Skip to main content

Aaqqissuisuuneq innersuussivoq: Illoqarfik qimarratigineqartoq

Ineqarnikkut atukkat pitsaanngeqisut aamma suliffissaaleqineq Tunumi amerlasuunut inuuniarnikkut atugarliortitsipput. Kommuneqarfik Sermersooq Naalakkersuisullu Tunu qimarratigaat, Tasiilami suliassaqarfimmi pisortaasimasoq oqarpoq.

Meeqqanut Ilaqutariinnullu suliassaqarfimmi pisortaq Lene Warwick septembarimi 2019-imi meeqqanut inuusuttunullu suliassaqarfimmi pisortatut atorfinitsinneqarpoq. Suliassaqarfiup aallarnisarnissaa taassuma suliassaraa, pitsaaliuinermik katsorsaanermillu suliniutinik pilersitsineq ilanngullugit, ilaatigut illoqarfimmi inuusuttunut ornittagaq nutaaq.

Lene Warwick Tasiilami meeqqanut inuusuttunullu suliassaqarfimmi pisortatut sulinikuuvoq. Aaqqissuussinerup ilaanit avataanit ikiorneqarnissamut ajorinnittoqartoq misigisimavoq. Tamatuma saniatigut illoqarfimmi annertuumik inissianik suliffissanillu amiga
Foto: Privat

– Suliassaq soqutiginartorujussuusoq isumaqarpunga. Tassani suliassaqarfimmi aqutsinermi Danmarkimi ukiorpassuarni sulinikuuvunga, isumaqarpungalu tunniussassaqarsimallunga, Lene Warwick, 2020-ip naanerata tungaanut illoqarfimmi atorfeqartoq taama oqarpoq, taanna Tasiilap covid-19-eqarnerani ajornartoornermi mattusimasutut inissisimanera pissutigalugu Danmarkimut aallarniarluni aalajangersimavoq. Februaarimili 2021-imi Tasiilamut uterpoq, Kommuneqarfik Sermersuumi avataanit siunnersortinngorluni, suliniutit aallartinneqartut ingerlateqqinneqarnissaat qulakkeerniarlugu, ilaatigullu suliassiissutit suliarineqarnerinut ikiuunniarluni, kisianni kinguninngua angerlaqquneqarpoq.

– Ulloq manna tikillugu sooq Tasiilaliartinneqariarlunga, ullut marluk qaangiuttut Danmarkimut utertinneqarnerlunga paasinngilara. Ajoraluartumik aalajangernerit sukkasuumik allanngortinneqartut arlaleriarlunga misigivakka. Uannut tunnganngilaq, isumaginninnikkut suliassaqarfimmi sulisussarsiornermut tunngavoq. Tasiilami nukissanik pitsaasunik amerlasuunik peqarpoq, amerlasuullu suliniuteqarusuttut, kisianni maanna unammilligassat aaqqiiviginissaannut suli iliuuseqarnerusoqartariaqarpoq, Lene Warwick Sermitsiamut oqarpoq.

Isumaginnittoqarfimmut millionit

2019-imi danskit naalakkersuisui Tasiilami inunnik isumaginnittoqarfimmut Kalaallit Nunaatalu sinneranut ikiorsiissutinik 80 millionit koruuninik aningaasaliipput. Naalakkersuisut apeqquteqarnerisa kingorna, aamma Danmarkip 5,7 millionit koruuninik suligasuartitanut isumaginninnikkut siunnersortinut, tarnip pissusaanik ilisimasalinnut aamma ilaqutariinnik katsorsaasunut, qaammatini pingasuni illoqarfiup isumaginninnikkut suliassaannut annertuumik kinguaattooqqasunut aaqqeeriarnerisa kingorna aningaasaliissutigineqarput. Taakku meeqqat pillugit suliat Lene Warwickip ilaatigut suliarisussaagaluarpai.

Suliat marluk ataatsikkut ingerlanneqarnissaat Kommuneqarfik Sermersuumi aqutsisunut isumaqatigiissutigineqarpoq: Ilaatigut suliassaqarfimmut piginnaasalinnik Danmarkimit qulakkeerinnittoqassaaq, ilaatigullu piginnaasaqartut najugaqartunik suleqateqarlutik ilinniartitsissapput. Taamaalilluni meeqqat maannakkorpiaq ikiorneqarsinnaapput, siunissarlu ungasinnerusoq eqqarsaatigalugu najugaqartunik inunnik isumaginnittoqarfik sulisussaqassaaq.

– Aallartinnerani suliassat taakku marluk ingerlannissaannut tapersersorneqarneq misigivara, taamaammallu sulisussarsiornermi unammilligassat sulissutigilerpakka, Danmarkimi kommuninut isumaginninnermut siunnersortinik perorsaasutut ilinniarsimasunik Tasiilamut suliartortinneqartussanik isumaqatigiissusiornerit ilanngullugit. Taamaaliornikkut suliaminnik ilisimasalinnik eqimattanik kipiuitsumik tikittoqartarnissaa qulakkeersinnaagatsigu. Kisianni kommunip Danmarkimi kommunit sulisunut tunngatillugu isumaqatigiissuteqarfigiumajunnaaraa nalunaarfigineqarpunga. Kommunip kalaallinik suliassaqarfimmut sulisussarsiornissani akerlianik ukkatariniarpaa, naammattumik sulisussaqanngitsoq ilisimareerlugu, Lene Warwick Sermitsiamut oqarpoq.

