Aaqqissuisuuneq innersuussivoq: Illoqarfiit mittarfeqarfillit tipaatsupput, Qeqqa qularnartoqartitsisoq

Qallunaat neqeroorutaat, ataasinngormat Naalakkersuisut siulittaasuata Kim Kielsenip (S) Ministeriunerullu Lars Løkke Rasmussenip (V) atsioqatigiissutigisaat, avannaani kujataanilu borgmesterit nuannaarutigaat, Qeqqata Kommuniani Siumup immikkoortoqarfiani siulittaasup qularnartoqartitsinini attatiinnaraa. Danmarki aningaasaliissuteqarnissaminut qanoq piumasaqarpa?

Borgmester Kiista P. Isaksenip Ilulissani Nuummilu mittarfiliornissanut naalagaaffiup peqataaniarnera akerleriffissaqartinngilaa, – Nunap karsianit aningaasalersorneqartumik Qaqortumi mittarfiliornissamut ajornannginnerusumik tamanna aqqutissiuussissaaq, taanna oqarpoq.

Kommune Kujalleq

Oline Inuusuttoq Olsen

tallimann 14. sep 2018 15:45

Annonse

Aaqqissuisuuneq innersuussivoq:

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiul imaluunniit mail adm@sermitsiaq.gl allaffigalugu

Kangerlussuup siunissaa Sisimiuni ernumanartoqartinneqarpoq, pingaartumik massakkut, naalagaaffiup ilulissani Nuummilu mittarfissuarnut aningaasaleeqataanissanik siunertatut nalunaarut atsiorneqarmat.

– Neqeroorummut tassunga atatillugu eqqortumik paaserusukkaluarpara Kangerlussuaq qanoq pineqassanersoq, tassa Kim Kielsen isumaqatigiissutip saniatigut neriorsuimmat Qaqortumik mittarfik sananeqassasoq, tamatuma Kangerlussuarmut kinguneqaatissai oqaatiginagit. Aali Kangerlussuarmi ilisimatusarnikkut misissuinerit imaannaanngitsumik amerlassusillit ingerlanneqaraluartut takornariarpassuaqartaraluartorlu, Qeqqata Kommuniata borgmesteria Malik Berthelsen (S) ulluni marlussunni eqqarsareersimalluni oqarpoq, tassami kommuni aamma ineriartornissaminik pisariaqartitsivoq.

– Kisiannili tassa, maanna naalagaaffik mittarfinnut suliniummut aningaasaleeqataanialermat neriuppunga Kangerlussuarmut aqqut landskarsip akilerumassagaa, tassami kommuni kommunitut allatulli ineriartornissaminik pisariaqartitsivoq, taanna oqarpoq nangillunilu:

– Takornarianik, pingaartumik inuusunnerusunik, amerlanerusunik tikisitsisalerusukkutta taava pissanganartunik neqerooruteqarsinnaassaagut. Takornariat Kangerlussuarmi misigisinnaasaasa pissanganartut saniatigut Kangerlussuup Sisimiullu akornanni aqqusineq misigisassanik piuimaneqartunik pilersitsisinnaavoq, soorlu Islandimi the golden circle-tut, taannalu soqutigineqartorujussuuvoq, Malik Berthelsen oqarpoq.

Siumup Sisimiuni immikkoortoqarfiani siulittaasoq Dorthe Isaksen, Naalakkersuisut siulittaasuata Kim Kielsenip (S) ministeriunerullu Lars Løkke Rasmussenip (V), tusagassiortunik katersortitsillutik Ilulissani Nuummilu mittarfissuarnut naalagaaffiup aningaasaleeqataanissaanik siunnersuummik, aammalu taarsigassarsiniarnermi qularnaveeqqusiinissamik kiisalu Kalaallit Nunaanni inuussutissarsiutit ineriartortinnissaannut aningaasaliissuteqarnissamik atsioqatigiinnerat takoreerlugu, suli qularnartoqartitsivoq.

– Taakkua (naalagaaffik) aningaasaliinissaminnut qanoq piumasaqarpat? Aningaasaliissuteqarnissaminnut sunik naatsorsuutigisaqarpat? Tusagassiortorlu Jensine Berthelsen tusagassiortunik katersortitsinermi eqqorluinnartumik apeqquteqarpoq, Namminersornermut isumaqatigiissut innersuussutigalugu, tassani allassimammat naalagaaffik namminersornermut isumaqatigiissutip avataatigut aningaasaqarnikkut akulerutissanngitsoq, tamannalu namminersornermut isumaqatigiissummik unioqqutitsinerusoq. Aningaasaliinissaannulli piumasaqaatit saqqummiunneqanngillat. Taamatut oqarpoq Sisimiuni Siumup immikkoortoqarfiani siulittaasoq Dothe Isaksen, tusagassiortunik katersortitsineq tv-kut toqqaannartumik aallakaatinneqartoq malinnaaffigereerlugu.

– Mittarfinnut suliniummut qallunaat aningaasaleeqataanissaannik isornartoqartitsinera attatiinnarpara, Dorthe Isaksen oqarpoq, taannalu isumaqatigiissutip atsiorneqarnissaa sioqqullugu tusagassiuutinut nalunaaruteqarpoq, tassani allalluni Siumup Sisimiuni immikkoortoqarfiata sutigulluunniit akuerisinnaanngilluinnaraa qallunaat naalagaaffiat namminiilivinnissamut aqqummik unikaallatsitseqataaniarmat, Nuummi Ilulissanilu mittarfissuarnut amerlanerusunik tapiissuteqarniarnermigut. Nunasiaqartuuneq suli atuuppoq sulilu ingerlalluaqaluni, Dorthe Isaksen oqarpoq nangillunilu:

– Allaammi partiitsinnik pilersitsisup Lars-Emil Johansenip qallunaat aningaasaliinissaat mianersoqqussutigaa.

– Namminiilivinnissamik anguniagaqarluni suliaq tamaat maangaannartissinnaavarsi qallunaat mittarfiliornernut peqataatikkussigit, Danmarkip aningaasatigut Kalaallit Nunaannut akiliutigisartagai 2009-mi juunip 21-anni namminersornerup eqqunneqarneratigut ataatsimut tapiissutit amerlassusaatigut killilerneqarput. Tamanna allanngortinneqarpat namminersornerup aaqqissuussaaneq tamarmi allanngortinneqassaaq. Ukiuni kingullerni 47-ni namminiilivinnissap aallartisarniarneqarnera erloqinartumik naallerneqassaaq, qallunaat naalakkersuisuisa namminiilivinnissamik ingerlatsineq akornusissappagu, Dansk Folkeparti-p tipaatsuutigisaanik.

Aningaasaliisussanik allanik ujarlerniaritsi – tamanna ajornanngilaq, Lars-Emil Johansen allappoq.