Aaqqissuisuuneq innersuussivoq: Demokraatit unnerluusipput: Inatsisartuni Siulittaasoqatigiit mattussuipput

Demokraatit amerlasoorujussuariarlutik oqaatigisareerpaat: Inatsisartut namminneq aningaasaataannut tamat ILISIMASAQASSAPPUT. Soorlu aamma tamanna Naalakkersuisunut piumasarigipput.

Inatsisartut aamma namminneerlutik tamanna oqaatigisarpaat. Imaluunniit eqqortumik: Inatsisartut arlaleriarlutik aaliangertareerpaat. Sumilli pisoqarsimanngilaq. Kingumut qivialaarta…

Aaqqissuisuuneq innersuussivoq

Allaaserisaq una aviisimit AG-mit tigusaavoq, aaqqissuisuunermit Christian Schultz-Lorentzenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Ukiaanerani katersuunnermi 2018-imi Demokraatit siunnersuut una saqqummiuppaat:
”Aningaasartuutit suulluunniit Inatsisartunit taakkulu allattoqarfianit aningaasartuutigineqartut kikkunnit tamanit takuneqarsinnaanngornissaat pillugu taamatullu kikkut tamarmik paasiniaasinnaanngornissaat pillugu Inatsiartut Suleriaasiata allanngortinnissaanut Inatsisartut Siulittaasoqarfiat siunnersuuteqaqqullugu peqquneqarnissaanik Inatsisartut aalajangiiffigisassaattut siunnersuut”.

Isummerfigisassatut siunnersuut naammassillugu suliarineqarpoq taamaasillunilu aamma 2019 Upernaanerani katersuunnermi aaliangerneqarluni.

Taavalu isumaqarnarpoq, suliaq naammassisoq? Kisiannili naagga, tassami eqqumiitsorujussuarmik pisoqarpoq. Tassami sunnguamilluunniit susoqanngimmat! Siulittaasoqarfilli toqqarpaat, siunnersuut atortussanngortinneqanngitsutut isiginiarlugu.
Siulittaasoqatigiit naammattumik piffissaqarsimagaluarput allanik annertuunillu siunnersuuteqassallutik, piumaffigineqarsimanngikkaluarunilluunniit. Tamanna pivoq 2019-imi Ukiaanerani katersuunnermi aamma 2020-imi upernaanerani katersuunnermi. Siunnersuuteqarnerli, Inatsisartut saqqummiunneqarnissaannik aaliangeriigaat, Siulittaasoqarfilli taamaaliunngilaq. Oqaasertaqanngitsumik, nassuiaatitaqanngitsumik, utoqqatsernertaqanngitsumik, sunnguamilluunniit oqaaseqaratik.

Inatsisartuni Siulittaasoqarfik puussimapput, misissorneqarnissartik puussutigalugu. Inuit qinigaannakassaasa sussagamitigut, eqqarsarsimagunarput?

Taamatut piffissaq qinigaaffiusoq naavoq sunnguamilluunniit susoqarani, tassalu isummerfigisassatut siunnersuut atorunnaarluni, soorlu siunnersuutit tamanut taama pisartoq, piffissap qinigaaffiup iluani piviusunngortinneqanngitsunut. Taamaattumik Inatsisartunut ilaasortat akuttunngitsumik qinersiviup nutaap ingerlanerani siunnersuutigeqqittarpaat, siunnersuutit piffissami qinersiviusimasumi piviusunngortinneqarsimanngikkaangata. Naliginnaavoq, aammalu naleqqulluinnarlunilu, tassami Inatsisartut nutaat siuliani Inatsisartuusimasut isummerfigisaannut isumaqataanissaat pisariaqanngimmat.

Tamanna tunngavigalugu Demokraatit toqqarpaat piffissaagallartillugu isummerfigisassatut siunnersuut 2021-mi Ukiaanerani katersuunnermut saqqummiunniarlugu. Siunnersuummi ataatsimiinnermi oqaluuserisanut ilaareernikuummat, qularutiginngilluinnarparalu, siunnersuut piumasaqaataasut ilisimaneqartut inatsisitigullu piumasaqaataasut tamaasa malillugit pisimasoq aammalu piffissaq eqqorlugu kalaallisut qallunaatullu tunniunneqarluni.

Sumilluunniit kukkunertaqanngilaq, oqaluuserisassanullu ilannguteriaannaalluni isummerfigeqqillugulu, Inatsisartut nutaat kissaatigippassuk. Kikkulluunniilli tamarmik takusinnaasaattut, siunnersuut oqaluuserisassani ersinngilaq. Sunamita peqqutaava?
Demokraatit Inatsisartut Siulittaasoqarfianit tupinnaannartumik nassuiaammik tigusaqarput.

Paasisariaqarparput, Siulittaasoqarfik eqqarsarsimasoq namminneq ammanerulernissaq pillugu siunnersuusiorniarlutik. Tassa siunnersuut taanna upernaakkut 2019-imili, siullermeerluni akuerineqarmalli sanasinnaasimanngisartik namminneerlutik siunnersuutitut saqqummiunniaraat. Demokraatit Siulittaasoqarfimmi issianngippata taamaattumillu Siulittaasoqarfiup pilersaarutaat ilisimanagit. Ilisimalluinnarparpulli, Siulittaasoqarfiup qaqugukkulluunniit tamanna pitinnagu nalunaarfigisimanngikkaatigut, Inatsisartut imaluunniit innuttaasut, Siulittaasoqarfik taamaattunik pilersaaruteqartoq. Allatut oqarluni utoqqatsissut, tassunga tulluussagaq, aammaarlutik siunnersuut ikkukkumanagu, Siulittaasoqarfiup tungaanit nuannarineqanngitsoq.

Soorunami Demokraatit itigartitsineq naammagittaalliutigisimavaat, anneruniarpaluttumik itigartinneqaannarlutik, Siulittaasoqarfiup uteqqillugu, namminneq siunnersuut saqqqummiunniarlugu (tamannali aamma suli pinngilaq).

Inatsisinut tunngasortaa eqqarsaatigalugu Siulittaasoqarfiup pissusilersornera annertuumik qularnartuuvoq. Inatsit Tunngaviusoq § 41-mi oqarpoq, Folketingimi – aammalu tassa Inatsisartunut ilaasortat – inatsisissatut siunnersuummik saqqummiisinnaasut. § 22 Inatsisartut inatsisaanni Inatsisartunut Naalakkersuisunullu taamatorpiaq oqarpoq. Isummerfigisassatut siunnersuut taakku saniatigut piumasaqaatit malissavaat, § 33-mi takuneqarsinnaasut aamma § 40 (tunniussinissamut killigititaq) Inatsisartut suleriaasianni allassimasut.

Siunnersuut piumasaqaatit malillugit suliarineqarsimappat, ilaasortat pisinnaatitaapput siunnersuutimik katersuunnermut ilanngutsinnissaannut. Demokraatillu siunnersuutaata 100 procentimik piumasaqaataasut eqqortippai. Una, suliamut attuumassuteqanngilluinnartoq tassaavoq, Siulittaasoqarfiup siunnersuut iluarineraa. Tamammi oqartussaaqataaneranni taamaappoq – imaluunniit imaattussaagaluarpoq: Taamaattussaagaluarpoq, kisiannili taamaattussaajunnaarsimavoq. Siulittaasoqarfik mattussuinermik eqqussisimavoq, siunnersuutit Siulittaasoqarfimmit iluarineqanngitsut tunngavilersornagit utoqqatsissutipalaanik inatsisitigullu ittannerusaarlutik peertalerlugit, kialluunniit kanngutsilluni aappilliutigisinnaasaanik.

Massakkut Demokraatit siunnersuutaat peerneqarpoq aammalu mattunneqarluni tunngavilersorneqanngitsumik – tulliani partiit allat taamatut pineqassapput. Taamaattumillu innuttaasut inatsisitigut aallartitarissallugit toqqagaasa pingaarnertut pisinnaatitaaffimminnik arsaarneqarput – tassa siunnersuutiminnik saqqummiisinnaanerat innuttaasut sinnerlugit. Tamannalu pakatsinarluinnaqqissaarpoq!

Uuminnga ilanngussinitsigut Inasisartunut siulittaasoq Hans Enoksen eqeersarniarparput. Asasarput Hansi. Illit uagullu isumaqatigiinngittarpugut, kisiannili tatigisinnaajuaannarsimavarput, tamat oqartussaaqataanerannut innuttatsinnullu ajunnginnerpaamik suliniarusuttutit. Nikussaarit, piviusorlu takutillugu.

Powered by Labrador CMS