Skip to main content

Aaqqissuisuuneq innersuussivoq: Kommunit Namminersorlutillu Oqartussat ajunngitsorsiassiissutit annertuut pillugit paasitinneqarsinnaatitaaneq akuerisariaqarpaat

Tusagassiortut kommunini Namminersorlutillu Oqartussani aqutsinermik suliaqartut soraalerneranni pissutsit pillugit paasitinneqarsinnaatitaanermik qinnuteqaraangata paasissutissat isertuunneqarsinnaanngillat, ombudsmandi isumaqarpoq. Tamanna Lars Møller Sørensenimut suliap kinguneraa.

Inatsisartut ombudsmandiani inatsisilerinermut pisortaq Kim Blokbo ersarissumik isumaqarpoq Kommuneqarfik Sermersuumi kommunaldirektøriusimasup Lars Møller Sørensenip soraalernermini 1,5 million koruunit missaannik ajunngitsorsitinneqarsimanera pillugu suut ombudsmandip suliami oqaaseqaataasa kingunerineraat.

Aalajangiinerup kinguneraa Namminersorlutik Oqartussat kommunillu siunissami aqutsinermik suliaqartut soraalerneranni pissutsit – nalinginnaasumik ajunngitsorsititserujussuarnermik taaneqartartut – pillugit tusagassiorfiit paasitinneqarsinnaanissaat akuerisassagaat, ombudsmandimi inatsisilerinermik pisortaq oqarpoq.

- Matumani ombudsmandi ersarissumik isummersimatillugu, taava ombudsmandi ima isumaqarpoq, siunissami assersuutigalugu tusagassiortut paasitinneqarsinnaatitaasut, soraalernerni periuserineqartut takusinnaanissaannik qinnuteqaraangamik. Soraalernermi pissutsit tamarmik aallaavittut pineqarput, pineqartoq soraalersoq pisortaasimappat pisortaasimanngippalluunniit, tamanna Namminersorlutik Oqartussani imaluunniit maannakkut pisumi kommunimi pisimappat, Kim Blokbo oqarpoq.

Kommuneqarfiup Sermersuup Sermitsiami tusagassiortup qullersaasimasup soraarnermini ajunngitsorsiassaa pillugu paasitinneqarsinnaanissamik qinnuteqaataata itigartinnissaanik aalajangiinera isornartoqarpoq.

Taama Inatsisartut ombudsmandiat maajip 17-ani aalajangiinermini juunip 10-ani tusagassiuutinut nalunaarutigineqartumi allappoq.

Taamaalilluni Kommuneqarfik Sermersooq ombudsmandimit ersarissumik paatsuugassaanngitsumik isornartorsiorneqarpoq Sermitsiaq kommunaldirektøriusimasup Lars Møller Sørensenip soraalerluni ajunngitsorsitinneqarnera pillugu paasitinneqarnissaminik qinnuteqarmat. Ombudsmandip oqaaseqaateqarnerata kinguninngua kommunip Sermitsiami sulisoq Lars Møller Sørensenip soraarnermini ajunngitsorsiassaa 1,5 million koruuningajaat pillugit takunnissinnaalersippaa.

Aamma sanaartornermut avatangiisinullu pisortaasimasumut Hans Henrik Winther Johannsenip soraalernermini ajunngitsorsiassaa 1 million koruuninit amerlanerulaartut takusinnaatinneqalerput. Paasitinneqarsinnaatitaaneq pivoq kommunip ombudsmandip oqaaseqaataa tusaatissatut tigummagu.

Tamanna tallimanngornermi juunip 10-ani Kommuneqarfik Sermersuup assuarineqarnera pillugu allaaserisami allaaseraarput: Ombudsmandip illoqarfiit pingaarnersaat isornartorsiutaa.

Ombudsmandi isumaqarpoq kommunaldirektøriusimasup soraarnermini ajunngitsorsiassaa pisortat ammasumik ingerlatsinissaat pillugu inatsimmi ilaatinneqartoq.

Kommuneqarfik Sermersuup qinnuteqarneq ima paasillugulu suliaraa soraarnermi ajunngitsorsiassat inatsimmi ilaanngitsut, inuit ataasiakkaat pillugit paasissutissaammat ilaatigut aningaasaqarnermut pissutsit pineqarlutik.

Kommunimi isumaqartoqanngilattaaq Lars Møller Sørensenip soraarnermini ajunngitsorsiassai pillugu paasititsisoqarsinnaasoq, ”inuinnaat pisortallu soqutigaat pillugit pissutsit immikkut ittut isertuunneqartariaqarmata”.

Tamannali ombudsmandip isumaqatiginngilaa.

- Soraarnerup ingerlasimanera pillugu paasitinneqarsinnaanermi kommunaldirektørip aningaasaqarnera pineqanngilaq, taamaallaat aningaasat qassit pineqarnersut, inatsisilerinermut pisortaq oqarpoq.

Pisortat ingerlanneqarnerat pillugu paasitinneqarsinnaatitaanermi ilaasoq

Ombudsmandip nalilerpaa Lars Møller Sørensenip soraarnermini ajunngitsorsiassai pillugit paasissutissat pisortat ingerlanneqarnerat pillugu paasitinneqarsinnaatitaanermut inatsimmi ilaasoq paasissutissamilu kommunaldirektøriusimasup nammineq aningaasaqarnikkut atugai pineqaratik. Taamaattumik paasitinneqarsinnaatitaanermi namminerisaminik aningaasaqarneranik imaqanngilaq, ombudsmandi oqarpoq.

Kommuneqarfik Sermersuup Sermitsiap paasitinneqarsinnaanissamik qinnuteqaataanik itigartitsinermi maalaaruteqarneq pillugu ombudsmandip oqaaseqaataa siunissamut tikkuussisuua?

- Aap, siunissami taamatut ittumik pisoqarpat ombudsmandi taamatut isumaqassaaq. Siusinnerusukkut oqaatigineqareersutut Namminersorlutik Oqartussat kommunillu immikkoortinneqarneq ajorput. Soraarnerup ingerlanneqarnerani paasitinneqarsinnaatitaanermi paasissutissaq tunniunneqarsinnaassaaq. Ombudsmandip naliliinera tassaavoq soraarnerup ingerlanneqarnerani pissutsit takunnissinnaanermit ilaatinneqassasut – annermillu pisortatut atorfinnit inuit ataasiakkaat sorarnerisa ingerlanneqarnerat tusagassiuutit soqutiginersarpaat, Kim Blokbo oqarpoq.

Pisortat isumaqatigiissutaanni aalajangersakkat atuuttut malillugit kommunini Namminersorlutillu Oqartussani sulisut tamarmik soraarnerminni ajunngitsorsiassatigut qaammatinik 18-inik periarfissaqarput ”piumassuserinngisaminnik soraarnermikkut”.

- Aallaavittut sulisitsitut kissaatigigaanni sulisumik soraarsitsinissaq isumaliutineqartariaqarpoq tamatumunnga suna peqqutaanersoq. Isumaqaraanni pineqartoq annertuumik sumiginnaasimasoq tamanna pisuni arlaqartuni soraarsitsinermik imaluunniit peersitsinermik kinguneqarsinnaavoq. Taamaanngippat suleqatigiinneq taamaatissinnaavoq soraarnissamut isumaqatigiissusiornikkut. Soraarnissamik isumaqatigiissut atorneqartarpoq pineqartoq atorfininnermini pissutsinik unioqqutitsisimatinnagu, Kim Blokbo oqarpoq.

Ombudsmandip maannakkut oqaaseqaataatigut imaappa Namminersorlutik Oqartussat imaluunniit kommuni assersuutigalugu naalakkersuisoqarfimmi pisortamik imaluunniit kommunaldirektørimik soraarnissamik isumaqatigiissusiorsinnaanngitsut tamannalu isertuullugu tusagassiortoq aperippat pisortat aningaasanik qassinik tunineqarsimanersut?

- ”Isertuussinermut” tunngasunik oqaaseqarnissara kissaatiginngilara. Tamanna tusagassiuuteqarnermi oqaasiuvoq. Ombudsmandip kikkuunersut immikkoortinneq ajorpai. Ombudsmandi naliliivoq soraalernermi ajunngitsorsiassat qassiunersut isertuunneqarsinnaanngitsoq, kisiannili aamma soraalernermi isumaqatigiissutit tamarmik takuneqarsinnaassanngitsut. Ilissi tusagassiortut isissinnit isigalugu aamma tamanna naammassimassaaq, nalinginnaasumik paaserusuttarassiuk pisortani pisortaq tamakkiisumik qaammatini 18-ini sivikinnermiluunniit soraalernermi ajunngitsorsiassaqarnersoq, Kim Blokbo oqarpoq.

Kommuneqarfik Sermersuumi kommunaldirektøriusimasoq ataasiartumik aningaasanik tunineqarpoq qaammatini 12-ni akissarsiassaasa nalinganniittunik. Ataasiartumik aningaasat 1,4 million koruuniupput. Tamatuma saniatigut soraarnerussutisinissamut tunngasunut 90.000 koruunit ilaatinneqassapput. Imaluunniit katillugit 1,5 millioningajaat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER