KL

DK

Aaqqissuisuuneq innersuussivoq: Aatsitassat qaqutigoortut amerikamiunit soqutigineqartut

Australiamiut aatsitassarsiorfiutaa Greenland Minerals Ltd. US Geological Survey-mik Kalaallillu Nunaanni oqartussanik suleqateqarluni Kujataani nunap sananeqaataatigut ilippanaatilinnik misissuivoq. Suleqatigiinnerlu tamanna kinamiut aningaasaliissuteqartartuinut akornutaanngilaq, oqarpoq GML-imi pisortaq.

Kujtaani nunap sananeqaataatigut ilippanaatillit annertoorujussuupput. US Geological Survey maannakkorpiaq ilaatigut Kalaallit Nunaanni oqartussat aatsitassarsiorfillu Greenland Minerals Ltd. suleqatigalugit ilippanaatilinnik misissuileruttorpoq. Qillerilluni misissugassatut tiguneqarsimasorpassuit tusintilikkuutaat, aatsitassanik qaqutigoortunik akoqangaatsiartut uani takuneqarsinnaapput
Trine Juncher Jørgensen

Aatsitassarsiorfiup Greenland Minerals Ltd.-ip, Kuannersuarni aatsitassanik qaqutigoortunik misissuisup, Kujataani nunap sananeqaataatigut ilippanaatillit paasisaqarneruffigerusullugit USA suleqatigalugu misissorpai.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 80 sianerfigiuk imaluunniit mail redaktion@sermitsiaq.gl allaffigalugu

– Sapaatip akunnerisa marluk kingulliit ingerlaneranni United States Geological Survey (USGS) aamma Grønlands geologiske undersøgelser suleqatigalugit Kujataani, tassunga ilanngullugu Kuannersuarni ilisimatuussutsikkut misissuisimavugut. Sapaatip akunneri taakku naammassisaqarfiulluarsimasut Kalaallit Nunaanni sumiiffiup nunap sananeqataanik pingaarutilimmik, aamma nunarsuarmi immikkut ittunik saffiugassaqarnerpaalimmik ilisimatuussutsikkut paasisaqarnerulersitsissapput, oqarpoq John Mair, nunarsuarmi sumiiffinni assigiinngitsuni suliniuterpassuarnut tunngatillugu USGS-imik suleqateqartarsimasoq. USGS-ip aamma John Mair ph.d.-mik aamma post.doc-imik ilisimatusarnerani tapersersortarsimavaa.

– Misissuinerit Kuannersuarni suliniummut malunnaatilimmik iluaqutaassapput. Aamma pingaaruteqarpoq oqaatigissallugu, Kuannersuarni suliniuteqarfiup ilisimatuussutsikkut misissorneqarnerani ilisimatusarfiit nunarsuarmi sumiiffinnit assigiinngitsuneersut arlalissuit ukiut ingerlaneranni suleqatigisarsimagatsigit, oqarpoq John Mair, amerikamiut Danmarkimi aallartitaannik, Carla Sandsimik, upernaaq ataatsimeeqateqarsimasoq.

– US Geological Survey peqatigalugu ilisimatusarnerput Shenghe Resourcesimut attuumassuteqanngilaq. USGS aningaasarsiutiginagu teknikkikkut ilisimatusarfiuvoq, aamma ukiut arlallit ingerlaneranni ilisimatusartorpassuit assigiinngitsut suleqatigisarsimavag

– Ataatsimiinnermi oqaluuserivagut aatsitassanut qaqutigoortunut tunngatillugu suliffissuaqarnerup sukkasuumik alliartornera aamma aatsitassanik qaqutigoortunik siunissami pilersuinissamut Kuannersuit pingaaruteqarnerat. Taamatuttaaq ilisimatuussutsikkut suliniutissaq oqaluuserivarput, aamma Kalaallit Nunaata kujataanut suliniuteqarfimmullu takuniaanissani soqutigalugu aallartitap oqaatigivaa. Aallartitap suliniummik takuniaanissamut soqutiginninnera suliniuteqarusunneralu qujamasuutigeqaarput. Aatsitassanik qaqutigoortunik, silap pissusaata allanngoriartorneranik killiliiniarluni nunarsuarmi oqaluuserineqartumut tunngatillugu pingaaruteqarluinnartunik pilersuinissamut Kuannersuit inissisimavoq. Tamatumunnga peqatigitillugu Kalaallit Nunaat periarfissaqarluarpoq suliffissuarnik suliffissanillu nutaanik pilersitsinissamut.

Piginneqataasut nunanit tamalaaneersut

Shenge kinameersoq Greenland Minerals Ltd.-mi 12,5 procentinik piginneqataassuteqarpoq, siusinnerusukkullu suliniummut piffissami sivisuumi peqataanissamut aningaasaliissuteqaqqinnissamullu soqutiginnissimalluni. Greenland Minerals Ltd.-p USA-mik suleqateqarnera aningaasaliissuteqartartut kinameersut attaveqarfigisarnerannut sunniuteqanngilaq, neriorsuilluni oqarpoq John Mair.

”Annertuumik periarfissaqarpoq” ambassadøri oqarpoq

Juulip naalernerani USA-mi ambassadøri Carla Sands USA-milu nunanut allanut ministereqarfimmi nukissiornermut immikkoortortami pisortap tullersortaa Kent D. Logsdon Kommune Kujallermi borgmesterimik Kiista P. Isaksenimik atorfilittaannillu ataatsimeeqateqarput, ilaatigut aatsitassarsiornerup iluani Kalaallit Nunaata kujataani aningaasatigut ineriartorfiusinnaasut oqaluuseralugit. USA-mit aallartitat aamma nunap immikkortuani aatsitassarsiornikkut periarfissat timmisartumiillu qalipaatit atorlugit (hyperspektral) misissuineq maannakkut ingerlanneqartoq pillugit kommunimi ujarassiornikkut immikkut ilisimasalik Ole Christiansen oqaloqatigalugu, misissuinerillu inernisa Kalaallit Nunaanni nunap immikkoortuani aatsitassaqarluartumi aatsitassarsiulernissamut periarfissat nutaat takutikkumaarpaat. Taamatut anguniagaqarnerit USA-mi nunanut allanut ministereqarfimmi nukissiornermut immikkoortortap aatsitassanullu Naalakkersuisoqarfimmiittut ataatsimoorlutik aquppaat. Misissuinerit aggustip aallartinnerani naammassissapput teknikkikkut misissueqqissaarnermik kinguneqarlutik. Ataatsimiinnermi ilaatigut Carla Sands oqarpoq, ”sumiiffimmi tassani aatsitassanik pisuussuteqarnissaanut periarfissat annertuujusut, Kalaallillu Nunaata aningaasaqarnerata nukittorsarneqarlunilu tamatigoornerulernissaanut ikiuukkusulluni”. Aamma ”USA Kalaallit Nunaannik suleqatigiinnissamut piareersimasoq, ilinniarnissamut periarfissat annertusillugit pitsanngorsarlugillu ilaatigut aatsitassarsiornerup iluani”. Kujataani tikeraarnermini Carla Sandsip aamma ingerlatseqatigiiffimmit Greenland Minerals Ltd-mit aallartitat oqaloqatigai, kiisalu aatsitassarsiutileqatigiiffimmi Tanbreezimi pisortaq Greg Barnes.

– US Geological Survey peqatigalugu ilisimatusarnerput Shenghe Resourcesimut attuumassuteqanngilaq. USGS aningaasarsiutiginagu teknikkikkut ilisimatusarfiuvoq, aamma ukiut arlallit ingerlaneranni ilisimatusartorpassuit assigiinngitsut suleqatigisarsimavagut, sulilu taamaaliortarniarluta. Suliat taama ittut, suliniummik ilisimatuussutsikkut paasinninnissamut aamma soqutigisalinnut tamanut ilisimatusartartunullu arlalinnut iluaqutaasartut nuannaarutigisarpavut.

– Greenland Minerals Ltd. nunani tamalaani piginneqataasorpassuaqarpoq, amerikamiut europamiullu piginneqataasut amerlanerpaallutik, taamaammat matumani suliniut nunanit tamalaanit tapersersorneqartoq pineqarpoq. Suliniutip ineriartortinneqarnissaa piginneqataasunit tamanit kissaatigineqarpoq, tassa aatsitassanik qaqutigoortunik pingaarutilimmik piffissamilu sivisuumi nunarsuarmi suliffissuarnut sullitanullu pilersuisunngortineqarnissaa kissaatigineqarpoq. Shenghe aatsitassanik qaqutigoortunik suliarinnittarnermi siuttuuvoq, aamma aatsitassarsiorfiup Mountain Pass-ip USA-mi aatsitassanik qaqutigoortunik piaaffituaasup ingerlanneqarnerani qitiusumik suliaqartuuvoq. Kuannersuarni suliniutip iluatsitsiffiulluarnissaanut Shenghep tunniussimalluni sulisarnera iluaqutaalluartussaavoq, oqarpoq John Mair.

Aviisi Sermitsiaq uani pisiariuk:

nunatsinnit inuussutissarsiutit
Powered by Labrador CMS