Skip to main content

Aaqqissuisuuneq innersuussivoq: Kunngeqarfik Siumut kunngissaqanngitsoq

Siumumi politikerit arfineq-marluk Kielsen unammilleramikku sapiillisaarput. Qungujutsitsiniartartut atsersimavaat »Inuarullikkat arfineq-marluk«. Maanna taakkua qanoq pilersaaruteqarpat?

Kim Kielsen tatineqaleraangami sorsunnissamik oqalulertarpoq:

- Benziina dunki assamma illuanik tigumiarpara aappaanillu ikitsit tigumiarlugu, taamatut oqarsimaqqooqaaq – allatut isummerlugu – ukiualuit matuma siornatigut Siumup gruppiani ataatsimiinnermi, sunaanerpoq kamaatigisimallugu.

Eqqisseqqippoq, sakkortuumik oqariaqqinngilaq, kamariataarsinnaaninili takutippaa.

Naatsorsuutigisariaqarpoq Siumumi pikitsitsisut arfineq-marluk, Siumumi Naalakkersuisunilu siulittaasutut tunuarnissaannik piumasaqarsimasut, ilisimasimassagaat angut imaasiallaannaq tunniutiinnarneq ajortoq saassullugu. Kielsen soriataartartuuvoq. Nagguaatsutullu eqqaamallaqqitsigaaq.

Taamaattumik apeqqutaavoq taakkua arfineq-marluk siumut siunersiuisimanersut partiillu tunuliaqutaanit tapersersorneqarlutik qulakkeersimaneraat. Tamanna paasinarsissaaq sapaatip akunnerata uuma ingerlanerani, Siumup immikkoortortaqarfiisa siulittaasoq naleqquttuunersoq isumartik allakkatigut partiip allattoqarfianut nalunaarutigippassuk.

Tamatumuuna paasinarsissappat »inuarullikkat arfineq-marluk« (ilaasa taama atsersimagamikkit) taakkua parteeqamminnit taperserneqanngitsut, periataapajaaginnarlutillu iliuuseqarsimasut, aap, taava kiserliortorujussuanngoratarsinnaapput.

Akeraq imaannaanngitsoq

Comeback-Kielsenip siusinnerusukkut uppenarsareersimavaa pissutsit pinarsigaangata inuit katersorsinnaallugit. Sianeqattaaleraangat, inuit tuiisigut pattalaarlugit inussiarnersumillu oqallorissaaleraangat angut uppitikkuminaattarpoq.

2014-imi ukiakkut partiimi siulittaasunngormat (Aleqa Hammondip anisitaanerata kingorna), Siummumik pilersitseqataasup Lars-Emil Johansenip tamaviaarluni inangerniaraluarpaa. Tamanna iluatsinngilaq. Kielsen 46-nik taaneqarpoq, Lars-Emiili 18-inik taaneqartoq.

Tamanna peqatigalugu sapiillisaartut marluk iluatsitseriarput – Dorte J. Jensen aamma Nick Nielsen. Inuusuttutut sapiillisaarnertik pillugu akilerneqanngillat, tamarmilli marluinnarnik taaneqarlutik; immaqa tamanna eqqaamassallugu ilinniutissaavoq politikerimut aamma misilittagaqarpallaanngitsumut Erik Jensenimut, taanna ulorianartumi inissisimalluni – Naalakkersuisunut ilaasortatut – Inatsisartunut ilaasortat naammaginninngitsut arfinillit isumaqatigalugit peersitseriaaqataagami.

Aamma Vittus Qujaukitsoq sapiillisaariaraluarpoq aarsat marluk matuma siornatigut Kielsen unammilleramiuk. Taanna 19-iinnarnik taaneqarpoq, Kielsen 48- nik taaneqartoq, tassa taasinerit, 2014-imi taasinermi angusanut tupinnaannartumik assingusorujussuit. Tassuunakkut malunnarpoq Kielsen partiimi aalajangersimapajaartunik tapersersorteqartoq. Taakkualu amerlaqaat.

Hermann: Sassarnianngilanga

Siumup oqaluttuarisaanerani pissaaneqarniuttarneq takornartaanngilaq. Lars-Emil Johansen Jonathan Motzfeldtilu unammisarsimapput. 1987.imi upernaakkut Juuntaat Kujataanukarsimavoq apersortitsiartorluni, taamaasineranilu Nuummi terlinganit inangerniarneqarpoq. Siulersuisuunerit ataatsimiikkasuariaqqusaapput ataasiinnaq oqaluuserissallugu – kaliffip kaliffi alla taarsissavaa.

Juuntaap pilersaarutit tusaramigit Nuummut uterpoq siulersuilerlunilu. Ullut tulliuttut ingerlaneranni pissutsit mumisippai siulittaasutullu ataannarluni. Qaammatialuilli qaangiummata tamaanga killeqarpoq. Qaqortumi ataatsimeersuarnermi Lars-Emil Johansenip Juuntaat ajugaaffigaa partiimilu siulittaasunngorluni, pissaanerli imatut avillugu, Juuntaat naalakkersuisuni siulittaasutut ingerlaannarluni.

Taamanikkornit ullumikkumut pingaartumik ataatsimik assigiinngissuteqarpoq: Juuntaat unammillerneqarami partii nukittuumik kronprinseqarpoq. LarsEmil Johansen iliuatsitaarillaqqissuusimavoq. Ullumikkut pissutsit taamaanngillat. Siulittaasussamik qularnanngitsumik peqanngilaq. Ersarissumik normu 2-qanngilaq.

AG-p Siumukkormiu borgmesteriusimasoq Hermann Berthelsen aperisimavaa Siumumi siulittaasutut imminut takorloorsinnaanersoq:

- Naamerluinnaq, Hermann Berthelsen akivoq, taannalu Siumumut ilaasortat arfineq-marluk ilagaat Kim Kielsenip partiimik aqutsineranik apeqqusiisut.

- Taamaattumik siulittaasunngorniassanngilatit?

- Aap, siulittaasunngornianngilanga, Hermann Berthelsen naqissusiivoq, tamannalu oqaaseqarfigeqqikkusunngilaa.

- Taamali uissuumminartigisumik saqqummiussigassi innuttaasut pisariaqartinngilaat sassarnissarsi sukumiinerusumillu nassuiaateqarlusi?

– Gruppip oqaaseqartartuanik toqqaasimavugut, taannalu tamatta sinnerluta oqaaseqartassaaq. Taamaattumik annertunerusumik oqaasissaqanngilanga. Kikkut tamarmik oqaaseqassappata tukattorujussuanngussaaq, taanna akivoq.

Akerliusut ilaat, Naalakkersuisoq Erik Jensen AG-mut akissummini nangaaneruvoq.

- Siulittaasutut qinigassanngortillunga sassarnissannik kajumissaarneqarsimanersunga? Tamanna akisinnaanngilara. Taamanikkussamut takujumaarparput, taanna akivoq.

- Naalakkersuisut siulittaasuattut Kielsen naalagaraat sulisitsisoralugulu. Tamanna tunuliaqutaralugu immikkut ittoorpasippoq matumani peqataagavit. Qanoq isumaliorsimagavit?

- Aap, soorunami pissutsit immikkut ittuupput. Kielsenili aperiniaruk qanoq iliorniarnerluni isumaliornersoq. Allamik oqaasissaqanngilanga, ajoraluartumik, Erik Jensen akivoq.

Kim Kielsen Sermitsiamut uppenarsaavoq Erik Jensen allalluunniit namminerminik akerliliisimasut pillarniarnagit. Jensenili issiaannarsinnaanerminut qularinnippallaassanngilaq. Kielsen ilioriartaarsinnaasarpoq, sukkasuumik qajassuussiunnaarsinnaavoq sakkortuuliorlunilu; tamanna assersuutigalugu takutissimavaa Nick Nielsenimut atatillugu (Folketingimit »angerlartitaasoq«) Aleqa Hammondimullu atatillugu (anisitaasoq).

Nunap immikkoortuinut politikki

AG-p paasivaa pikitsitsiniartut piffissap ingerlanerani isornartorsiuinertik akunnerminni saqqummiunniarsimagaluaraat. Siullermik qinnutigisimavaat iluminni siulersuisuunerit ataatsimiinnissaat, kingornalu partiip allattoqarfia aqqutigalugu Kielsenimik qularuteqarnertik partiip immikkoortortaqarfiinut ingerlateqqinniarsimagaluarpaat. Naggataatigut allamik periarfissaarussimagunaramik toqqaannartumik tusagassiorfinnut saaffiginnipput.

Tusagassiorfinnut nalunaarutimikkut pisimasut arlallit naammaginagit allapput, ilaatigut pisassiinernik isumaqataannginnertik. Akerlianik mittarfiit sammerpianngilaat, qularnanngippasipporli aaqqiagiinnginnermi aamma – nunap iluani politikkimi allarpassuit assigalugit – nunap immikkoortuini soqutigisat pineqartut.

Erik Jensen Hermann Berthelsenilu marluullutik Sisimiunit aallaaveqarput, tunuliaquttaminnillu tatineqarput pakatsimasunit Nuuk ilulissallu attaveqaasiornermi milliardillit pissammatigit, Kangerlussuaq tunulliunneqartoq.

Aalassassimaarneq pileruttortoq Kim Kielsen nalunaarpoq siulittaasutut qinigassanngorteqqinniarnani, qinigaaffik maanna atuuttoq naappat. Nalunaarut tamanna ilisimannittunit tupaallaatigineqanngilaq. Kielsen sivisuumik oqartarsimavoq siulittaasutut ingerlaqqikkusukkunnaarluni. Akerlianik qinigaaffik naallugu Naalakkersuisut siulittaasuattut ingerlaannassanersoq apeqqutaavoq ammasoq. Aaqqiissutissatulli toqqarsinnaavaa 1987-imi »Juuntaap periusia«, taamani Lars-Emiili partiimi siulittaasunngormat Juuntallu naalakkersuisut siulittaasuattut ingerlaannarluni.

Aamma imaassinnaalluarpoq taamatut nalunaaruteqarsimanini peqqissimissutigaa, pissutsinik tatineeqalaarnermi nalaani pimmat, sassaqqillunilu »amerlasuunit kajumissaartinnermi kingorna«. Politikkimi suut tamaasa naaneqareertinnagit aalajangiisoqarneq ajorpoq.

Soorlu tuluttut oqartartut: it is not over until the fat lady sings!

Aviisi AG uani pisiariuk:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER