Skip to main content

Aaqqissuisuuneq innersuussivoq:  Aslak aamma Theodora pilerigisaminni tigusaapput

Kalaallit politiit suleqatimik qallunaat akissarsiaasa nalinginut qanittumi kiisami qaffaavigineqarput. Neriuutigineqarpoq nalingiisitsilerneq politiinngorniartartut amerlanerulernerannik malitseqarumaartoq. Kingullermik qinnuteqartitsisoqarmat kisitsinngorlugu sisamanit ataaseq tiguneqarpoq. AG politiinngorniat ilinniarfianniippoq.

Nuup aqquserngini ullut arlaqanngitsut qaangiuppata nalinginnaasumik alapernaarsuitinneqarumaarput. Suliassaalli nalinginnaassanngillat. Politiinngorniammi suliassanut pilersaarusiorneqarsimasunut alapernaarsuinerisa nalaani tassanngaannartumik aggersarneqarumaarput, pisuni ilungersunartuni suleriarsinnaanerat misilittarneqassalluni.

Ullumili, tallimanngornermi, politiinngorniat arfineq-marluk imminnut qanillutik Nuummi politiinngorniat ilinniarfianni forvaltningsret-imi atuartinneqarput. Pissaanerummi pingasoqiusanngorlugu aggulussimanerani inatsisinik atuutsitsisutut inissisimanerminni inatsisinik atuutsitsinermut tunngasunik ilisimasaqartussaapput. Soorlu innuttaasut aalajangiiffigineqarsimagunik aalajangernermik allamut suliassanngortitseqqissinnaanerannut. Aatsaalli ingerlatitseqqiisinnaaneq inatsisit atuuttut malillugit periarfissaqarpat. 

Ataasinngornermili inatsisitigut aalajangersakkat ilinniaqqissaarneqassanngillat.

Taarsiullugumi pissutsit piviusut misileraaffigineqassapput.

Politiinngorniammi pisunut assigiinngitsunut marlunnut, tamarmik ilungersunartunut, suliaqariartortinneqarumaarput pisuni ilungersunartuni suleriarsinnaanerat misilittarneqarluni.

Suliassaraat aappariit imigassartorsimasut angerlarsimaffimmi eqqissiviilliornerat aamma imigassartorsimalluni biilertumik suliaqarneq.

Suliassaat misiliutaasussat tamarmik politeeqarfimmi atorfilinnit, pisuusaartitsillutik pissusilersortussanit, inuttaqartinneqassapput. 

- Politiiuneq tassa taamaappoq. Suliassat nikerarsinnaasorujuupput. Taamaammat allamut saariataarsinnaassuseqartariaqarpoq. Ilisimaneqarnermi ajorpoq suliassap tullia suujumaarnersoq. Taamaammat eqqarsartaatsikkut suliassanut allarluinnarnut saariarsinnaaneq piareersimaffigiuarneqartarpoq, Morten Skram-Skuldbøl oqaluttuarpoq.

Taanna Nuummi politiinngorniat ilinniarfianni, piffissami matumani arfineq-marlunnik ilinniartoqartumi, ilinniartitsisuuvoq. 

Politiinngorniat ilinniarnertik siorna aggustip aallaqqaataani aallartippaat. Aallartikkamik arfineq-pingasuupput, kisianni maanna qaammatit qulit qaangiussimalerneranni ataaseq atuarunnaarsimavoq.

- Kalaallit Nunaanni politiinngorniarneq ataatsimut isigalugu soqutigineqartorujussuuvoq. Danmarkimut sanilliutissagutta soqutigineqarnera assigaa. Tassa procentinngorlugu, Morten Skram-Skuldbøl oqaluttuarpoq.

Politiinngorniat ilinniarfiannut siorna 36-t qinnuteqarput. 22-t ilinnialersinnaanerlutik misilitsittut arfineq-marluk akuerineqarput.

Aslakip pilerigisaa

Politiinngorniat tamarmik inimi atuarfigisaminni ilinniartinneqarnertik malinnaavigaat. Malinnaajutigalutik ilaatigooriarlutik qarasaasiaminnut eqqaamasassaminnik allattarput. Taakkualu ilagaat Aslak Drechsel. Taanna 24-nik ukioqarpoq Nuumminngaanneerlunilu. Politiit qullii tungujortut ikittaartut aamma nilliatitsissutaat nipiliortut, taavalu inupilunnik tigusarinnissinnaaneq. Tassa kissaatigisimasai.

- Meeraallungali pileriginikuuara. Tassa politiinngornissara, oqarpoq.

Politiillu inunnik eqqissisimatitsinissaminnut pingaarnertut timikkut nukittuujusariaqarput. Taamaammat politiinngorniat ilinniarnerminni timikkut nukittorsarneq aallulluartarpaat.

- Timigassarneq ilaatigut sakkortusinnaasarpoq. Aammali atuagarsornermi suli ilikkagassaqangaatsiarpugut. Nikerartarpoq, taamaammat akiuutiinnartoqartussaavoq, oqarpoq.

Aslak Drechselip politiinngorniarluni atualernerminit misigisaa nuannernerpaaq tassaavoq inuttut ineriartornini, taassumalu oqarnera naapertorlugu atuaqatigit tamarmik ineriartuuteqarsimapput.

- Uannut tunngatillugu aamma inuiaqatigiit pillugit ilikkagaqangaatsiarpuunga. Aamma killissannik annertusaanermut.

