KL

DK

Aaqqissuisuuneq innersuussivoq: Inuusuttut ilinniarnissamut periarfissaannik Naalakkersuisut akimmiffilersuisut

Illersornissamut ministeriaqarfiup sakkutuunngorniarnissamut Kalaallit Nunaanni misilitsittarnerit Naalakkersuisut piumasaqarnerisa kingorna unitsikkallarpai. Sakkutuunngorniarsimasut aamma illuatungiliuttut arlallit tamanna tupigusuutigaat. Inuusuttut ilinniarsimasut pisariaqartippagut, ilinniarnissamullu periarfissamit ingalassimassanngilagut, taama isornartorsiuisoqarpoq.

Trine Juncher Jørgensen

2018-imi aamma 2019-imi Illersornissaqarfik Illersornissaq pillugu isumaqatigiissummut atatillugu Kalaallit Nunaanni sakkutuutut ilinnialernissamut misilitsitsivoq. 2018-imi misilitsinnerit Nuummi ingerlanneqarput, kisianni 2019-imi illoqarfiit ilinniarfiusunut siammarneqarpoq; Aasiaat, Sisimiut aamma Qaqortoq. Inuusuttut katillugit 89-it takkupput misilitsillutillu, 37-t kingorna Illersornissaqarfimmut isumaqatigiissusiorput. Taakkunannga 26-it nunami sakkutuuniipput, qulit sakkutuuni imarsiortuni ataaserlu Upalungaarsimanermut Aqutsisoqarfimmi.

Inuusuttut arlallit suli sakkutuujusussaanerup kingorna Illersornissaqarfimmiipput; ilaat Sakkutuut imarsiortut umiarsuaanniipput, ilaat Nuummi Issittumi Sakkutooqarfiup qullersaqarfiani, ilaallu Sakkutuuni ilinniarfinniluunniit allani ilinniaqqillutik.

Siornatigut Illersornissaqarfimmi ilinniakkamik naammassinnittarneq ileqquusimanngilaq, kisianni Kalaallit Nunaanni illoqarfinni ilinniarfiusuni misilitsisisoqartarneranit amerlanerusut ilinniarnissamut periarfissaq paasilerpaat.

Aaqqissuisuuneq innersuussivoq:

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Tamannali maanna unippoq, tassami Illersornissamut ministeriaqarfiup »Naalakkersuisut piumasaqarnerisa« kingorna Kalaallit Nunaanni misilitsittarnerit piffissaligaanngitsumik unitsikkallarpaat.

Taamaattumik inuusuttut Illersornissaqarfimmi ilinniarnissaminnik isumaliutersuuteqartut, siunissami misilitsinniarlutik Danmarkiliartalissapput. Namminermut tulluanngitsoq paasiinnassallugu angallavik takivoq.

Ajutoorluinnarluni nalunaaruteqarneq

Demokraatineersup Anna Wangenheimip Naalakkersuisut iliuusaat paasisinnaanngilluinnarpaa, aasaaneranilu sooq Naalakkersuisut inuusuttut illersornissaqarfimmi taamatut ilinniarnissaat ajornakusoornerulersinneraat §37 naapertorlugu arlaleriarluni apeqquteqarpoq.

– Naalakkersuisut Illersornissaqarfiullu akornanni isumaqatigiittoqannginnera pissutigalugu, kalaallit inuusuttut maanna Illersornissaqarfimmi ilinniarnissamut periarfissaqarunnaarnerat akuersaarneqarsinnaanngilluinnartoq isumaqarpunga. Ilinniakkat tamarmik Kalaallit Nunaanni qujarunneqartarput. Ilinniagaqqortussuserput nukittorsarneqassaaq. Taamaammat maanna pilersaarutaareersut allamik pilersaarummik piareersimatitsinani unitsinneqarneri paasisassaanngilaq. Inuusuttunik ilinniakkamik aallartitsinngitsoortunik annaasaqaratarsinnaavugut, tamannalu ajutoorluinnarluni nalunaaruteqaqqajaanertut isumaqarfigaara, Anna Wangenheim, Naalakkersuisut tungaannit Kalaallit Nunaanni Illersornissamut tunngatillugu qanoq pisoqarnissaanik matoqqanermik tupigusuuteqartoq taama oqarpoq.

Angalanermut aningaasartuutit akilerneqarnissaat nalornissutaasoq

2018 sioqqullugu inuusuttut Kalaallit Nunaanneersut sakkutuujusussaanermut Danmarkimi misilitsikkusuttut angalanermut aningaasartuutinik utertitsinissamut Namminersorlutik Oqartussanut qinnuteqarsinnaatitaapput. Kisianni aaqqiissut taanna atuutiinnassanersoq nalunarpoq.

Sakkutuujusussaanermut misilitsinnermut atatillugu Namminersorlutik Oqartussat angalanermut tapiissuteqarsinnaanerat pillugu Anna Wangenheimip apeqqutaanut, ilinniartitaanermut naalakkersuisoq, Peter Olsen, ima akissuteqarpoq, »sakkutuujuffissami atuunneq imminermini ilinniarnivimmut ilaanngimmat tak. ilinniagaqarnersiutit pillugit inatsimmi § 6, ingerlaavartumik tapiiffigineqarsinnaasutut akuersissutiginissaanut periarfissaqanngilaq. Tassunga ilaavoq kalaallit suliffeqarfiini sakkutuujuffissap atuunnerata ingerlanerani aalajangersimasumik piumaneqartanngimmat.«

Akissut Namminersorlutik Oqartussat ilinniarfissanut paasissutissiisarfiani www.sunngu.gl-imi, sakkutuutut ilinniakkat ataani allassimasunut assortuisinnaasoq:

»Ilinnialernissamut akuerineqarnissat siunertaralugu imaluunniit sakkutuuni assersuutigalugu innaallagisserisutut, mekanikeritut assingusunillu danskit illersornissaqarfiani ilinniakkamik aallartitsissaguit, Danmarkimut angalanerpit akilerneqarnissaa qinnuteqaatigisinnaavat. Akuerineqarnissamut misilitsittussaanerit uppernarsarsinnaasariaqarpat.«

Inatsisartut ataatsimoorlutik Illersornissamut periusissiaq aamma Issittumi ilinniarneq pillugu ukiaanerani ataatsimiittoqalerpat oqallittoqarnissaanik pisariaqartitsisoqartoq, Anna Wangenheim isumaqarpoq.

ilinniartitaaneq inuussutissarsiutit
Powered by Labrador CMS