– Sulisut nunaqavissut sulilluartorujussuusut isumaqarpunga, kisianni Tasiilami ajornartorsiutit taamanikkut ullumikkullu annertungaarmata, Kalaallit Nunaanni sulisut pissarsiarisinnaasanit amerlanernik pisariaqartitsisoqarpoq. Tasiilami meeqqat affaat suliamik ingerlatitsivigineqarput. Meeqqat pillugit suliat katillugit 400-500-t pineqarput. Ilaqutariinnut sullissivimmi sulisut 15-it suliat taakku kisimiillutik aaqqissinnaanngilaat. Sulisut amerlanerujussuit pisariaqartinneqarput – tarnip pissusaanik ilisimasallit aamma inunnik isumaginnittut illoqarfimmi pisariaqartinneqarput, taanna naliliivoq.

Aaqqissuussinermi akerlilerneqartoq

Lene Warwickip oqarnera naapertorlugu, illoqarfimmi imigassamik atornerluineq naalliungaarnermut aamma inuuniarnikkut pitsaasumik atugaqannginnermut takussutissaapput.

– Inuuniarnikkut ajornartorsiutit imigassamik tuniniaanerup matuneqarneratigut aaqqiivigineqarsinnaanngillat. Inuit suliffeqanngikkunik, aamma angerlarsimaffeqanngikkunik, ataatsimullu isigalugu atorfissaqartinneqanngitsutut misigisimagunik, taava imigassartoqqajaasarput, anniaatit sivikitsumik malunnarunnaarsittarmagit.

Assaat amerlasuut sammivinnit arlalinnit neqeroorutigineqartut kommunip tigunngimmagit, Lene Warwickip uggoraa.

– Aaqqissuussinerup ilaani avataanit ikiorserneqarnissamut tunngatillugu akerliusoqarlunilu ajorinnittoqarpoq. Ukiorpassuarni Tasiilami inissianik sanaartortoqanngilaq, naak inissianik annertuumik amigaateqartoqaraluartoq. Sulisartunullu ilinniarsimanngitsunut suliffissaqarpianngilaq. Tasiilaq arlalippassuartigut aalajangiisartunit ungasippasippoq. Isumaga naapertorlugu Naalakkersuisut Kommuneqarfik Sermersuullu illoqarfimmi inuuniarnermi atukkat pitsanngorsannginnerisigut, aamma avataanit sulisussanut naaggaarnikkut, Tasiilaq sumiginnarpaat. Tamanna ajoraluartumik meerarpassuarnut inuusuttorpassuarnullu eqquivoq, Lene Warwick Sermitsiamut oqarpoq.

Martha Lund Olsen: Tasiilami sulisussanik unitsitsinngilagut

Kommuneqarfik Sermersuumi inunnik isumaginnittoqarfimmi pisortap, Martha Lund Olsenip, isornartorsiuinermut oqaaseqartinneqarnermini, siornatigut sulisorisimasat pillugit oqaaseqarsinnaanini killeqartoq oqaatigaa, kisianni kommunip Danmarkimit sulisut aporfilersunngikkai isumaqarpoq.

Danmarkimit Tasiilami sulerusullutik qinnuteqartoqarpat, atorfinitsinneqarsinnaanerat Martha Lund Olsenip aalajangiusimanerarpaa.
Leiff Josefsen

– Upernaaq Tasiilami isumaginninnikkut siunnersortit arlallit sulisoraavut. Maanna aamma sulisoraagut. Danmarkimit qinnuteqartoqarpat, atorfinikkusuppata atorfinitsikkusuppagut. Amerlanngitsulli aalajangersimasumik atorfinikkusuttarput. Siunnersortitut sulisoqarpugut, soorunami nunatsinnut ilisimannittut perusunneruagut. Allanik aamma misilittagaqarluartunik atuinikuuvugut. Tamatuma saniatigut aamma Nuummi isumaginninnikkut siunnersortivut, kalaaliugunik allameersuugaluarunilluunniit – piffissap ilaani Tasiilamut suliartortarput. Sulianik suliarinnittartuvut oktobarimi Isumaginninnermut Aqutsisoqarfimmit ikiorneqassapput, novembarimiillu danskit/kalaallillu suleqatigiinnerannit ikiorserneqassaagut, Martha Lund Olsen Sermitsiamut ilisimatitsivoq.

– Kommuneqarfik Sermersooq arlaannaatigulluunniit ikiorneqarnissamut ajorinninngilaq, inunnik naleqqussarsinnaasunik sinaakkutinilu taakkunani sulisinnaasunik, avataanit siunnersortitut atorfinitsitsiniaraangatta qulakkeerinnikkusuttarpugut. Kommune Qeqertalik taamatut tunngavilimmik, imaluunniit taamaaliortarsimasoq ilisimavara. Taava isumaginninnermut siunnersortit danskisut/kalaallisut imaluunniit allamik tunuliaquteqarpata, taava qinnuteqaataat pitsaasumik isiginiartarparput. Naggasiutigalugu sapinngisara tamaat, sulisut nunaqavissut, imaluunniit sulisut najukkameersut sulinerminni piginnaanngorsarnissaat suliniutigisarpara, Martha Lund Olsen Sermitsiamut oqarpoq. 

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER