Aaqqissuisuuneq innersuussivoq: Maani inoqanngeqaaq
Aasaanera aallartilluarfiusussaagaluartoq akunnittarfimmut nutaamut Hotel Ilulissanut aningaasaqarnikkut ajornartorsiutaalerpoq.
- Inoqanngeqaaq. Inniminniisoqanngingajavippugut. Taamaattumik ullormut ataasinnguamilluunniit inniminniiffigineqarutta tamanna nuannaarutigissavarput, Hotel Ilulissat pisortaanerat Karl Sandgreen oqarpoq.
Takornarianik qallunaanik nunanilluunnit allaneersunik aammalu Kalaallit Nunaannit angalasunik juunimi, juulimi aggustimilu, akunnittarfinnut takornarianullu ulapiffiusaraluartuni, inissamik inniminniisoqanngingajavissimavoq. Minnerunngitsumik Qeqertarsuup Tunuani, Kalaallit Nunaanni takornariaqarfiunerpaasartumi.
Karl Sandgreenip ersissutigaa Hotel Ilulissat aasaanerata annersaani inoqanngingajavittassasoq. Tamanna akunnittarfimmut nutaamut ingerlatsinermi aningaasaqarniarnermut sakkortuumik eqquissaaq.
Taassuma oqaatigerusunngilaa akunnittarfimmi inoqanngingajattumi ingerlatsinikkut amigartoorutit qanoq amerlatigissanersut naatsorsuutiginerlugu.
- Ullormi ammarfissatsinni juunip 15-iani taamaallaat ilaqutariit pingasunik inuttallit Nuummeersut akunnittarfimmi inissamik inniminniisimapput, Lars Sandgreen Sermitsiamut sapaatip-akunnerata ataatsip matuma siornatigut paasissutissiivoq.
Taanna akunnittarfiup nutaap Hotel Ilulissat, marlunngorpat ammartussap, pisortaraa. Akunnittarfik tallimanik qulereeqarpoq 78-inik initaqarluni, ataatsimiittarfeqarluni ataatsimeersuartarfeqarlunilu kiisaalu neriniartarfeqarluni. Init marluk suiteupput 50 kvadratmeterit missaannik angissusillit.
- Neriuutigisimagaluarparput inniminniisorpassuaqassasoq. Nunarsuarli tamakkerlugu takornarialerinermik ingerlatsiviit namminersorlutik oqartussat coronamut pissutsinut qanoq oqassanersut nakkutigaat. Taakkualu oqaaseqarpiarneq ajorput, Karl Sandgreen nassuiaavoq.
Nalunaarutigineqartartut ima ersarinngitsigat takornariat qallunaat nunanillu allaneersut Kalaallit Nunaannukarusunnatik, taanna tikkuaavoq.
- Kingullermik Nuummi coronamik tunillatsittoqarmat inniminniinerit univillutik unipput. Tamanna peqatigalugu Kalaallit Nunaanni coronamik killilersuinerit suliniuteqarnerillu nalorninartinneqartorujussuupput. Taama nalorninartorsiortoqartigitillugu ininik inniminniiumasoqanngilaq, akunnittarfiup pisortaa oqarpoq.
Qatanngutigiit Frank aamma Tommy Baggerikkut Jens Friis Salling peqatigalugu Hotel ilulissat pigaat, taassumalu sananeranut atortulersorneqarneranullu 100 millioner koruunit sinningaatsiarlugit aningaasaliissuteqarsimapput. Tamanna peqatigalugu akunnittarfeqatigiinnut Best Westernimut ilaapput, allaammi Best Western Plusitut taaneqarlutik.
Kalaallit Nunaannili akunnittarfiit kisimik ajornartorsiunngillat. Tassami Europami angallannerit ammariartuleruttorneranni Københavnimi akunnittarfinnut inniminniinerit assersuutigalugu siorna aasakkut inniminniinernit suli ikinnerupput, taamatut oqaluttuarpoq DR.dk.
Maajip naanerani Københavnimi akunnittarfinni ininik 2021-mi juunimut juulimullu inniminniinerit 2019-imi piffissamut tassunga, tassa coronap nunarsuarmi tuniluutilinnginneranut, sanilliullugit 88 procentinik ikinnerupput.
Visit Greenlandip siulittaasua, akunnittarfiup pisortaa Anette Lings, isumaqarpoq Danmarkimi nunatsinnilu akunnittarfiit sanilliunneqarsinnaanngitsut.
- Tassami Kalaallit Nunaanni akunnittarfiit attaveqaatit ilagaat, taanna oqarpoq.
Kalaallit Nunaanni akunnittarfiit 2020-mi aatsaat taama ukiulutsigisimapput. Taamaalilluni Ilulissani Hotel Arctic kaaviiaartitanit 28 millioner koruunit missaanniittunit akileraarutit suli ilanngaatiginagit 13 millioner koruuninik amigartooruteqarsimavoq.
Nappaat tuniluuttoq tamatumunnga pissutaavoq, taannalu pissutigalugu pikkorissarnerit ataatsimeersuarnerillu amerlasuut taamaatiinnarneqarsimapput, kiisalu takornarialerisunit inuinnarnillu inniminnigarpassuit taamaatiinnarneqarsimallutik.
Massakkorpiaq takornariat suli immikkoortinneqartarput tikinnerminnit ullut aappassaanni misissortinnissamik tungaanut. Taavalu misissortinnermik akissutissaa utaqqissavaat, taannalu akunnerit 72-it angullugit sivisutigisinnaavoq. Tassa imaappoq, takornariat ulluni pingasuniit ullut tallimat angullugit mattussaaqqasinnaapput.
Anette Lings, Hotel Sisimiuni pisortaq piginnittorlu, oqarpoq, aasaanerani akunnittarfimmi inissanik inniminniisoqangaatsiarsimasoq.
- Maannangaaq juulimut inniminniinerit, 2019-imi piffissamut tassunga inniminnikkat 60 procentiisa missaanniikkunarput. Amerlasuulli nalunartoqarput. Ilisimanngilarpummi naggataatigut inuit inniminniinertik taamaatiinnassaneraat. Pissutsit pissangalaarluta malinnaaffigaavut. Ilisimarpianngilarpummi qanoq pisoqassanersoq. Takornarianilli nunanit allaneersunik akunnittarfimmut inniminniisoqarnavianngilaq, ulluni tallimani mattussaaqqassagunik. Taamaattumik nunagisap iluani angalasut kisimik takkutissapput. 2021 ukioq takornariaqarfiunavianngilaq. Tamanna ukiup aallartinneranili ilisimareersimavarput, taamaattumik uagutsinnut tupaallaataanngilaq. Ukioq manna imatorsuaq nittarsaassisimanngilagut, Anette Lings oqarpoq.
Visit Greenlandimit kisitsisit kingulliit takutippaat coronap ajornartorsiutaanera takornariaqarnermik ingerlatsisunut 2020-mi 400 millioner koruuninik akeqarsimasoq. Taamaalillutik nunaliarlutik takornariat 70 procentimik ikileriarsimapput.
EU-mi innuttaasut amerligaluttuinnartut coronamut akiuussutissamik kapineqarsimapput, Europamilu ataatsimoortumik coronamut passi atugaangajalerpoq. Taanna atorlugu killeqarfiit qaangerlugit angalaneq takornarianut ajornannginnerulissaaq. Qallunaat corona-passiat nunanut allamiunut aamma immikkoortortaqarpoq.
Kalaallit Nunaanni maanna malittarisassaalerpoq tikeraat akiuussutissamik kapitinneqarsimasut tikinnermik aqaguani misissorneqartassasut, taamaalillutillu tikittut kapitissimasut ulluni tallimani mattussaaqqasarunnaarlutik.
Ajoraluartumilli qallunaat corona-passianni nunatsinni kapitissimasoqarnersoq takuneqarsinnaanngilaq, Kalaallit Nunaallu nammineq corona-passimik ineriartortitsisimanngilaq.