- Assersuutigalugumi SAR-imik annaassiniarnermut misiliitinneqarpugut, tassani qulimiguulimmut amoorneqarpugut. Tamannalu killissannik qaangiilaarpoq, oqaluttuarpoq.

Nuna tamakkerlugu politiinut 147-nik atorfeqarpoq. Atorfiit tamarmik inuttaqarput. Kalaallit 103-it aamma qallunaat 44-t. Taamaammat atorfinnik inuttaqanngitsoqanngilaq. Kisianni qallunaani 44-ni 20-t Danmarkimiit ikiuiartortinneqartuupput.

- Danmarkimiit tikisitsisaratta Kalaallit Nunaanni atorfinnik inuttassaaleqisoqanngilaq. Qallunaat sivikinnerusumi sivisunerusumiluunniit ikiuukkiartorlutik tikittarput, Morten Skram-Skuldbøl, oqaluttuarpoq.

Akissarsiat soqutaanngillat

Kalaallit politiivisa suleqatimik qallunaat aningaasarsiaasa nalinginut inississinnaanertik sapaatip akunnerata siuliani qulakkiikannerpaat. Tamanna pivoq kalaallit folketingimi ilaasortaatitaasa marluk danskit inatsisinut atortitsinermut ministerianut kalaallit politiivisa akissarsiaasa qaffaavigineqarnissaanut isumaqatigiissuteqareersullu.

- Suli inissivinngilaq aningaasaliissutigineqartut qanoq aggulunneqarnissaat. Kisianni folketingimi ilaasortat marluk nalunaaruteqareernerattut Justitsministeriaqarfimmit tapiliisoqarniarpoq Københavnimi politiit akissarsiaatut inissikannernissamut naleqquttunik. Taamaaliornikkut qallunaat politiivisa akissaataannut nalimmassartoqarsinnaalissaaq, Kalaallit Nunaanni politiit peqatigiiffianni siulittaasoq, Jesper Fleischer, oqarpoq.

Jesper Fleischerillu neriutigaa akissaatit qaffanneqarnerat nunatsinni politiissarsiortarnermut iluaqutaajumaartoq. Isertugaataanngilarmi kalaallit politiit suliffinnut akissaatiginnerusunut nuuttarnerat.

- Kialluunniimmi nuannarisinnaanngilaa suleqat sanilerisaq aningaasarsiaqarnerusoq suleqatigissallugu. Iluarsiissuteqartoqanngippallu, aamma suliffeqarfinnit allanit politiitut ilinniarsimasut piumaneqarluartarmata, akissaatiginnerusunut, aamma sumi inunngorsimaneq aallaavigalugu akissaatitigut assigiinngitsiviunngitsumut, nuuttoqartuartassaaq, Jesper Fleischer oqarpoq.

Theodora Rosing-Zethsen politiinngorniat ilinniarfimmii inimi atuartitsiviusumi atuaqataavoq. Tassunga politiitut ilinniarsimasutut aningaasarsiat isumaqarpallaanngillat.

- Uanga tamakkua eqqarsaatiginngilakka. Aamma reservebetjentioreernikuuvunga. Taamaammat nalunngilara Qallunaat Nunaanniit tikittoqartuaannartoq. Taakkua suleqatigisarpakka aamma aningaasarsiaat eqqarsaatigineq ajorpakka, oqarpoq.

Taassuma Aslak Drechselitut politiinngorniarnissani ukiuni arlalinni pilerigisimavaa. Tassa 15-nik ukioqarlunili meeqqat atuarfianni atuarallaramili. Taamanimi sapaatip akunnera aalajangersimasumik sammisaqarnerminni politiit sammisimavaat.

- Taamaaleriarlunga Vejle Idrætshøjskolimi ukioq ataaseq højskolerpunga. Taakani aamma politilinje samminikuuara. Tassa maanga qinnuteqarnissannut piareersarlunga, oqaluttuarpoq.

Taanna 161 centimeterisut angissuseqarpoq tuattuullunilu. Taamaammat ilinniarnerup timersornertaa tassunga sakkortusinnaasarpoq.

- Timersornertai uannut unammillernarsinnaasarput. Allanut naleqqiullunga uanga nukittoorujussuunngilanga aamma angisuujunngilanga. Taamaammat sungiusartilluta oqimaatsunik kivittaarinerit sanngiiffigisarpakka. Kisianni siumut ingerlarusaarpunga, oqaluttuarpoq.

Politiinngorniallu ataasinngornermi angerlarsimaffimmi eqqissiviilliorfiusumi aappariit kamaattut qanoq iliuuseqarfigissanerlugit nalilersussavaat. Pitsaanerpaassanerluni angut angerlarsimaffimmit qimagutitinneqarpat? Immaqaluunnit arnaq? Aamma sorliup najugaqarfiat attartugaraa imaluunniit pigivaa?

- Inunnut saaffiginninnissaq nuannarisuungakku, taamaalillunga politiinngorniarnissara aamma toqqarnikuuara, Theodora Rosing-Zethsen oqarpoq.

Morten Skram-Skuldbøl Nuummi politeeqarfimmi suleqatinilu ataasinngornermi sungiusaanissaminnut piareersimapput.

- Sianiissalikaarniarpugut, aalakoorluta aamma qinngarnarluta, pisuni soorlu taamaattoqarsinnaasarneratut. Tassa innuttaasut ilaanni taama pissuseqartarnerattut, Morten Skram-Skuldbøl oqarpoq.

Aviisi AG uani pisiariuk:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER