KL

DK

Aaqqissuisuuneq innersuussivoq: Kulturip illorsuassaa arfeq titartarneqartoq

Kommuneqarfik Sermersooq Nuussuup pinnersarneqarnissaanut Nuummi innuttaasunit siunnersuutinik pissarsiorsimavoq. Liam Jobey sanaartugassatut siunnersuummik anguniagartuumik nassiussisimavoq

Jette Andersen

Naluttarfiup Maliup eqqaaviani pappiara A4 eqqaaviup matuanut saviminiusumut nipitinneqarsimavoq. Oqaatsit amerlanngillat, titartagarli tiguartinnarluni. Allamik allassimasoqanngilat taamaallaat allassimammat BOW HALLEN NUUSSUAQ aamma DR-kode atorlugu isumassarsiaq taperserlugu taasisoqarsinnaasoq. Naqqani naqinnerit mikisuararsuit atorlugit allassimavoq, suliniut qarasaasiakkut ujaasissummi aamma ujarneqarsinnaasoq.

Paasinarsivoq taanna tassaasoq Liam Jobeyip Kommuneqarfigami, Kommuneqarfik Sermersuumi sanaartukkatigut suliniutinut tapertaasumi, innuttaasutut siunnersuutaa.

Aaqqissuisuuneq innersuussivoq:

Allaaserisaq una aviisimit AG-mit tigusaavoq, aaqqissuisuunermit Christian Schulttz Lorentzenmit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Nammineerluni innuttaasut siunnersuutini siammartersimavaa ilaatigut bussit unittarfiinut aamma eqqaavinnut. Inuit pappiaramik takunninnissaannik ilimanaatilinni.

Taassuma siunnersuutaa, Nuummi Najukkami Ataatsimiititaliamit maanna suliarineqartoq, sanaartornissamik siunnersuutaavoq anguniagartooq, inuttaata oqarneratut, kommunimilu suliniummut pingaarnermut Nuussuaq peqatigiiffigisigumut ilaalluni. Tassa Nuummi illoqarfiup immikkoortortaanut. Ilaatigut inissiarsuit igaanni qalipakkat arlallit.

Isumassarsiaq tassaavoq Nuummut, Nuussuarmut aamma Qinngutsinnut kulturikkut qitiusoqarfissaq innarluutilinnut naleqqussagaq, arfivittut, tuluttut bowheadimik taaguuteqartumut, ilusilersorneqartussaq, taamaammallu BOW hallenimik taaguuteqartoq,

tassanilu niaquata nalaa marlunnik quleriiussalluni. Taassuma takorloorpaa nerisaqarfeqassasoq, nerisassanik najukkami tunisassiaannarnik sassaalliuteqarfiusartussatut eqqarsaatigineqartumik, inini allerni kulturimut tunngasunik ingerlatsisarfeqassasoq assersuutigalugu tusarnaartitsinernik imaluunniit oqalugiarnernik, ininilu qullerni atuakkanik atorniartarfeeraqassasoq, nipaallisimaartarfimmik caféqassasoq allaffeqassasorlu attartortinneqartussanik. Sarpiata tungaata, init alliusussat, najukkami eqqumiitsuliortunut atuakkiortunullu saqqummersitsisarfiunissaa siunnersuutigaa. Siunnersuut piviusunngussappat inuttaata naatsorsuutigaa, suliffissanik 50-it angullugit amerlassusilinnik pilersitsiviusinnaassasoq assersuutigalugu aalisartunut nunamiittunut inunnullu isumaginninnikkut ajornartorsiutilinnut ullormi ataatsimi sulinissamut periarfissaqarfiusumik.

- Siunnersuut anguniagartuujuvoq, pingaartumik piffissami maanna atukkatsinni, nunarsuarmi aningaasaqarnerup aalassatsinneqarfigisimasaani, taamaakkaluartorli siunissami ungasinnerusumi inuit sunut aningaasaliinissamik eqqarsaatiginninnissaata pingaaruteqarfigisaani. Siunissami ungasinnerusumi ilimagaara kommunimut isertitaqarnikkut periarfissanik pilersitsisinnaassasoq suliffissaaleqinermullu iluaqutaasinnaassasoq, oqarpoq.

