Aaqqissuisuuneq innersuussivoq: Inuusuttut pinerlunnermit eqqugaagajuttartut
Inuusuttut inersimasunit pinerlunniannginnerusarput, amerlaqisutigullu inuusuttut aamma nakuusernermit kanngutsaatsuliornermillu eqqugaasarput
2012-imiilli inuusuttut 15-iniit 18-inut ukiullit akornanni pinerluttarneq annikilliartorsimavoq, inuusuttunit 15-iniit 18-inut ukiulinnit pinerluttulerinermik inatsimmik unioqqutitsinerit 1518-it nalunaarutigineqarsimallutik, 2018-imi 432-it nalunaarutigineqarlutik. Ukiut arfiniliinnaat ingerlaneranni taakku affaanniit ikinnerullutik. Tamanna politiit 2018-imut kisitsisaataannit takuneqarsinnaavoq.
Kisitsisit aamma takutippaat inuusuttut inersimasunit aamma nakuusinnginnerusartut. Toqutsinerit nakuuserlunilu pinerlunnerit inuusuttunit piliarineqartut kisitsisit tamakkiisut 14 procenteralugit, kanngutsaatsuliorluni pinerlunnerit 13 procentiullutik, taamaalilluni pinerlunnerit inoqatinut ulorianartut inuusuttunit piliarineqartut katillutik 27 procentiullutik.
Pinerluttarnerit tamaasa qimerlooraanni 34 procentiussapput, toqutsinerit, nakuusernerit kanngutsaatsuliornerillu katikkaanni.
– Inuusuttut inersimasunit nakuusernerusartut inuit oqartarnerat eqqunngilaq, kisitsisimmi paatsuugassaanngitsumik takutippaat inersimasut nakuusernerusartut. Inuusuttullu pinerliivigineqartarnerat qimerloorutsigu takullugu ajorluinnarpoq inuusuttut kinguaassiuutitigut pinerlunnerni eqqugaanerpaasartut. Aamma kisitsisinit takuneqarsinnaavoq pinerluuteqarnerit amerlanerpaat inuusuttunik eqquisut tassaasut toqutsinerit nakuusernerillu. Pisuunnguallanniarluni inuusuttunut pinerluttoqarneq ajungajappoq. Tamatumani paasineqarsinnaavoq inuusuttut akunnerminni pinerluuteqarneq ajortut, annikitsumilli, inersimasunilli toqutaasarput, nakuuserfigineqarlutik kinguaasiuutimikkullu pinerluffigineqarlutik. Tamanna immaqa inuit ilimagisaasa paarlattoraat, politimesteri Bjørn Tegner Bay oqarpoq.
Nuannersutut oqaatigaa inuusuttut pinerlunniartarnerat taama annertutigisumik annikillisimammat. Pinerluttarnerit suulluunniit inuusuttunit piliaasut ikilisimapput, annermilli pisuunnguallanniarluni pinerlunnerit.
– Nuannerneranut peqqutaasut ilagaat inuusuttut 18-19-inik ukioqalernissaannut pinerlunnaveersaartikkutsigik pinerlunniartarnissaat ilimanannginnerussaaq. Tamanna uanga nammineq eqqoriarpara, inersimasummi pinerluuteqartartorpassuit sullitavut mikisuararsuuneranniilli ilisarisimavagut. Taamaattumik politiini isumaqarluinnarpugut siunissami inuusuttut pinerluuteqartarnerat annikinneruppat inuiaqatigiinni pinerlunneq annikinnerussasoq – inuiaqatigiinni pissutsit allat allanngortinnagit. Aqussinnaanngisatsinnik peqarpoq. Nuna tassanngaannaq pisuupilussuanngussappat imaassinnaavoq pinerluttarneq suli annikinnerulersoq. Aamma imaassinnaavoq inuiaqatigiinni kipiluttunartorsiortoqalersoq, taamaalilluni pinerluuteqartarneq annertunerulerluni. Oqaatigiuminaappoq, Bjørn Tegner Bay oqarpoq.
Inuusuttut pinerluuteqartarnerisa affaat sinnerlugit ikinnerulernerannut politimesterip pinaveersaartitsineq peqqutaasoraa. Aammali siusinnerusumut naleqqiullugu inuusuttut pinerluuteqartut sukkanerusumik iliuuseqarfigisalersimavaat politiit inuusuttut sukkanerusumik sullillugit.
– Suli pitsanngoriartoqarsinnaavoq, inuusuttulli sullisileqqaarneranniit pineqartup inatsisaatsiliorneraniit pineqaatissinneqarneranut imaluunniit akiliisinneqarneranut piffissaq sivikillisimavarput, taamaalilluni inuusuttut tamanna ilisimaarinerulerlugu, inuusuttullu ikinngutaasa ilisimaaralugu pinerluuteqassagunik pillarneqassallutik. Aammali nalinginnaasumik imaassinnaavoq inuusuttut ilisimaarinerulersimagaat inuit pinerluffigisatik qanoq iliorfiginerlugit. Imaassinnaavoq ilisimaarinerulersimagaat inoqatitik timikkut tarnikkullu ikilertarlugit pinerluffigigaangamikkit, Bjørn Tegner Bay oqarpoq.
Aviisi Sermitsiaq uani pisiarineqarsinnaavoq: