Aaqqissuisuuneq innersuussivoq: Atornerlugaanermiit neriuummut asanninnermullu
Atornerlugaanerup kingornagut inuuneq qaamanerulerseqqinniarlugu qanoq iliorsinnaanerput pillugu eqqumiitsuliortoq Gukki Nuka isiginnaagassianillu ilitsersuisartoq Hanne Trap Friis eqqumiitsuliornikkut annertuumik suliniuteqarput.
- Eqqumiitsuliorneq qanoq oqaloqatigiinnermik pilersitsisinnaanersoq sammiuarsimavara.
Ilitsersuisartup Hanne Trap Friisip qulequttat ilungersunarsinnaasut isiginnaagassiarinissaat qungugineq ajorpaa. Aamma Kalaallit Nunaannut tunngatillugu. Taamaaliorsimavoq isiginnaagassiat nersualaarneqaqisut Angutivik Narsarsuarlu atorlugit.
Uani qaammammi assilialiornermik eqqumiitsuliortoq Killiliisamilu maligassiuisoq Gukki Nuka peqatigalugu nutaamik suliniuteqalerpoq, inuiaqatigiinni kinguaassiuutitigut atornerlugaaneq paqumigineqaqisoq mianernaqisorlu qulequtaralugit. Killiliisami maligassiuisut oqaasii, ullorsiutini allattugaat taalliaallu aallaavigalugit isiginnaartitsisartut sisamat isiginnaagassiami ”Tarnima Nammatai // Jeg bærer min sjæl” isiginnaartitsissutigissavaat.
Taaguutaani 2016-imi Gukki Nukap eqqumiitsuliaminik saqqummersitsinera ”Tarnip qupineri” aallaaviuvoq. Ukiut pingasut matuma siornagut eqqumiitsuliortoq isiginnaagassiornermilu ilitsersuisoq Tivolimi naapipput suliniuteqaqatigiinnissartik aalajangerlugu. Eqqumiitsuliortut marluk Isumaginninnermi aqutsisoqarfiup ataani Killiliisa attavigaat, taannalu suliniummut ammasupilussuuvoq, aallaqqaataaniillu suliniutip aningaasatigut periusissiornikkullu tapersernissaa aalajangerlugu.Teater freezeProductions Hanne Trap Friisip siuttuuffigisaa kingorna aningaasaateqarfinnut assigiinngitsunut qinnuteqarpoq suleqatigineqalerlunilu.
Tamatuma kinguneraa isiginnaagassiamik takutitsinissaq eqqumiitsulianillu saqqummersitsineq taamatut taaguuteqartoq, eqqumiitsuliortut sisamat suliaannik saqqummersitsineq; Jukke Rosing, Paarma Brandt, Rasmus Lyberth aamma Gukki Nuka, saqqummersitsinermut aamma akisussaasuusoq.
Saqqummersitsineq Katuami apriilip 22-ani ammarneqassaaq isiginnaagassiaq sapaatit akunnerani tulliuttumi sisamanngornermi apriilip 29-ani takuteqqaarneqassalluni.
Taalliat katsorsartinnerunngitsoq
Immaqa eqqarsartoqarsinnaavoq ”Tarnima Nammatai” isiginnaagassiaasoq takorusunngisaq. Qulequtaa oqimaatsuummat.
Tamannarpiarli tunngavigalugu Hanne Trap Friisip erseqqissarpaa isiginnaagassiaasoq isiginnaartunik neriuutissiiniartoq.
- Isiginnaagassiaanngilaq perorsaanermut katsorsaanermulluunniit tunngasoq, isiginnaagassiaavorli taallanik imalik attortinnartoq isiginnaartullu killissaannik qaangiinngikkaluarluni neriuummik asanninnermillu pilersitsisoq, Hanne Trap Friis AG-mut oqarpoq.
Nassuiaavoq isiginnaagassiami innarliinernik takutitsisoqarnavianngitsoq. Innarliinerit pillugit oqaluttuat takussutissatut, nipilersorneq atorlugu, assilissat atorlugit allatigullu oqaluttuarineqassapput, soorlu qitinnerit, erinarsorneq kisimiillunilu oqaluttuarneq aqqutigalugit. Isiginnaagassiaavoq katiterilluni periuseq atorlugu suliaasoq soorlu Angutivik taamaattoq.
Taamaallaat maannakkut nalilersuutit arlaqarnerusut atorneqassapput.
- Nipilersorneqarluarlunilu erinarsornertaqarluarpoq, ilitsersuisoq oqarpoq, kinguaariit pingasut iluanni sisamanik peqataasoqarluni: Misilittagartooq Rasmus Lyberth, inuusunnerusoq Klaus Geisler Karina Møllerilu, kiisalu inuusuttoq Nukakkuluk Kreutzmann 2018-imi Isiginnaartitsinermut ilinniarfimmit ilinniarsimasoq.
- Suleqatigiiupput nukittut sungiusarnerni nuannisaqatigiittut.
- Takutitsinerat inuunermik unnersiutiginninneruvoq. Inuunermi kusanartoqarsinnaasoq, naak kusanaatsunik nalaataqarsimagaluarluni, Hanne Trap Friisoqarpoq.
Nammineq kulturerisami ikit maminnerat
Isiginnaagassiami aamma ikit maminnissaat pineqarpoq.
Immaqalu maminnerup ilagaa nammineq kulturerisamut ingerlaneq imaanngitsoq nunagisamik pingaartitsivallaarniarluni, Hanne Trap Friis oqarpoq.
- Ikivut mamisinniarlugit tarnersornermut pulasinnaaneq tamatsinnut immaqa atuuppoq, oqarpoq.
Oqaluttuarpoq siusinnerusukkut isiginnaagassianut atatillugu maannakkut isiginnaagassiassaq Rasmus Lyberthip oqarneratuut ”kalaallit qalasiannut” tunnganerugunartoq.
- Imminut nassaareqinnissamut tunngavoq ikillu mamisinniarlugit kulturimut uterneq. Tamannaavoq isiginnaagassiami kissaatigineqartoq, oqarpoq.
Kalaallisut taaguutaa qallunaatuunngortikkaanni tassaavoq ”Det, sjælen bærer på” (tarnip nammatai). Misigisimasat nammannissaat pineqarpoq.
- Aqqusaarsimasat miserratigineqassanngillat. Immaqalu inuiaqatigiit puigorsinnaanatillu isumakkeerinnissinnaanngitsut aamma paasisariaqarpaat. Tamanna aamma ajunngitsuusoq, Hanne Trap Friis oqarpoq.
Suliassaqarfiit akornanni suleqatigiinneq
Aningaasaateqarfiit suleqatillu arlalissuit suliniut tapersersorpaat, isiginnaagassiaanermi eqqumiitsulianillu saqqummersitsinerup saniatigut aamma atuagaasoq, oktobarimi saqqummertussaq.
Pingaarnertut aningaasaliisut ilagaat Isumaginninnermut aqutsisoqarfik, isiginnaagassiamik ilitsersuisup Hanne Trap Friisip nersualaagaa, eqqumiitsuliornermut akuliutinngikkaluarluni tapersersuiumasimammat.
- Suliassaqarfiit akornanni suleqatigiinneruvoq torrallataasoq, sumiiffinni arlalinni takussaanngitsoq, oqarpoq.
Aamma Statens Kunstfond kiisalu aningaasaateqarfik Legatudvalg for Musik annertuumik aningaasaliisuupput, Aarhus Kommuni suliniummut annertuumut 2 million koruuningajannik aningaasartaqartumut maajimi Nuummi kujataanilu sinerissamilu angalaarunneqartussamut aningaasaleeqataavoq. Kalaallit Nunaanniit Katuaq, NAPA, Nunafonden aamma Grønlandsbanken aningaasaleeqataapput.
Hanne Trap Friisip oqaatigaa isiginnaagassiaq saqqummersitsinerlu ukiaru Kalaallit Nunaanni angalaarunneqassasoq. Aamma Danmarkimi eqqumiitsuliornikkut suliniut soqutigineqarpoq, taannalu Danmarkimi isiginnaartitsisarfinni Angutivittuulli takutinneqarumaarluni. Tamatuma saniatigut siunertaavoq isiginnaagassiaq saqqummersitsinerlu Nunani Avannarlerni Canadamilu takutinneqassasut.