisarninni nammineq Narsamiinnissara naatsorsuutigaara, Ulloriaq Kreutzmann oqaluttuarpoq.
-Iluamik suliarigutsigu naatsorsuutigaara inuit 7-8 sulisorisinnaassallugit. Anguniakkat qassit tonsiunissaat oqaatigiuminaappoq. Qimerloorutsiguli aalisakkat perlukui qanoq annertutigisut iginneqartartut kikkut tamaasa peqataatissinnaagutsigit annertuumik tunisassiornissarput naatsorsuutigaarput.
- Sukkanerpaamilli ukiumut 100 tonsiusariaqarput, Ulloriaq Kreutzmann oqarpoq.
Periarfissaq atorluarneqartariaqartoq
Nammineq neriuutigaa inuit paasissagaat manna periarfissaasoq annertuumik eqqussorneqartartup nammineq tunisassiamit taarserneqarsinnaaneranut, suliffissanik pilersitsiffiulluni inuiaqatigiinnullu isertitanik pilersitsilluni, taamaalilluni nalinginnaasumik eqqussukkatut aningaasartuutaaginnarani.
Pisuussutaapput isiginngitsuusaartuarsimasavut. Ukiut 50-it sinnerlugit manna oqaluuserisimavarput, maannalu periarfissaalerpoq tamannalu tamatsinnut iluaqutaassaaq. Taamaattumik neriuutigaara kikkut tamarmik tunisassiavut tapersersussagaat. Eqqarsaatigeriarsiuk nalituut qanoq annertutigisut igiinnartarnerivut naleqarnerusunik pilersitsinata.
Taamaattumik tamanut kajumissaariniarpunga suleqatigiinnissamut ammaqqullugit, aallarnisaasoq kajumissaarivoq, neriuutigaluguttaaq pisortat suliniutip uuma iluaqutaa takusinnaassagaat pitsaasunillu atugassiinermikkut tapersersorlugu.
Ulloriaq Kreutzmann namminerisaminik Sisimiuni sanasutut suliffeqarfiuteqarpoq, Tupilak Constructionsitut tamanit ilisimaneqartumik. Sanasutut suliffeqarfiup qimminut nerukkaatissanik suliniut aningaasatigut tunngavalissavaa.
- Taamaattumik sanasutut suliffeqarfik ingerlaannassaaq, naak uanga qimminut nerukkaatissiuleraluartunga, oqaluttuarpoq.
Suliffeqarfik
Qimminut nerukkaatissanik suliffeqarfik taaguuteqassaaq Milak Productions, Ulloriaq aamma Paarma Kreutzmann aallarniisoralugit.
Ullumikkut suliffeqarfiup 60 procentia pigaat.
Wildfoodip 20 procentia.
Nalik Venturep 20 procentia.
Milak Productionsip ullumikkut killiffimmut pinissamut, Wildfoodikkut peqatiginissaat pisariaqarsimavoq, taakkulu Milak Productionsip ineriartornerani ingerlaqqinnissamut periarfissiisimallutik, Greenland Holdingimit tusagassiuutinut nalunaarummi allassimavoq.
Nalik Venturep aningaasaliinera piginneqataaneralu suliffeqarfiup tunisassiorfeqalernissaanut piviusunngortitsivoq.
Nalik Venturemiit Inoqut Kristensen, Investment Manager and Analyst, suliniut ullutsinni Kalaallit Nunaanni asseqanngitsoq pillugu ima oqaluttuarpoq: “Nalik Venturep Milak Productionimut aningaasaleerusussimaneranut pissutaaqataavoq, nutaaliornerummat
aammalu ajornartorsiutaasumut ajunngitsunngortitserusunnerummat. Aallarnisaasut aqqutaa tamaat tamanut pissarsiffiusinnaasumik eqqarsartuupput.
Pisisartumut qimmeqartumut piffissaq aningaasallu sipaarutaasinnaapput, piniartup tunisassiorfimmut tunisinissaminut allamik aningaasarsiuteqarnissaq periarfissarilissavaa, avatangiisinut iluaqutaassaaq, tunisassiorfiup asuli atugassatsiarsuit eqqaannarneqartussaagaluit atorluartassammagit.
Milak Productionsillu kisitsinerisa takutissimavaat, qimmit nerisassaat akimikkut unammillersinnaalluassasut.”
Milak Productionsip tunisassiorneq aallartippagu qimmit nerisassaat toqqaannaq pisisartumiit nittartakkatigut allatsinneqarsinnaassapput. Wildfoodip qimmit nerisassaat pisisartumut pisiarineqarsinnaasunngortissavai, tusagassiuutinut nalunaarummi allassimavoq.