Aaqqissuisuuneq innersuussivoq: Inuusuttuaqqat ussiataarneqarlutik assiliisinneqartarput
Meeqqat inuusuttullu qarasaasiakkut inuillu attaveqaqatigiittarfiisigut malinnaanissartik pisariaqartittorujussuusarpaat. Attaveqaqatigiittarfinnili Snapchatimi aamma Instagramimi iliuuserisamik kingunerisa paasinissaannut ikiorserneqartariaqarput. Minnerunngitsumik assinik mattaangasunik avitseqatigiittarunik, Nunatsinni Meeqqat Ikiortigimmi siulittaasoq oqarpoq
- Inuusuttut programinik sorlernik atuisarnersut angajoqqaat ilisimasaqarfigigajunngilaat. Taamaattumik inersimasut pissutsinut malinnaanissaat innersuussutigaarput, Nunatsinni Meeqqat Ikiortigimmut siulittaasoq, tarnip pissusiinik ilisimasalik Jonna Ketwa oqarpoq.
Peqatigiiffiup PiSiup (Pinerlutsaaliuinermut Siunnersuisoqatigiit) qarasaasiakkut sullissiviat ”Chat Paaralugu” meeqqanut, inuusuttunut, angajoqqaanut meeqqanillu sullissisunut saaffiginnittuusoq ukiarmi saqqummersippaat, taanna Meeqqat Ikiortigimmit Nunatsinni qinngasaarisarnermut akiuiniarluni paasisitsiniaanerup ilagaa.
Atuarfimmi tiimini Inuttut Ineriartornermi, inuttut inerikkiartorneq pillugu oqaloqatigiinnerni pineqartoq oqaloqatigiissutigineqartarpoq. maannamut misilittakkat paasinarsisikkaat, tamakku oqaloqatigiissutiginissaat inuusuttut soqutigigaat Jonna Ketwap atuaqatigiinnut arlalinnut oqalugiarsimasup oqaatigaa.
Atuartitsinermi atortut tamakku Ilinniartitaanermut Aqutsisoqarfik suleqatigalugu atuarfinnit intranetimut inissinneqarsimapput. Atuartitsinermi atortussani sungiusagassanut ilaapput oqallissaarutit, taanna ilisimatitsivoq. Taamaattorli tamatumunnga peqatigitillugu maluginiarsimavaa, meeqqat inuusuttullu app-it aamma inuit attaveqaqatigiittarfiisa teknikimut tunngasortaat sapinngikkaluarlugit, atornerisa atornerlunnerisalu kingunerisassaat paasisinnaasanngilaat imaluunniit tamakkerlugit paasisinnaasarnagit.
- Inuusuttortatta pisariaqartippaat paasissallugu, assimik akuersititseqqaarani nassiussigaanni imaluunniit paasissutissanik allanut tunngasunik ilisimanngisaannik ingerlatitseqqinnerit kinguneqartinneqartussaammata. Tamanna inuiaqatigiittut pikkoriffiginerusariaqarparput, Jonna Ketwa oqarpoq, isumaqarnerarlunilu tamanna aamma meerarisamut killiliisarnissamut aamma tunngassuteqartoq.
Inuit attaveqaqatigiittarfiisigut killiliisarneq pissusilersornerlu pillugit oqallinnissaq mianernartuusinnaasarmat, taassuma akueraa.
Angajoqqaalli pineqartoq oqallisigisariaqarpaat:
- Inuusuttut pissusilersornermik kingunerisa paasinissaannut inerisimalluartuunngillat, tamatumani eqqarsaatigalugit pissuserissaarneq, iliuuseqarsinnaaneq misigissutsillu. Imaluunniit allat pissusilersornerinut tunngasunik, taanna oqarpoq.
Siunnersuut pingaarutilik tassaavoq, meeqqap asseq Instagramimut imaluunniit Snapchatimut ikkunneqarsimasoq aalassaatigippagu, angajoqqaat eqqissisimaniaannassasut.
- Naveersillutik aallartissanngillat, pilertortumilli qisuariaateqassallutik, taamaalilluni asseq imaluunniit video ingerlaartinneqartoq unitsinneqarniassammat, Jonna Ketwa oqarpoq.
Assit mattaangasut pinnagit
Jonna Ketwap misilittagai naapertorlugit ajornartorsiut annerpaaq pilersarpoq, meeqqap assinik qaninniarnermut tunngasunik Snapchatimut imaluunniit Instagramimut ingerlatitseqqittoqarsimasoq paasigaangagu, tamatumunnga atatillugu aamma qinngasaarisoqaraangat.
Snapchatimi qarasaasiakkut attaveqaqatigiittarfiusumi assit sukkasoorujussuarmik piiarneqartarput, ingerlateqqinneqarsimasarlutilli aamma assilineqarsimasinnaasarlutik.
- Tassa angajoqqaat naammattoortakkamittut oqaatigisartagaat: Inuup assinganik ingerlatitseqqittoqarsimanerata kinguneranik inuusuttuaraq aliasuttorujussuusarpoq imminullu toqunnissaminik eqqarsaateqartarluni, Jonna Ketwa oqarpoq.
Taassuma ajornartorsiut alla misigisartagaa tassaavoq, inuusuttuaraq inersimasumit inuusuttuaqqatut imminut oqaatigisumit attaveqarfigineqarsimappat, tiinganiakujullunilu imaluunniit qaninniakujulluni aallartissimagaangat. Immaqa inuusuttuaqqap attaveqarnertik taamaatissimasinnaavaa, tamannali pitinnagu nammineq assiminik qaninniartumik nassitsereersimasinnaalluni.
- Sakkortuumik mianersoqqussutigisarput tassaavoq, assit mattaangasut qanorluunniit ittut saqqummiunneqannginnissaat. 18-it inorlugit ukioqaraanni inersimalersimananilu, tamataqarani assimik avitseqateqarnissaq imaluunniit atisaqarani assilisinnissaq isumassarsiatsialaanngimmat mianersoqqussutigissavarput, Jonna Ketwa oqarpoq.
Taassuma angajoqqaanut kajumissaarutigaa, meeqqat qarasaasiakkut attaveqaqatigiittarnerat paaseqqullugu akueralugulu tamakkununnga malinnaanissartik pisariaqarmat. Qanorli atuinissaannut ikiuisariaqarput.
- Tassa akuulluartariaqarpoq, oqaannarani inuusuttut pineqarmata qanoq iliorsinnaanani, Jonna Ketwa oqarpoq ilanngullugulu oqarluni:
Inimut nakkutigineqanngitsumut iseraanni naapertuilluanngitsuliortoqarsinnaanera aarleqqutigineqarsinnaavoq. Ini aalajangersimasuunersoq imaluunniit qarasaasiamiinnersoq apeqqutaanngilaq.
Nittartakkami redbarnet.gl-imi iserfissami ”Til børn og unge”-mi assinik mattaangasunik tigusaqaraanni imaluunniit allat assinik imaluunniit videonik qaninniarnermut tunngasunik ingerlatitseqqissimasut paasigaanni qanoq iliornissamik ilitsersuuteqarpoq.
Internetikkut pinerluttunik paasiniaasartunik ujartuisoq
Jonna Ketwa oqarpoq, Kalaallit Nunaanni inatsisitigut ikiorneqarumalluni saaffiginniffiusinnaasunik amigaateqartoqartoq.
- Meeqqat Ikiortigimmi isumaliutigaarput, siunnersuinermut ilitsersuinermullu piffissamik immikkoortitsissanerluta, internettikkut oqarasuaatikkullu, misigisaqarsimasunik sianertoqassagaluarpat, Jonna Ketwa paasissutissiivoq.
Jonna Ketwa aalajangiisinnaasuugaluaruni Kalaallit Nunaanni politiit internetikkut pinerluttunik paasiniaasartoqarfeqassagaluarpoq, Danmarkimisut.
- Politiit digitalimik pinerluutinut paasiniaasartoqarfimmik pilersitsigaluarpata tamanna ajunngilluinnassagaluarpoq, oqarpoq.
Siunnersuut tamanna isumatuujusutut nipeqarsinnaavoq, Kalaallit Nunaanni politiit tamakkuninnga aamma suliassaqartarmata, politimester Bjørn T. Bay oqaaseqaateqarluni oqarpoq.
Tamatumali peqatigisaanik eqqaasitsissutigaa, tamanna isumalluutinik agguataarinerit pitsaanerpaartarinavianngimmassuk. Kalaallit Nunaanni innuttaasut 56.000-iinnaapput, Danmarkimilu paasiniaasartoqarfimmit inuit 5,6 millionit tunngavigineqarlutik.
- Isumaga naapertorlugu Kalaallit Nunaanni Politiini internetikkut pinerluutinut paasiniaasartoqarfiliorneq isumalluutinik pissusissamisoortumik atorluaarnerunavianngilaq.
Taarsiullugu iliuuserisarput tassaavoq politeertatta unnerluussisuttalu tamakkuninnga suliaqarnissamut aalajangersimakannersumik qaffasissusilimmik suliassatigut piginnaanngorsarneqarnerat, Bjørn T. Bay nassuiaavoq ilassuteqarlunilu:
- Tamatumunnga tapertatut Danmarkimi pineqartup iluani immikkut suliaqarnermut immikkoortortaqarfinnik iluaquteqarsinnaavugut. Taamaalilluta isumaga naapertorlugu isumalluutinik pitsaanerpaamik atorluaasinnaavugut, politimesteri AG-mut allakkatigut akissutimini allappoq.
Aviisi AG uani pisiariuk: