Aaqqissuisuuneq innersuussivoq: Coronavirusertoqarnerani timigissartarfik soraarsitsisariaqarsimavoq
Nuummi timigissartarfimmi Fitness.gl-imi piginnittoq Allan Juhl coronavirusertoqalermat suliffeqarfiutini nammineq matusariaqarsimavaa.
Nuummi coronavirusertoqarnerani timersortarfiit timigissartarfiillu aamma eqqugaapput, eqqugaasunullu ilaavoq Nuummi Fitness.gl. Fitness.gl martsip 16-iani piginnittuata Allan Juhlip nammineerluni matusariaqarallarsimavaa tunillaassuuttoqannginnissaa anguniarlugu, Allan Juhlilu aamma sulisuminik soraarsitsisariaqarsimalluni.
- Coronavirusertoqarnera uagutsinnut sunniuteqartorujussuuvoq, allaat marlunnik sulisutsinnik soraarsitsisariaqarsimallunga. Tassunga peqqutaavoq coronavirusi qaangeraluarutsiguluuniit kinguneri suli malunnartussaammata, taavalu aningaasaqarniarnikkut isertitaqarniarnikkullu eqqugaaqqagatta soraarsitsisariaqarsimavunga, Allan Juhl oqarpoq.
Allan Juhlili neriuppoq soraarsitani coronavirusi qaangiussimalerpat ingerlalluaqqilerunillu atorfinitseqqikkumaarlugit. Matusariaqarnerlu aningaasaqarniarnikkut eqquiffiungaatsiarput.
- Assut eqqugaavugut, matunitsinninngaanniit massakkumut isertitaqanngiivippugut. Sulisut aamma akissarsiaqanngillat, tassa imaappoq sulinnginnamik akissarsisinnaanngikkallartut, Allan Juhl oqarpoq.
Fitness.gl-ip martsimi 2019-mi isertitai 400.000 koruuniupput, 2020-milu ingerlalluarnertik najoqqutaralugu isertitat amerlanerusussaagaluartut coronavirusertoqarnerani annaasaqaatigaat.
Ilaasortat annaasaqanngitsut
Fitness.gl-imi ilaasortat qanoq ikilitiginersut Allan Juhlip aamma oqaatigerusunngilaa, ikilingaatsiartulli oqaatigalugu. Ilaasortaareersulli annaasaqaatissaqanngitsut Allan Juhlip nassuiarpaa.
- Piffissami matumani ilaasortagut tamavimmik akiliisinngilagut, tamanna isumaqarpoq massakkumut matoqqanitsinni ilaasortaanermut akiliisitsinngitsugut aamma aallarteqqikkutta ilaasortat tamaavimmik annaasaqaratik akiliutigisimasaat ingerlaqqilissapput. Tassa systemitta torraqutaa taamatut inissiisinnaagatta, Allan Juhl oqarpoq.
Matoqqanissaq sivitsoqqittoq
Allan Juhlip neriuutigigaluarpaa Naalakkersuisut aalajangiussartik malillugu apriilip arfineq-pingajuanni ammaqqinnissallutik, kisiannili aprilip naanissaata tungaanut matoqqanissaq sivitsorneqarpoq, tamannalu timigissarfiutilimmut pakatsisitsivoq.
- Matoqqanissarput sivitsorneqarmat assut pakatsivunga, coronavirusertummi aqqanillit tamarmik iluarsereernikuummata. Eqqarsaraluarpugut namminersortutut sallaatsumik ammariartorsinnaassalluta taavalu avataaniit timmisartut tikittarunnaassasut, tassuunaatigut ingerlaqqissinnaassagatta. Assut pakatsinarpoq matoqqanissarput sivitsorneqarmat, Allan Juhl oqarpoq.
Ikiorsiissutit
Allan Juhl ikiorsiissutinut qinnuteqarsimavoq, akissutisinissarlu neriuuteqarluni utaqqivaa.
- Ikiorsiissutinik pissarsissagutta iluaqutaasorujussuussapput, massakkummi isertitaqanngiivippugut. Ikiorserneqaruttalu sulisut akissarsiassaannut taavalu annaasaqaatitta ilai matussusernissaanut atussavagut. Nerioqaangalu akuerisaassalluta, Allan Juhl oqarpoq.
Allan Juhlip ikiorsiissutit suli tigusimanngilai, isumaqarlunilu ikiorsiissutitut tunniunneqartartut annikippallaartut.
- Siorna martsimi 400.000 koruuninik isertitaqarpugut, uanilu ikiorsiissutinik ikiorneqassagutta annerpaamik 23.000 koruuuninik taamaallaat tunineqarsinnaavugut, taamaammat takorloorsinnaavoq uagutsinnut qanoq artornatigisoq pinngitsaalisamik matoqqatinneqarluta, Allan Juhl oqarpoq.
Soraarsitseqqittariaqarnerlu Allan Juhlip eqqarsaataanut ilaavoq, apeqqutaavorli ikiorsiissutit qanoq annertutigisut pissarsiarissanerlugit.
- Apeqqutaalluinnaqqissaarpoq qanoq annertutigisumik ikiorsiissutinik pissarsissanersugut. Tassuunakkummi takusinnaassavarput sukkut aamma sipaarniuteqartariaqarnerluta. Aap, soraarsitseqqittariaqassaagut, apeqqutaavorli.
Aviisimi Sermitsiami atuarnerusinnaavutit - aviisi uani pissarsiariuk: