Aaqqissuisuuneq innersuussivoq: Demokraatit neqeroorut pitsaanerpaaq utaqqigaat
Naalakkersuisuni kina siulittaasunngussanersoq Siumup kisimi aalajangersinnaanngilaa. Qinersisartut aalajangiisuussapput – partiillu sinneri tulliupput. Minnerunngitsumik Demokraatit.
Qinersinissap piviusunngunnginnera sioqqullugu, Jens-Frederik Nielsenip Kim Kielsen Siumumi siuttutut taamaalillunilu Naalakkersuisuni siuttutut toqqissisimanarinerugaa ersarippoq.
Demokraatit siulittaasuat akerlianik Erik Jensenip Siumullu siulittaasoqarfiata nalunaarutigisaanik nikeriarnermut tatiginnippallaanngilaq.
Kisianni maanna qanoq inissippa?
Qinersinerup kingorna qanoq inississava – Kielsenip imaluunniit Jensenip eqqaanut?
– Tunngaviusumik partiit kina siuttunngortinneraa akuliuffigineq ajorpara. Pitsaanerpaamik isumaqatigiissusiornissaq uannut pingaarneruvoq, politikitsigullu sapinngisamik annerpaamik pissarsiaqarnissaq qulakkeernissaa, taanna akivoq.
– Taamaakkaluartoq Kielsenimut soorlu tatiginninnerusutit?
– Kielsenip pitsaaqutigaa, isumaqatigiissusiorfigigaanni maleqqissaassagaa qularutissaaneq ajorpoq. Ajoraluartumik Erik Jensenimut taama misigivallaanngilanga.
– Kisianni siulittaasuuffimi aallartinnerani siulersuisuunernit sunnertisimaneqarnera pissutaasinnaanerpa, aammalu nikiseqattaarneqalaarsimalluni?
– Taamatut naliliineq eqqortuusinnaalluarpoq. Kisianni ajoraluartumik Erik Jensen eqqumiitsumik misillerfigaara. Ilaatigut partiimi siulittaasunngoqqammerluni ingerlaannaq partiinik isumaqatiginninniarnerit aallartinnagit juullimi sulinngiffeqarluni aallarnera piviusorsiunngitsorujussuuvoq. Politikimi pisut ingerlaneranni iliuuseqartoqartarpoq. Qaammatit marluk aappaa avillugu utaqqisoqarneq ajorpoq, Jens-Frederik Nielsen oqarpoq.
– Kielsenimut isumaqataarpasinnerugaluarlutit, taassuma kisimi tapersersorneqarnissani naatsorsuutigineraa akerusunngiliuk?
– Naagga, soorunami maanna akisinnaanngilara. Inuk kinaagaluarpalluunniit apeqqutaatinngilara.
IA-mi?
Tamatuma peqatigisaanik Jens-Frederik Nielsenip aamma Erik Jensenip siulittaasutut nutaatut pissusilersornerani allatigut aamma ernumanartoqartillugu oqarpoq.
– Uagutsinnut nutaamik isumaqatigiissusiorniarnermini Siumumi gruppi tamakkerlugu tunuliaqutigigunanngikkaa ernumassuteqarfigalugu oqarpunga. Inatsisartuni siammasissumik suleqatigiinniarnermik ujartuiniarluni oqarneranik tamanna kinguneqarpoq. Partiini allani saniatigut taasinernik periarfissaasinnaasunik nassaarniarpoq, Siumumi taasinerit pigigunanngisaminut taarsiunniarlugit, Jens-Frederik Nielsen oqarpoq.
Erik Jensenip siulittaasunngornerani aalaakkaanngitsumik tunngaveqarnermik Demokraatit siulittaasuata oqariartuutit taamaattut takussutissatut isigai.
– Qinersinerup kingorna Demokraatit IA-mut tapertaasinnaannginnera imaluunniit naalakkersuisoqateqalersinnaannginnera ilinnut ajornartorsiutaasimassaaq, tassami tassani nalunaarutigineqarpoq, Kuannersuarni suliniut unitsinneqassasoq?
– Demokraatit partiimik inatsimmik unioqqutitsinissamik siunertaqartumik tapersersuisinnaanngilaq. Suliap inatsisitigut tunngaveqartumik ingerlanneqarnissaa suli aalajangiusimavara. Nunat allat aningaasaliisartullu Kalaallit Nunaannut tatiginninneranik ajortisaarineruvoq, taanna akivoq.
Aviisi AG uani pisiariuk: