Aaqqissuisuuneq innersuussivoq: Corona assigiinngitsupilussuarmik atugaavoq
Arnap utoqqasaap maluginngingajappaa. Alla anersaartuuteqartariaqarpoq. Niviarsiaraq hiistertartoq uissannguvoq. Arnaq 33-nik ukiulik biilimik aportissimasutut misigaaq. Inuit nappaammik nalaataqartut misigisaat uani atuakkit.
Pisut piviusuunngitsutut ipput. Eqqumeeqaat. Inuppassuarnulli nappaammik eqqugaasunut toqqaannartupilussuarmik misinnarpoq.
Qujanartumik amerlaqisut annikitsumik misigisarpaat.
Ilaasa napparsimallutik misigineq ajorpaat. Allanulli ajorluinnarsinnaavoq. Nunarsuarmi sumiiffinni tamani tusagassiuutit nunat napparsimmaviini angerlarsimaffinnilu matoqqatinneqartuni akiuuttut oqaluttuaat saqqummiuttarpaat.
48-nik ukiulik Amy Driscoll CNN-imut oqaluttuarpoq akunnialuit ingerlaneranni nappaatip malunniutai qanoq ajorseriarnersut.
- Ingerlaannaq napparsimasupilussuanngorpunga. Allaanginnami ajunnginnerulerniarlunga iliuuseqarsinnaanngitsunga, arnaq naalagaaffimmi Ohiomi Hudsonimi najugalik oqarpoq.
Amy Driscoll sillimmasiisarfimmi atorfeqarpoq. Tassanngaannaq allaffimmini qasusupilussuartut misigaaq. Angerlamut apuunnaniluuniit aamma kiaqalersimavoq. Innarpoq – unnuamilu anersaartorniarnermik ajornartorsiuteqarluni iterpoq. CNN-ip allaaserisaa naapertorlugu ipilersutut misigisimavoq.
- Timinni akiuuttoqarpoq, nassiaavoq.
Ullualunni peqqissaavimmeereerluni angerlarsimaffimmini mattusimasussatut angerlartinneqarpoq.
»Malugisaqanngilanga«
Nunarsuarmi allarluinnarmi Israelimi 73-inik ukiulimmut Rachel Bitonimut COVID-19-imik eqqugaaneq allarluinnartut misinnarpoq. Japanimi Yokohamap umiarsualiviani takornariartaassuarmi Diamond Princessimiittoq umiarsuarmi nappaalasoqalerpoq.
Umiarsuarmi coronavirusimik eqqugaasut katillugit 600-nit amerlanerupput. Arnaq utoqqasaaq Israelimiu aniguilluartut ilagaat. Ungasinngitsukkut nunagisaminut uterami mittarfimmi ilaquttaminit nuannaartunit tusagassiortunillu niuffiorneqarpoq.
Aviisi Jerusalem Post allappoq nappaateqarnini tamaat peqqissutut misigisimasimasoq toqqissisimallunilu.
- Misissuinerup takutissimanngitsuuppagu nappaateqartup nammineq tunillatsissimanini malugisimassanngikkaluarpaa, Jerusalem Post allappoq.
- Malunniuteqanngivippoq. Peqqissaavimmi iterama toqussutissannik napparsimasoralunga annilaangavunga, uninngatinneqarneralu tamaat kissarnersiorneqartuarpunga, puakka aagalu misissorneqartuarlutik – susoqanngilarli, Jerusalem Postimut oqaluttuarpoq.
»Biilinik aportilluni«
Aarhusimi Berlingskemit arnaq 33-nik ukiulik atiminik taaserusunngitsoq oqaloqatigineqarpoq, taannalu maannakkut Skejbymi Aarhus Universitetshospitalimi inimi matoqqasumi coronamik nappaateqarluni innangavoq. Arnap Skypekkut tusagassiortoq oqaluttuarfigaa, nappaateqarnini »allaanngitsoq lastbiilinik aportissimalluni«.
Ulluinnarni peqqinnissaqarfimmi sulivoq.
Arnaq Berlingskemit attavigineqarami ulluni sisamani uninngareersimavoq – peqqissiniarluni akiuulluni. Napparsimatilluni aamma inuusuttut kajumissaarpai nappaat ilumoorutissagaat – nammineq 33-nik ukioqarnini innersuussutigalugu:
- Nualluttarsimavunga arlaleriarlunga napparsimasarlunga, maannakkulli allarluinnaasoq nalunngilara. Malugisinnaasoraara coronavirusimik tunillanneqarsimallunga, Berlingskemut nassuiaavoq.
Nappaatip Norgemi ilaqutariit tamakkerlugit eqqorpai.
Eirik Bøkko ulluni arlalinni nualluuteqartutut misigisimavoq, Norgemi aviisi VG allappoq.
- Allat tunillassimasinnaasakka eqqarsaatiginerpaavakka. Namminermi ima peqqiitsiginngilanga peqqinnissara ernummatigalugu. Norgemili napparsimasutut siulliit ilaattut nalilerneqarneq nuanniippoq, VG-mut oqarpoq.
Nassuiaavoq kiaqarluni, peqqiilliorluni quersorlunilu. Ullut marlussuit ingerlareersut peqqinnerulaalersutut misigaaq ajorseriaqqilaarlunili.
- Nappaatip immikkoortuata aappaani nukillaanganerusutut misinnarpoq inuummarliorlunilu, oqarpoq.
Aamma ilaqutariinniittut allat napparsimalerput. Paniata angutaataa kiaqarluni niaqunngillunilu innangavoq. Pania inersimasoq isumaqarpoq nammineq tunillassimallugu.
- Ullualuit matuma siornagut orpippassuarni pisuttuarpunga inuit orninngisaannagaani. Tassanngaannarlu tillernera sukkatsippoq quersulerlungalu.
Maannakkut ajunnginneruvunga, VG-mut oqaluttuarpoq.
Ilaqutariit kaammattuutigaat nappaammik eqqugaasut naveertaqqunagit. Tunillatsikkamik iluatsinngitsumik misissortinniaraluarput. Maannakkullu naapertuungitsumik illoqarfinnguaminni Facebookikkut assuarineqarput.
Aappillertoq
71-inik ukiulik Richard Riisgaard perululerpoq Viborg Sygehusimillu unitsinneqarluni. Nulia Birthe Risgaard TV2-mut nalunaarpoq uini (sisamanngornerup unnuaani) anersaartuutilerneqarsimasoq, ilisimajunnaarsinneqarsimasorlu puaalu salinneqarlutik.
Nulia naapertorlugu uia puammigut KOL-imik nappaateqarpoq, tamatumali sanngiillisissimanngilaa. Ulluinnarni inuunerani. Taamaalilluni sisorarluni sukkaniunnermi Valaløbetimi peqataavoq sapaatit akunnerik pingasunik siusinnerusukkut. 30 kilometerini, TV2-mut nalunaarpoq.
Ungasinngitsukkut aappariit 50-inngortorsiorlutik katiffissiorput.
- Sivisunerulaartumik aappariikkusuppugut, nulia oqarpoq innuttaasunullu imaattumik nalunaaruteqarluni:
- Inuit pisut ilumooruttariaqarpaat. Maleruagassat malillugit! Taamaallaat utoqqat sanngiitsullu eqqugaanngillat.
TV2-mit Anita Kjærgaard tunillatsissimasumik ueqartoq oqaloqatigineqarpoq. TV-qarfimmut oqaluttuarpoq naggussamigut nukimmigullu anniarluni, nerisami mamai malugisinnaanagit naasinnaanagillu, ilaannikkullu aappillertarluni kissatsittarlunilu.
Kiaqarnermigut kiaguttaqaaq sulisut sinngusai oqorutaasalu puui taarsertariaqartarlugit.
Angut 49-nik ukioqarpoq, taamaalilluni »mianernartuniinnani«, puammigulli nappaateqarpoq taamaalilluni mianernartuulluni, TV2 allappoq.
Uissanngusoq
18-inik ukiulik niviarsiaq hiistertartoq Emma Schmidt, ulluni 16-ini angerlarsimaannartussanngorpoq. Aabenraa Sygehusimi paasitinneqarpoq napparsimalersimasoq.
Jyske-Vestkysten allappoq, anersaartornerminik ajornartorsiuteqartoq, niaqunngikkuni saannerillunilu. Kingorna ajorseriarpoq. Aamma uissanngulerpoq, sakissamigut naqinneqartutut misigimalluni kiaqarlunilu.
Maanna angerlarsimavoq.
Aviisumut oqarpoq inuummarliorujussuarani. TV-kut nangeqattartulianik isiginnaarpoq interneterlunilu. Ikinngutinili hiistinilu maqaaseqai.