Aaqqissuisuuneq innersuussivoq: Inooqatigiinnikkut aningaasaqarneq
Suliffeqarfik ikiortarialinnut sullissivik Siu-Tsiu Naasuliartarpiup eqqaani nunaminertamik atuinissamut akuersissummik pissarsisimavoq. Tamaani naatsiivimmik pilersitsiniarput taamaalilluni Tasiilaq naatitanik naaqqammersunik naasunillu pilersorneqarniassammat. Inuusuttut ilinniartitaanerup sulisartoqarnerullu avataani inissisimasut naatsiivimmik paarsisorineqassapput.
Tasiilami suliffeqarfik ikiortarialinnut sullissivik Siu-Tsiu naatsiivimmik pilersitsinissaminut nunaminertamik atuinissamut akuerineqareerluni naatsiivimmik pilersitsiniarpoq, tassa inuusuttut suliffeqalernissaminnut ikaarsaariarnerminnut atatillugu ilaatigut naatsiianik, uanitsunik, rabarberinik, ruuanik, salaatinik naasunillu nutaanik naatitsisinnaalerniassammata, tamakkumi Tasiilami piumaneqaqimmata.
- Naatsiivilerinermut atuakkamik Sorsunnersuit Aappaanneersumik nassaaratta, tassanilu Nunatsinni suut naatinneqarsinnaanersut allassimalluni. Takorlooraluaratsigu immaqa silami nunaannarmi naatitsisinnaassalluta, paasilluguli naatsitsiviit atornissaat pitsaanerussasoq, taakku tassaallutik karsit naatitsiviit imaluunniit naatitsivissaliat naasunik naatitsiviusartut, suliniummik aqutsisoq Nivikka Witjes oqarpoq, taanna pamersaanermi masteriuvoq, naatsiivilerinermilli aamma misilittagaqarluarluni. Taassuma angutaa Sten Pedersen Ameralimmi ukiut 40-t sinneqartuni naatitanik naatitsisarsimavoq, ilaatigullu Nuummi neriartarfinnut arlalinnut pilersuisarsimalluni. Taama suliaqarneq Nivikka Witjesip ikiuuffigisarsimavaa.
- Takorloorneqartoq tassaavoq, siunissami ungasinnerusumi Tasiilami naatitanik imminut pilersorsinnaalernissaq, Nivikka Witjes Sermitsiamut oqarpoq. Illup iluani naatitanik qanoq naatitsisoqarsinnaanersoq aamma taassuma misilikkusuppaa, naatsiivilerineq ukiuunerani taamaatikkaangat inuusuttut aamma suliassaqartarniassammata.
Inuiaqatigiinni naleqarnerulersitsissasut
Siu-Tsiup suliffeqarfittut ikiortarialinnut sullissivittut ingerlanneqarnerata kinguneranik, niuernerpalaartumik aningaasatigut atugassarititaasut naapertorlugit ingerlanneqassaaq, tamatumalu peqatigisaanik inuiaqatigiinnut nalilinnik pilersitsisoqassalluni. Tasiilami suliniummi saaffigineqartut tassaapput inuusuttut, assigiinngitsunik patsiseqarlutik sulisartoqarnerup ilinniartitaanerullu avataani inissisimasut. Siu-Tsiup pilersaarutaatigut suliassanut assigiinngitsunut misilittagaqalissapput tamatumunngalu peqatigitillugu misigissallugu suliffeqarfimmi suleqataaneq ataatsimoornermullu peqataaneq.
Tasiilami Siu-Tsiumi inuusuttut suleqataasut maanna arfineq-marluupput. Taakku saniatigut pingasut aamma suleqataalersussaapput. Ilaatigullu taakku suleqataaffigisimallugit Pilersuisup quersuani torersaaneq, qalipaanermik suliaqarsimallutik, pequtinik nutarterisimallutik aamma Tasiilami Naatsiiviup piareersarneqarnerani ikiuullutik, Siu-Tsiup sullivinnik aqutsisui piginnaaneqarluartut Mati Larsen aamma Gaba Kristiansen kiisalu Tasiilami inuussutissarsiortut, soorlu qalipaasut suliffeqarfiutaat Jensen og Nielsen suleqatigalugit.
- Suliassanik takussaasunik illoqarfimmut pingaarutilinnik suliaqarusuttorujussuugatta. Ilaatigut inuusuttut taamaalillutik namminneerlutik takusinnaaniassammassuk piginnaanitik atorlugit pitsaasumik ineriartornermut suleqataasinnaallutik, ilaatigullu illoqarfimmiut takusinnaaniassammassuk inuusuttut suliaat pingaaruteqartut, Nivikka Witjes Sermitsiamut oqarpoq.
Ilinniagaqarnissamut sammivinnik assigiinngitsunik marlunnik pilersitsisinnaanissaq Siu-Tsiumit pilersaarusiorneqarput; kiffartuussinermut tunngasunik sammivik, assassornermik qitiutitsisoq, aamma inuussutissalerinermut tunngasunik sammivik, tamatumani qitiutinneqassallutik nerisassiorneq, eqqiluisaarneq aamma naatitanik naatitsineq.
Ilinniagaqalernissamut suliffeqalernissamullu piareersarneq
Nivikka Witjesip oqaatigaa, Siu-Tsiumi pineqartoq tassaasoq, inuusuttut ilinniagaqalernissaminnut imaluunniit ataavartumik suliffeqalernissaminnut piukkunnarsarnissaat.
- Inuusuttut sulinermut atatillugu pitsaasunik misilittagaqalernissaat isumaginiarsaraarput. Inuusuttut ataatsimoortillugit iliuuseqarfiginiarsarinngilavut, inuttulli ataasiakkaatut pisariaqartitaat piginnaanerilu isiginiartarlutigik. Sunik periarfissaqarpat? Aamma qanoq piginnaaneqartigippat? Pingaarutilinnik ingerlatsinerup qitiutinneqarnissaa pingaaruteqarpoq. Oqanngilagut inuusuttut tamarmik sapaatip akunneranut 40 tiimit imaluunniit ullut tamaasa 8 tiimit sulisassasut. Ulluinnarni sulinitsinni inuusuttunut ataasiakkaanut naleqqussaalluta piareersarniartarpugut, taamaalilluta inuusuttut ataasiakkaat piginnaaneri pisinnaasaallu isiginiarneqartarlutik, Witjes Sermitsiamut oqarpoq.
Siu-Tsiu Nuummi illumi ineriartortitsivimmi qullersaqarfeqarpoq, Nivikka Witjesilu pingarnertut tassaniittarluni. Tamatuma saniatigut suliffeqarfik Tasiilami illumi B-49-mi aallaaveqarpoq, tassanilu sannavimmi aqutsisut marluusut Mati Larsen aamma Gaaba Kristiansen atorfeqarlutik.