Aaqqissuisuuneq innersuussivoq: Amerika Avannarlermi aasaanerani sisorariartarfiit annersaat
Misigisassarsiornermik suliniummit angisuumit takornarianik misigisassarsiortitsiviusartusamit Sisimiut Kangerlussuullu akornanni aqqusinniornissaq utaqqineqarpoq.
Suliniut 2007-imili aallartissimavoq, maannalu Islandimeersoq Wings Capital hf Kalaallit Nunaanni suliffeqarfik Sikumiut ApS. Suleqatigalugu Aqqutikitsup sermiani ukioq kaajallallugu takornarianut najugaqarfimmik pitsaalluinnartunik misigisassaqartitsiviusussamik ineriartortitsinissamut
piareerpoq. Sumiiffimmut misigisassarsiornikkut ingerlatassarpassuit attuumassuteqartinneqarpoq, sumiiffillu Amerika Avannarlermi aasaanerani sisorariartarfiit annersaattut inissisimalersussatut
ilimagineqarluni, tamaanilu Aalborg Zoo suleqatigalugu Issittup uumasuinik uumasuusiviliornissamut aamma inissaqassalluni.
Sikumiut Svend Hardenberg siuttoralugu suliniummullu inuit tunuliaqutaasut peqatigalugit Greenland Venturep aamma Vækstfondenip suliniummut aningaasalersueqataanissaat
qulakkeersimavaat. Maannakkorpiaq Sisimiut Kangerlussuullu akornanni aqqusinissaq Arctic Circle Road apeqqutaavoq, Svend Hardenberg erseqqissaavoq.
Suleqatigiit suliniummut tunuliaqutaasut (Larseeraq Skifte, Klavs Møller, Lars Kristian Madsen aamma Henrik Müller Svend Hardenbergilu) ukiorpassuarni imminnut ilisarisimasariissimapput.
– Uanga suliniummut kingusinnerusukkut ilaalerpunga nunat tamalaat akornanni suleqatissarsiornermi isumassarsiallu angisuut piviusunngortinniarnissaannut aningaasaliisussarsiornermi ikiuunniarlunga. Nunat tamalaat akornanni soqutiginnittut
suleqatissallu pisariaqartut nassaariniarnerat iluatsissimavoq, Svend Hardenberg oqaluttuarpoq.
– Assersuutigalugu angalaqatigiinnik arlalissuarnik inuttalinnik Bjarke Ingels (illussanik titarsaartut suliffeqarfiannit BIG-imeersoq) siuttoralugu sermimi pissutsinik takuniaasitsisimavugut. Taakkua sumiiffimmik periarfissanillu takuniaallutik ulluni tallimani angalanerminni sisoqqallutillu qamuteralannik angalasaqattaarput.
– Taamatuttaaq 2019-imi upernaakkut Islandimeersut Wings Capital angalaqatigaavut, taamatuttaarlu sumiiffik tamaat takuniarlugu, qamuteralannik angalaarluta sisorarluta allanillu sammisaqarluta.
– Angalanermit tassannga angerlaratta Laarseeraq Skifte illumi qaavanukarpoq aaqqitassaqarluni, tamatumanilu ajutoorluni ajoraluaqisumillu nakkarluni alianaqisumik toqukkut qimagulluni. Inuunermini suliami piviusunngortinneqarnerata misigisinissaanut
qanillilluinnaruttorluni taamatut nalaataqarnera ajorluinnarpoq alianarluinnartuullunilu, Svend Hardenberg oqarpoq ilassuteqarlunilu:
– Maannakkorpiaq Klavs Møller suleqatigaara, taassumalu Larseeraq Skifte suliniummi ukiuni arlalinni suleqatigisimavaa.
– Taakkua ukiuni tamani Sisimiuni sisoraatinik timersornerup iluani eqeersimaartuusimapput sisorartarfillu kiisalu Arctic Circle Racemut nunap timaani sisoraatinik ingerlaartarfik qulakkeersimallugit.
Arctic Circle Road piumasaqaataasoq
– Maanna Aqqutikitsumi suliniutip nutaap akuerineqartinnissaata sumiiffimmilu misigisassarsiortitsinissamut akuersissutit pisariaqartut Namminersorlutik Oqartussanit pissarsiariniarnissaat pineqalerpoq, Svend Hardenberg oqarpoq, paasissutissiillunilu suliniut Qeqqata Kommuniani kommunalbestyrelsimit tapersersorneqartoq.
– Kisianni suliniummut tamarmiusumut piumasaqaataavoq Kangerlussuup Sisimiullu akornanni aqqusineqalernissaa – Arctic Circle Road.
– Inatsisartunit partiit angisuut aperisimavavut, taakkualu tamarmik aqqusinniornissamik suliniummik tapersersuipput. Suliniut aallartikkatsigu ukiut marluk matuma siorna aperivavut, maannalu politikerinit ilimasaarineq qanittukkut uppernarsarteqqissimavarput,
taamaattumik ungasinngitsukkut pisoqalernissaa neriuutigaarput, Svend Hardenberg oqarpoq.
Taanna paasissutissiilluni oqarpoq, Aqqutikitsumi suliniutip aqqusineq aningaasalersorumaaraa.
– Takornarianut ukioq kaajallallugu ineqarfimmi ingerlatanit pisortat isertitaasa aqqusineq akilissavaat, Svend Hardenberg nassuiaavoq – aqqusinerlu pilersinneqarniariarpat suliniutierpassuit allat aallartinnissamik soqutiginnittut aamma eqqaaneqarsinnaapput,
ilassuteqarluni oqarpoq.
Svend Hardenberg naliliivoq, kommunip aqqusinissaq nammineq aningaasalersorsinnaassagaa, imaluunniit sanaartornermik suliffeqarfik angisooq pisortat namminersortullu suliniutaattut OPP-tut aqqusinniortinneqarsinnaassasoq atuisunillu akiliuteqartitsisilluni. Taanna naliliivoq aqqusineq sukkasuumik imminut akilersinnaassasoq. Naak pisortat namminersortullu suliniutaat OPP akisunerussagaluartoq. Aqqusinerlu akilereerpat kommunip aqqusineq akeqanngitsumik pigilissavaa, soorunamilu siunissami aserfallatsaalineqarnera, aputaajaasarneq allallu
akisussaaffigilissallugit.
Sammisassatut ingerlatarpassuit
Naatsorsuutigineqarpoq aqqusinniornissaq aalajangiunneqareerpat pilersaarusiorneqareerpallu Islandimeersumut Wings Capital hf-imut aamma Danmarkimi Vækstfondenimut kiisalu Greenland Venturemut isumaqatigiissut pioreersut aallaavigalugit Aqqutikitsumi suliniutip
piviusunngortinniarnera ukiunik pingasunik sivisussuseqassasoq.
Sermimi qaqqanilu sermip eqqaaniittuni aasakkut ukiukkullu sammisassanut tamalaarpassuarnut inissaqassaaq. Takorluuisinnaaneq kisimi killiliivoq. Qamuteralannik angalaarnissamut, qimussernissamut sisoraatinik illinernut assigiinngitsunut majuartaatinullu marlunnut periarfissaqassaaq.
Sikumiut ApS.-ip Aalborg Zoomik tamaani Kalaallit Nunaata uumasuinik uumasuusiviliornissaq pillugu suleqateqalersimanera immikkut ittuuvoq.
– Takornariarpassuarnik kajungilersitsisinnaassasoq naatsorsuutigaarput, Svend Hardenberg nassuiaavoq.
Aviisi Sermitsiaq uani pisiariuk: