Aaqqissuisuuneq innersuussivoq: Issittoq puigornagu
Danmarkimi illersornissamut ministerip Trine Bramsenip Issittumi suleqatigiinnerup ingerlaqqinnissaa Bidenip allaffeqarfittaavanut kajumissaarutigaa.
”Nunarsuaq allanngorsimavoq pitsanngoriarsimananili. Inuiaqatigiittut ingerlanitsinnut inuinnaallu naalakkersueqataaneranni pingaartitatsinnut qunusaarinernut nalorninartunik arlariiaannik allanngorartunillu akiorniagassaqarpugut. Ilungersunartut tamakku ataatsimoorluta iliuuseqarfiginissaat aatsaat taama pingaaruteqartigilerpoq”.
Illersornissamut ministerip Trine Bramsenip (S) Amerikami tusagassiorfimmut killilimmut Defence Newsimut allakkani taama aallarnerpai, atuagassiamik pingaarnertut atuartussat tassaallutik Amerikami illersornissamut ministereqarfimmiittut Amerikamilu sakkutooqarfimmiittut. Allaaserisami siunertarineqartoq erseqqilluinnartoq, Sakkutuunngorniat ilinniarfianni lektori Jon Rahbek-Clemmensenip oqaatigaa, tassami illersornissamut ministerip saaffigisai tassaammata USA-p aamma Kunngeqarfiup Danmarkip akornanni pissutsinik siunissami aalajangiisartussat.
– USA Danmarkip peqatigisaraa pingaarutilik, unalu tassaaneruvoq Danmarkip Amerikamiunik ikiuiniarluni iliuuserisaannik erseqqissaaneq. Tamatumami piffissami matumani erseqqissarnissaa pingaaruteqarmat, tassami USA-mi nutaamik præsidenteqalerlunilu allaffissornikkut nutaamik ingerlatsisussanngormat.
Issittoq sallersanngorsimasoq
Jon Rahbek-Clemmensenip oqaatigaa, soqutiginartuusoq Issittoq politikikkut oqallisigineqartuni qullerpaanngorsimammat.
- Maluginiarneqartariaqarpoq Danmarkip Irakimi iliuusai aamma Issittumut Atlantikullu Avannaanut suliniutai illersornissamut ministerimit Trine Bramsenimit erseqqissarneqarmata. Tamanna annikitsumik takussutissaalluni Issittup Danmarkimi nunanut allanut isumannaallisaanermullu politikimi sammineqaleriartorsimaneranut. Ukiunik qulinik kingumut qiviaraanni Issittoq taamanikkut oqallisigineqarpallaanngilaq. Ullutsinni oqallisigineqarnerpaavoq pingaaruteqarnerpaatut isigineqarluni. Pineqartorlu pillugu USA-mut oqarsinnaalluta naalagaaffeqatigiinnik suleqatiginninnissamut soqutiginnittariaqartut.
Uppiavallaassanngilagut
Trine Bramsenip allaaserisamini oqaatigaa, Issittup sikuata aakkiartorneranut atatillugu umiarsuillu aqqutaannik nutaanik pilersoqarneranut atatillugu Issittoq annerujartuinnartumik iliuusissanut naalagaaffippassuarnut pingaaruteqalersussaasoq.
“Rusland Issittumi sakkutooqartitsinerminik piorsaavoq aamma Kinap nunarsuup immikkoortuani tamaani annerusumik sunniuteqarnissani anguniarsaraa. Ineriartorneq tamanna nakkutigeqqissaartariaqarparput. Tamaani sakkutuulersornerup annerulinnginnissaata qulakkeerniarnissaanut peqatigitillugu uppiavallaartariaqanngilagut. Nunarsuup ilaani tamaani peqatigisavut iligisavullu taamaallaat peqatigalugit sorsuttoqannginnissaa aalajaatsumillu ingerlatsisoqarnissaa qulakkeersinnaavarput. NATO iligiillu tamaaniinngippata, taava nunat allanik soqutigisallit aallanillu pingaartitallit tamaani inulersuilissapput”, Trine Bramsen mianersoqqusivoq tulliatullu USA-p Issittumi Danmarkimik suleqateqarnini nangeqqittariaqaraa kajumissaarutigalugu.
”Naak Danmark Issittumi Atlantikullu Avannaani ukiorpassuarni najuussimagaluartoq aamma naak Danmarkimi naalakkersuisut Issittumi suliniuteqarnertik nukittorsarniarlugu pilersaarutigigaluaraat, nunarsuup ilaa tamanna annertoorujussuummat naalagaaffimmit ataasiinnarmit nakkutigineqarsinnaanngilaq. Tamanna patsisigalugu USA-mik nukittuumik suleqateqarnerput pingaartittorujussuuarput. Suleqatigiinneq tamanna ukiuni kingullerni arlalinni annerulersimavoq. Ataatsimoorluta iliuuseqarnitsigut Issittoq tamakkerlugu, Europami aamma USA-mi isumannaatsuunissamik toqqissisimanermillu pilersitsivugut”, taanna allappoq.
Trumpip allaffeqarfiata soqutiginninnera Kalaallit Nunaannut aalajangersimasunik iluaqusiisimasoq, Jon Rahbek-Clemmensenip oqaatigaa.
– Trumpip allaffeqarfiata Issittoq sammilermagu ukiuni kingullerni sisamani allanngortoqarnera takuarput, ingammik Kalaallit Nunaata Amerikamiunit soqutigineqarnerulernera qanoq pissarsissutaasimanersoq takugatsigu. Soorlu Pituffimmi kiffartuussinissamut isumaqatigiissut aaqqiivigineqartoq takuarput aamma USA Kalaallit Nunaannut aningaasanik ikiorsiissuteqartoq takuarput. Tamakku assersuutissaapput Amerikamiut soqutiginninnerat Kalaallit Nunaannut iluaqutaasumik suliniuteqarnermut atorneqarneranik. Tamanna tassaasoraara Danmarkip USA-mut periaasiata ilaa. Aamma Trine Bramsenitut inissisimagaluaruma, taava USA-mi allaffeqarfimmik ingerlatsilersut nutaat eqqaasissagaluarpakka Issittoq suliassaqarfittut pingaarutilimmik inissisimammat tamannalu allanngortinneqartariaqanngimmat, Jon Rahbek-Clemmensen oqarpoq.
Aviisi Sermitsiaq uani pisiariuk: