Aaqqissuisuuneq innersuussivoq: Maani nunatsinni tunisinissamut pisussaaffivut naammassiniarlugit tamaviaarpugut

Arctic Prime Fisheriesimi siulersuisunut siulittaasoq Jørgen Wæver Johansen aalisarnermut naalakkersuisoqarfiup politiinut nalunaaruteqarniarluni sioorasaarutaa pillugu taama oqarpoq.

Aajuna Ilivileq nutaaq Qaqortumi sissiukkamiittoq. Kilisaat suliffissuaatigisoq saarulliit nerpiinik ineriikkanik tunisassiortarpoq. Saarulliit sinneri qajuusiassaliarineqartarput. Umiarsuarmi tunisassioriaaseq nutaaq aqqutigalugu aalisagaq tamakkerlugu iluaqutigineqartarpoq.

- Taakku 2.536 tonsit kingusinnerpaamik apriilip aallartinnerani tunereersimanissaat naatsorsuutigaarput, tassa imaappoq, allami tunisillutalu tulaassinnginnitsinni pisassat Kalaallit Nunaanni tuneqqaagassatut Naalakkersuisut piumasarisaat. Kisianni Islandimit avammut tunisinnginnitsinnit Kalaallit Nunaanni tuneqqaarnissaannut immikkut piumasaqaat kingusinaarluni takkuppoq, piumasaqaat januaarip arfernanni tigugatsigu kilisaatigut marluk aalisalereerput. Taamaammat taanna malissinnaanngilarput. Aammattaaq taamatut aalajangiisoqarneranut tunngavilersuinissamik noqqaassuteqarpugut, kisianni taanna pissarsiarinngilarput, Jørgen Wæver Johansen, ingerlatseqatigiiffik naalakkersuisoqarfiup politiinut nalunaarutiginissaanik sioorasaarineq pillugu taama oqarpoq.

- Sapaatip-akunnerata siualiani Sermitsiap saqqaani APF-ip akiliisinnaajunnaaratarsinnaaneranut tunngasoq soorunami tunitsivinni kilisaatinilu sulisutsinnut amerlasuunut ernumalersitsisorujussuuvoq, taanna nangilluni oqarpoq, pisassallu kissaatigineqartut ukiuni qaangiuttuni tunineqarsimasut uppernarsaataannik tunniussilluni, aammalu pissusissamisoortumik ukioq manna saarulliit tulaassassaatitaasut pillugit aalisarnermut pilersaarummik tunniussisoqartoq.

Kilisaat nutaaq nammineq tunisassiornissamut akuerineqartoq

- Kilisaat nutaaq Ilivileq 2019-imi Naalakkersuisunit akuerineqartoq, pingaarnertut nioqqutissanik piareeriikkanik, soorlu aalisakkap nerpiinik saaniaakkanik tunisassiornissamut sanaartorneqartoq, Naalakkersuisut naalakkersuisoqarfiullu nalunngilaat, taakkulu soorunami Islandimut avammut tunisassatut usingiarneqartarput, Island aalisarfinnut qaninnerummat. Kilisaataateqarfiit Tunumi saarullinniartut allat tamarmik taamaaliortarput. Piffissarmi aalisarnermut aningaasaqarnikkut piujuartitsinermullu ingerlatsinermut atorneqassaaq, assartuinermik ingerlatseqatigiiffiusaartoqarani, Islandimit Kalaallit Nunaannut umiarsuisartumik assartuisartumik nunatsinni ingerlatseqatigiiffeqareerpoq, Jørgen Wæver Johansen nassuiaavoq.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

- Kilisaatip nutaap aalisarnerani naalakkersuisoqarfimmit akuersissutit nutartikkat januaarip arfernanni pissarsiaraagut, taakku Naalakkersuisut decembarip 17-anni ataatsimiinnermit imaqarniliamit tunngaveqarpoq, Naalakkersuisut tassani tunisinissamut piumasaqaatit 2021-imi sukaterniarlugit aalajangerput, taanna nangilluni oqarpoq.

- Akuersissutinut piumasaqaatinik sukateraluni annertuumik aalajangiisoqartillugu, ulluinnarni ingerlatsinitsinnut sunniuteqartillugu nassuiaaffigineqartariaqarpugut, kisianni tunngavilersuutaanik pissarsinngilagut, decembarip 17-anni ataatsimiinnermit imaqarniliaq pissarsiarigatsigu aamma naamik.

- 2021-imi 1.300 tonsit sinnerlugit tunereerpagut. Taamaammat 2.536 tonsinik tunisinissamut pisussaaffeqarnermut immikkut piumasaqaat piaartumik aamma kingusinnerpaamik apriilip aallaqqaataani naammassissallugit neriorsuisinnaavunga, Jørgen Wæver Johansen Sermitsiamut oqarpoq.

Suliami qitiusoq

Januaarip arfineq-pingajuanni ukioq manna Arctic Prime Fisheriesip (APF) naalakkersuisoqarfik ukioq manna saarullittassat qanoq aalisarneqarnissaat oqaluttuarai, juulimilu tamakkerneqarnissaat naatsorsuutigineqartoq ilisimatitsissutigalugu.

Januaarip 12-anni naalakkersuisoqarfik pilersaarummik piumasaqarpoq, tassani APF-ip pisassiissutit 50 procentiisa imaluunniit katillugu 5.073 tonsit kalaallit tunisassiorfiinut qanoq tunineqarnissaat naalakkersuisoqarfimmut ilimanarsassavaa. Aammattaaq AFP 2021-mut aalisarnermut pilersaarummik nutartikkamik nassiussissaaq, ingerlatseqatigiiffiup tassani tulaassat annertussusaat nalunaarsorlugit, kiisalu sumut angallammillu sorlermik tulaassissanerlutik.

Tamanna januaarip 15-anni pivoq. Naalakkersuisoqarfillu tamatuma kingorna Naalakkersuisunut inassuteqarpoq, akuersissutinut immikkut piumasaqaatit aamma APF-ip tunisassianik piariikkanik nunanut allanut avammut tunisinnginnermini 2.536 tonsit nunatsinni tunisassiorfinnut tuneqqaarnissaanut aalajangerneq allanngortinneqartariaqartut.

Kisianni Naalakkersuisut januaarip 28-anni naalakkersuisoqarfiup inassuteqaataa malinneqassanngitsoq aalajangerput. Tamanna naalakkersuisoqarfiup Arctic Prime Fisheriesip januaarip 29-anni mailikkut nalunaarutigaa.

Februaarip arfineq-pingajuanni naalakkersuisoqarfiup nalunaarutigaa, Ilivileq nioqqutinik piariikkanik Islandimut usingiaajartussappat, tamanna immikkut akuersissutinut unioqqutitsinerussasoq, aammalu Ilivilip nioqqutissat piariikkat Kalaallit Nunaannut tunissappagit immikkut akuersissutinut unioqqutitsinerussasoq.

Naalakkersuisoqarfik Aalisarneq pillugu inatsimmi paragraf 33-imut innersuussivoq, tassani inatsit malillugu tunniunneqartumik imaluunniit inatsit malillugu malittarisassalerneqartumik akuersissutip piumasaqaataanik unioqqutitsisoq akiligassinneqartarpoq.

Pisat Kalaallit Nunaannut tunineqassasut suliarineqassasullu, naalakkersuisoqarfiup erseqqissaatigaa.

Nalunaaruteqarneq kingusinaartoq

Piumasaqaatit taakku malillugit ingerlatsineq tunisassiornerlu ingerlatseqatigiiffiup aaqqinnissaat angumerisinnaasimanngikkaa, Jørgen Wæver Johansen, Sermitsiamut ilisimatitsivoq.

- Aalisakkat nerpii saaniiakkat piareereersut Islandimit avammut tunisassagut kasiilersinnaanngilagut. Piumasaqaatit naammassineqarsinnaanngillat. Isertitat suliffeqarfiup ingerlanneqarnissaanut aamma Kujataani Tunumilu aalisartunut suliffinnik qulakkeerinninnissamik ineriartortitsinitsinnut atirfissaqartippagut.

- Nunatsinni Nanortalimmi Qaqortumilu tunisassiorfitsinni tunisassiornerup qulakkeerneqarnissaanut tunngatillugu pisussaaffigut malippagut, ukiorlu tamakkerlugu suliassaqartitsineq isumagaarput. Aalisarnermut pilersaarummi tunniussatsinni nunatsinni tunisassiorfinnut tunisinissaq qanoq qulakkeerneqassanersoq takutipparput, ukioq mannalu 50 procentinik tunisinissamut piumasaqaat malipparput, kiisalu aamma kingusinaalaarluta pisat 25 procentiisa nunatsinni tunisassiarineqarnissaannut piumasaqaatit sukaterneqartut malippagut, kisianni tunisassiat piareeriikkat Islandimut tulaateqqaartinnagit naammassisinnaanngilarput, taanna nassuerpoq.

2020-mi tunisineq

2020-mi tulaassinissamut pisussaaffik APF-ip naammassinngimmagu naalakkersuisoqarfik aamma isornartorsiuinikuuvoq.

- Ukioq 2020 corona pissutigalu kinguaattoorfiusoq ilungersunartorujussuuvoq. Kisianni tunisinissamut pisussaaffigut malippagut, aalajaatsumillu Kalaallit Nunaanni tunisassiorfinni sulisoqarnissaa qulakkeerlugu, Jørgen Wæver Johansen Sermitsiamut oqarpoq.

- Tunisinerit marluk pisut aamma nunami tunisassiorfitsinni suliffinnik tunisassiornermillu qulakkeerinnittut, naalakkersuisoqarfiup akueriumanngimmagit soqutiginartortaraa, ilanngullugu tamanna oqaatigaa.

- Tunisineq ataaseq ukioq manna Tasermiuneerpoq, taanna ingerlatseqatigiiffimmut Nanoq Seafoodimut nalunaarsorneqarpoq, APF-imik tamakkiisumik pigineqartoq, tamannalu Naalakkersuisut Arctic Prime Fisheriesimut ataatsimuulersinneqarsinnaaneranik akuerineqartoq, tamanna aamma 2020-mi pivoq. Tunisineq pimmat ataatsimuulernerat naammassivissimanngilaq, kisianni Naalakkersuisut ataatsimuulernissaq akuerereerpaat, APF-illu Nanoq Seafoodimit pisassat tigusinnaagaat akueralugu, Jørgen Wæver Johansen nassuiaavoq, kisianni tunisinerup nalaani ataatsimuulernerat pisortatigoortumik inissinneqanngimmat, naalakkersuisoqarfiup nassuiaruminaatsumik tunisineq APF-ip pisanik tulaassuinissamut pisussaaffianut ilaatillugu akueriumanngilaa.

- Tamanna tupigusuutigaara, tassami tunisassiorfiup aalisakkat pissarsiaraa, taakkulu pissusissamisut suliassanik pilersitsipput, taanna oqarpoq.

Tasermiut pisassaat ilanngullugit naatsorsorneqartariaqarsimasut, Jørgen Wæver Johansen tassunga atatillugu ilisimatitsivoq, ingerlatseqatigiiffiup ningittagarsuutaa 2019-ip naanerani unittoorsimanera angalaqqissinnaannginneralu pissutigalugu. Aalisarnitta aqunnernerani oqartussat tamakkununnga innimiginnittussaapput, tassami taamatut pisoqartarmat, taanna isumaqarpoq.

Pisat Reykjavikimi RAL-imut tunniukkaat

Tunisinerup aappaa tulaasinissamut pisussaaffilimmik pisanik tunniussinerminngaanneerpoq, taanna Tasermiunit Reykjavikimi pivoq, tassanngaanniik Royal Arctic Linep pisat Nanortalimmi tunisassiorfimmut assartorpai, tassanilu tunisineq naammassineqarluni.

- Kilisaataatitta Dohrn Bankemi aalisarluarnerminit pisanik tunisassiorfimmut angallassinissaanut sipaaruteqarniarluta taamaaliorpugut, Jørgen Wæver Johansen nassuiaavoq.

- Nassiussineq akisuvoq. Containerit 40 fodsit saarulliit Reykjavikimit Nanortalimmut nassiuppagut, suliassaqarneq qulakkeerniarlugu. Nassiussineq 700.000 koruuninik uagutsinnut akeqarpoq. Ingerlarnga uppernarsarsinnaavarput. Nanortalimmilu suliaqartoqarnissaa qulakkeerparput. Kisianni suna pissutigalugu pinerpoq naalakkersuisoqarfiup tunisineq taanna akueriumanngilaa. Naalakkersuisullu suliassaqarnissamik kissaataa pilersikkatsigut tupigusuutigaara, taamaaliorniarlutalu aningaasartuuterpassuaqarpugut, taanna oqarpoq.

- 2020-imi saarullittatsinnit tamakkiisunit 2.336 tonsit nunatsinni tunisassiorfinnut suliassanngorlugit tunisisimanerput aamma uppernarsarsinnaavarput, taakkulu tunisat 34 procentiinit amerlanerupput – naak 2020-imi piumasaqaat 25 procentiinnaagaluartoq. Tamannalu nunatsinni 2020-imi nunami suliani saniatigut ukiumut 60-inik sulisoqarnissamik qulakkeerinnippoq, naak kinguaattoortoqarlunilu corona ajornartorsiortitsigaluartoq, Johan Wæver Johansen nassuiaavoq.

Assigiinngisitsineq

Nunatsinni aalisarnerup allaffissornikkut assigiinngisitsiffiusarnera aamma taassuma tupigusuutigaa. Ingerlatseqatigiiffiit sinneri saarullinnik malunnaatilimmik pisassaqarnerulertut, tunisinissamut pisussaaffimmik piumasaqaateqarfigineqanngillat, tamannalu APF-ip assinganik qaffaaffigineqannginnerani pivoq. Naalakkersuisut 2020-mi oktobarimi Kitaani avataani qaleralinniarnermi tunisinissamut pisussaaffeqarneq taamaatikkaa maluginiagassaavoq, naak qaleralik saarullimmit nalitunerugaluartoq.

- Inatsimmi naligiisinneqanngilagut. Ingerlatseqatigiiffiit sinnerit uagutsinni malunnaatilinnik atugaqarlutillu sinaakkuteqarput, tamanna paasisinnaanngilara, Jørgen Wæver Johansen oqarpoq.

Tunumi saarullinniarnermi APF-ip 2014-imi pisassat 91 procentii tigummivaat. Ingerlatseqatigiiffillu 2020-mi kilisaat angisooq Ilivileq Naalakkersuisut 2019-imi akuersinerisigut pissarsiarimmagu, APF suli annertuumik 70 procentit tigummivaat, kisianni 2021-mi pisassaat 50 procentinut appariarput. Ingerlatseqatigiiffiillu sinneri pisassaat procentinik hunnorujulikkaanik qaffakkiartortut, APF-ip saarullittassaasa qaffariaataat 2-3 procentiinnaapput, tamatumalu peqatigisaanik Tunumi APF-ip qaleralinniarnermi pisassanit tamakkiisunit procentitigut appariangaatsiarput. Naak uagut kisitta Tunumi saarullittassatsinnut tulaassinissamut pisussaaffilerneqarluta, kisiartaallutalu Nanortalimmi, Qaqortumi Tunumilu Kuummiuni tunisassiorfitsinni suliffinnik tunisinissamullu qulakkeerinnittuulluta, siulersuisunut siulittaasoq taama oqarpoq.

- Kujataani Tunumilu tunisassiorfiit ingerlallugillu ineriartortissinnaajumallugit isertitaqartariaqarpugut, taakkulu tunisassiatsinnik piareeriikkanit avammut tunisassiatsinnik pissarsiarisarpagut, taakku toqqaannartumik avammut tunisarpagut, ingerlatseqatigiiffiit Tunumi saarullittassaqartut iliuusaat assigalugit.

- Ilivilermi saarulliup nerpii saaniiarlugit tunisassiarineqaraangata, saarullik tamakkerlugu atorluartaripput aamma naqissuserusupparput. Siornatigut igitassaasartut ullumikkut aalisakkanik qajuusaasialiornermut, aalisakkanit uulianut migasinullu tunisassiornermut atorneqartarput. Aalisakkanik qajuusaasiat Kujataani savaatilinnut tuninissaat naatsorsuutigaarput, taamaalilluni nunarput tassani imminut pilersortunngussaaq, taamaalillunilu aalisakkanik qajuusaasiat eqqunneqartarnerat sipaarfiulluni, Jørgen Wæver Johansen ilisimatitsivoq.

Powered by Labrador CMS