Siunissaq aalajangeriigaq

31-nik ukiulik qallunaaq tuluk Liam Jobey, aappani Norgemioq, peqqissaasoq 25-nik ukiulik, Hege, peqatigalugu Nuummut apriilimi nuuppoq. Liam tamanna

sioqqullugu ukiuni pingasuni Naapiffimmi, Københavnimi Kofoeds Skolep kalaallinut atugarliortunut naapittarfiutaani, sulisimavoq.

Arfermik titartagaq Naapiffimmi sulinermini ukiut marluk matuma siornali titartarsimavaa.

- Issiarujoorpunga titartaasaqattaarlungalu, eqqarsarpungalu illu arfertut ilusilik kusanassagaluartoq, taamaammat sissaq sinerlugu inissisimaffilerlugu titartarpara, kisianni eqqarsaatersuutaannaavoq. Taava Nuummut nuuppugut Maliullu (naluttarfiup, aaqq.) eqqaani najugaqalerluta, taassumalu eqqaani nunaminertaq takuara eqqarsarlungalu, arfermut inissisimaffissaqqissuusoq. Taamaattumik titartagaqqaatiga ukiunik marlunnik pisoqaassusilik uterfigaara, oqaluttuarpoq, sinerissallu titartarsimasami naluttarfiup eqqaanut assingunera takugamiuk tupaallassimanerarluni.

Kommuneqarfiga:

Kommuneqarfiga Kommuneqarfik Sermersuumi tamarmi innuttaasunik akuunerulersitsiniarnermi qarasaasiakkut sakkussaavoq kommunimilu timikkut suliniutinut, assersuutigalugu innuttaasunik ataatsimiititsinernut, tapertaalluni. Kommuneqarfigami kommunimi innuttaasut suliniutinut sammisanullu peqataanissamut periarfissaqarput. Tamakkua tassaasinnaapput meeqqanut ilaqutariinnullu politikki nutaaq, illoqarfiup pilersaarusiorneqarneranik sulinitit, periusissatigut ingerlatsinerit, missingersuusianut pingaarnersiuinerit allallu. Innuttaasut tassa aallaavik nutaaq taanna aqqutigalugu suliniutinut maannakkorpiaq kommunimi ingerlanneqartunut siunnersuutiminnik, ilanngussassaminnik oqaaseqatigerusutaminnillu saqqummiussinissamut periarfissaqarput.

Najoqqutaq: Anna-Sofie Hurup Skjervedal, PhD, Kommuneqarfik Sermersuumi Siunnersorti aqutsisuusoq (innuttaasunik peqataatitsineq).

Kommuneqarfik Sermersooq suliniummik »Nuussuaq peqatigiiffigisigu«-mik suli pilersitsinngitsoq titartakkani ineriartorteqqippaa.

- Taamaammat suliniut saqqummiunneqarmat allaanngivippoq siumut aalajangeriigaasimasoq. Taava illup sunik siunertaqarnissaa eqqarsaatigalugu aallartippara, oqarpoq.

Liam ataatami Illersornissaqarfimmi atorfeqarnera pissutigalugu nuttartorujussuujuaannarsimavoq, taamaammat angerlarsimaffiup maannakkorpiaq sumiiffigisamiinnera inuttaanut ilaalluinnarpoq. Sumiiffigisanilu tamaasa 100 procentimik tunniusimaffigisarpai. Taamaammat qanimut najugaqarfigisaminut aatsaat siullermeerluni akuulinngilaq. Ilaatigut Nuummi katersugaasivimmi Nuuk Lokalmuseumimi marlunngornerit tamaasa unnukkut titartaatitsisarpoq taavalu nipilersortarluni. Piginnaanini tunngavigalugit inuiaqatigiinnut tunniussaqarniarsarisarpoq.

- Misigisimavunga tunniussaqarsinnaallunga, ajornanngippalluunniit naasussamik immaqa ikkussillunga, kingorna angisuunngorsinnaasumik, oqarpoq.

AG uani pisiariuk:

kulturi
Powered by Labrador CMS