Aaqqissuisuuneq innersuussivoq: Guitariliortartoq
Palle Petersen Nuuk Kunstmuseumimi naqqup-ataani sannaveeqqami sulliveqarpoq. Guitarinik suliaqarluni akunnerni arlalinni tassaniissinnaasarpoq.
Aliortugaqarpoq ilaatigooriaarlunilu immattoortarluni, kisianni aasiannik soqanngilaq. Guitariliortartup Palleq Petersenip Nuuk Kunstmuseumimi naqqup ataani sannavigigallagaanut iseraanni taakkua pingasut qularisassanngillat. Tassa naqqup-ataani ini mikisoq atugaraa, tamatumunngalu taarsiullugu illumi iluarsagassanik iluarsaassisarluni, tassami Kommuneqarfik Sermersooq inuussutissarsiortunut atukkiunneqartartunik maannakkiaq iniuteqanngimmat.
Aasiannik ersigisalerujussuuvoq, taamaammallu qilaaq niaquanit centimeterinik arlaqanngitsunik portuneruinnartoq pujoralannut milluaammik eqqiarsimallugu.
- Piffissap ingerlanerani aapparalu Atlantic Musicip Hvidovremi illutaani najugaqarpugut, taannalu queqarpoq, suarsunnik sannavigisartakkannik. Qilaava aasiaat qassutaasaannik ulikkaarpoq. Taamaammat pujoralannut milluaat tiguara qilaarlu qassutaasanik suerullugu eqqiarlugu. Unnuit siulliit ilaanni qarleeraannaallunga unnuakkut nal. marlunngortoq sulivunga, tassanngaannarlu toorneqarpallallunga malugaara, sunaaffa aasiarujussuaq quttoqqama qaavanut pisimasoq, Palleq oqarpoq assaminillu qanoq angitiginera ussersorluni takutillugu.
- Taava nillerujussuarpunga niviarsiarannguatullu nillialerlunga matulu matorlullugu, qullerluunniit qamillannguarnagu, oqarpoq.
Aqaguani aasiak sanigutinik tikissinnaanngisamini teqeqqumiittoq nassaaraa, taava lakkimik tigusivoq ikittaallu saqqummerlugu, ”aasiapalaarsuarlu ikuallallugu”.
Palleq Petersen guitariliortartuuvoq imminut ilinniartissimasoq, Hvidovremilu quimi guitariliortartutut ukiualunni sulisimasoq. 14-15-inik ukioqarluni guitaritoqqamik Nuummi Qapiarfiusaami, taamani najugaqarfigisamini, igiinnarneqarsimasumik nassaarpoq. Stratfordi aappaluttoq, nippassinnaanngitsoq.
- Taava angerlaappara ammarterlugulu sunalu tamaat uuttortariarlugu aqerlorteqqillugu. Sakkortussaammik amigaateqarpunga peqannginnama, taavali qarasaasiaq marlunnik højtalerilik takulerlugu. Taakkualu guitarimut atassuserpakka taavalu nippappoq. Alutornartornaqaaq, taamanimiillu nipilersuutinik katersisalerpunga. Katitertarlugit, isatertarlugit taavalu Frankensteinitut katitigaliarisarlugit, oqaluttuarpoq.
Ilaqutariit suliaat
Palleq Petersen assassullaqqissuujuaannarsimavoq. Sakkunik peroriartuuteqarsimavoq.
- Arfineq-pingasunik ukioqarlunga aanama aserorterutaa blenderi iluarsaanniarsarigaluarpara – tamannali iluatsippallaanngilaq. Ikuallattumik aallartitsiinnangajappunga, illarluni oqarpoq.
- Taava ataataga sulimminit soraarluni angerlarpoq, kiinara paamik sussaanngimmat illulu innaallagiaqanngimmat sulerisimaninnik aperaanga. ”Sulerinngilanga”. ”Soormiuna kiinnat taama paaqartigisoq?”, Palleq illarpoq, ataatamilu kulluminik ulussamigut tagiarsimagaani ussersorluni takutillugu.
- Ineeqqannit pujoq aniavoq. Matu ammarmagu blenderi ikumanikuinnanngorsimavoq. Taava innaallagissamut ikkuttaata nusuppaa sikringilu ikillugu oqarlunilu, mianersortassasunga.
Tassa ikuallatsitsingajannera siulleq. Taannali kisiartaasimanngilaq.
- Katuaq aamma matutissimavara. Katuami naqqup-ataani guitari manissarpara, ajunngitsumik, sulisut ikuallalernermut kalerrisaarutip aallartissimanerani oqaluutigalutik arpaqattaalernissaat tikillugu. Kalerrisaarut tusaasinnaanngilara, aatsaat manissaat unitsikkakku tusaasinnaalerpara. Inuit tamarmik aniasimapput. Uha, immiaraarpassuarnik pillertariaqarsimavunga. Sangatak. Kisianni eeh … taamatut ilikkariartuaartoqartarpoq, Palleq oqarpoq, sannavimminilu putsumut kalerrissaarut puussiamik ullumikkut assersimanerarlugu.
Palleq assassullaqqissutsiminik ataataminit aataminillu pigisaqarpoq. Ataataminit timmisartunik iluarsaasartumit soraarninngorsimasumit Imiina Dorph Petersenimit, assassullaqqissuuneq ilikkarsimavaa, aataminillu Gunnar Stenderimi, nipilersuutissaminik aamma nammineq sanarsimasumit, immikkuualuttut isiginiarnissaat ilikkarsimallugu.
- Agiaq iikkamiittoq nipigissartussaasimavaa. Nipigissanngikkukku sukassinnaanngilat nipilersuutigisinnaanagulu. Tamakku aatannit ilikkarpappa, oqarpoq, pisimasorlu Palleq ilaquttani ilagalugit Danmarkimi feeriarmat eqqaallugu. Taamani qatserisartut biiliannik tummeqqanillu pisisimavoq.
- Aatama aqaguani maskiina peerpaa umiarsuaaraliamut atortussaagamiuk. Taava qatersisartut biiliannik pikkunaatsunik pigisaqalerpunga susinnaanngitsunik. Kisianni taava umiarsuaaraliuuppaanga, taannalu ajunngivippoq, Palleq oqarpoq, aatamilu umiarsualiaa Aalborgimi suli angajoqqaaminiinnerarlugu.
Misigissutsitigut nalilerujussuit
Palleq ukiut ingerlaneranni guitarinik 14-it missaannittunik naqqarpiaanit sanasimalluni eqqoriaavoq. Assersuutigalugu maannakkorpiaq nipilersuutinik pingasunik suliaqarpoq, ataatami ikinngutaata iluarsaatsikkusutaanik. Taakkua tassaapput guitaritoqqaq ukululelelu. Pallerup suliarisartagaanut taakku takussutissaalluarput. Tassami iluarsaassinerit amerlanerpaartaat sullitaanut misigissutsitigut nalilerujussuupput. Nipilersuutit inuttaannit iginnarumaneqanngitsut, pisoqaagaluartut.
Suliarisartakkani qanoq akeqarnersut oqaatigiuminaatsippai. Atortut, elektronikki piffissarlu atorsimasaa apeqqutaapput. Suliarisimasaani akisunerpaaq tassaavoq guitari immikkut sanatitaq, Kalaallit Nunaattut ilusilik. Taanna 40.000 koruunit missaannik akeqarsimavoq. Guitari tunisimasami akikinnersaat 15.000 koruunit missaannik akeqarsimavoq.
Guitarimik naqqarpiaanit sananermut agguaqatigiissillugu qaammatip aappaa affaq atortarpai. Sukkarnerpaamilli suliaqarnermi rekordia tassaavoq sapaatip-akunnera ataaseq.
- Small Time Giantsikkut Aalborgimi juullimut inuulluaqqusinermi nipilerstortussaasimapput. Mikip (Jensen, STG-mi erinarsortoq, aaqq.) aperaanga, guitariliannik nipilersuuserluni appisimaassagunni torraassannginnersoq, isumaqataavungalu. ”Sapaatip-akunnera ataaseq qaangiuppat Kalaallit Nunaannut juullimut inuulluaqqusinermi appisimaassaanga, guitariliorsinnaallutit ilimagaajuk?”akivaralu ajornavianngitsoq, illarluni oqarpoq.
Ulloq unnuarlu isukkaarlugit sanasimavaa nipilersoqatigiillu appisimaarnissaat akunnernik marlussunnik sioqqullugu guitari tiguaat Mikilu taanna atorlugu appisimaarluni.
Qasusimasoq
Palleq Petersen nipilersuutinik suliaqarnermik ukiuni marlunni uninngareerluni aallarteqqissimavoq. Soqutigiunnaarsimagaluarpaa.
- Imminut qasutittoorsimanissara ilimagaraa. Ullaakkut arfineq-pingasuniit unnuakkut pingasunut sulisarsimavunga, oqarpoq.
Ukiuni taakkunani marlunni Danmarkimi sanasutut sulisimavoq.
Palleq aappani Sikkersoq Poulsen peqatigalugu Danmarkimut ukiut arfineq-marluk matuma siorna nuussimavoq, aappani tarnip pissusaanik immikkut ilisimasalittut ilinniartussaammat. Namminerli ilinniarnissamik pilersaaruteqarsimanngilaq, kisianni nipilersuusiortutut assigisaattullu suliffissarsiorsimalluni. Tamannali iluatsissimanngilaa.
- Suliaq ingerlanneerukkiartuaarpoq, oqarpoq.
Pequsiortutut ilinniakkamik siunnersorneqarami isumassarsiatsialaasutut isummersimavoq qinnuteqaramilu akuerisaasimalluni. Qisummilli suliaqartuaannartuusimavoq. Kisianni ilinniartunit 30-nit pingasuinnaat sungiusarfittut ilinniarfissaminnik nassaarsimapput. Iluatsitsisunut ilaasimanngilaq taamaammallu allamik ujaasisariaqarsimalluni. Kingorna sanasutut ilinnialerpoq, taavali aappaa naartulerluni aappariillu ukiut marluk matuma siorna Nuummut uterlutik, ilinniakkani suli naammassinagu.
Illoqarfiit pingaarnersaannut utersimalermata Atlantic Musicimit sianersimapput, paasiniarlugu nipilersuutinik iluarsaassisinnaanersoq.
- Sivisuumik attugaqarsimanngilanga. Kisianni angerpunga, nipilersuullu attorakku piumassuseqaleqqissimanera malugisinnaavara, oqarpoq.
- Takorluugara pilersaarutigalu tassaavoq nammineq sannavittaarnissaq nipilersuutiliortartutullu inuuniuteqalernissaq.