Aaqqissuisuuneq innersuussivoq: Aatsitassat qaqutigoortut amerikamiunit soqutigineqartut
Australiamiut aatsitassarsiorfiutaa Greenland Minerals Ltd. US Geological Survey-mik Kalaallillu Nunaanni oqartussanik suleqateqarluni Kujataani nunap sananeqaataatigut ilippanaatilinnik misissuivoq. Suleqatigiinnerlu tamanna kinamiut aningaasaliissuteqartartuinut akornutaanngilaq, oqarpoq GML-imi pisortaq.
Aatsitassarsiorfiup Greenland Minerals Ltd.-ip, Kuannersuarni aatsitassanik qaqutigoortunik misissuisup, Kujataani nunap sananeqaataatigut ilippanaatillit paasisaqarneruffigerusullugit USA suleqatigalugu misissorpai.
– Sapaatip akunnerisa marluk kingulliit ingerlaneranni United States Geological Survey (USGS) aamma Grønlands geologiske undersøgelser suleqatigalugit Kujataani, tassunga ilanngullugu Kuannersuarni ilisimatuussutsikkut misissuisimavugut. Sapaatip akunneri taakku naammassisaqarfiulluarsimasut Kalaallit Nunaanni sumiiffiup nunap sananeqataanik pingaarutilimmik, aamma nunarsuarmi immikkut ittunik saffiugassaqarnerpaalimmik ilisimatuussutsikkut paasisaqarnerulersitsissapput, oqarpoq John Mair, nunarsuarmi sumiiffinni assigiinngitsuni suliniuterpassuarnut tunngatillugu USGS-imik suleqateqartarsimasoq. USGS-ip aamma John Mair ph.d.-mik aamma post.doc-imik ilisimatusarnerani tapersersortarsimavaa.
– Misissuinerit Kuannersuarni suliniummut malunnaatilimmik iluaqutaassapput. Aamma pingaaruteqarpoq oqaatigissallugu, Kuannersuarni suliniuteqarfiup ilisimatuussutsikkut misissorneqarnerani ilisimatusarfiit nunarsuarmi sumiiffinnit assigiinngitsuneersut arlalissuit ukiut ingerlaneranni suleqatigisarsimagatsigit, oqarpoq John Mair, amerikamiut Danmarkimi aallartitaannik, Carla Sandsimik, upernaaq ataatsimeeqateqarsimasoq.
– Ataatsimiinnermi oqaluuserivagut aatsitassanut qaqutigoortunut tunngatillugu suliffissuaqarnerup sukkasuumik alliartornera aamma aatsitassanik qaqutigoortunik siunissami pilersuinissamut Kuannersuit pingaaruteqarnerat. Taamatuttaaq ilisimatuussutsikkut suliniutissaq oqaluuserivarput, aamma Kalaallit Nunaata kujataanut suliniuteqarfimmullu takuniaanissani soqutigalugu aallartitap oqaatigivaa. Aallartitap suliniummik takuniaanissamut soqutiginninnera suliniuteqarusunneralu qujamasuutigeqaarput. Aatsitassanik qaqutigoortunik, silap pissusaata allanngoriartorneranik killiliiniarluni nunarsuarmi oqaluuserineqartumut tunngatillugu pingaaruteqarluinnartunik pilersuinissamut Kuannersuit inissisimavoq. Tamatumunnga peqatigitillugu Kalaallit Nunaat periarfissaqarluarpoq suliffissuarnik suliffissanillu nutaanik pilersitsinissamut.
Piginneqataasut nunanit tamalaaneersut
Shenge kinameersoq Greenland Minerals Ltd.-mi 12,5 procentinik piginneqataassuteqarpoq, siusinnerusukkullu suliniummut piffissami sivisuumi peqataanissamut aningaasaliissuteqaqqinnissamullu soqutiginnissimalluni. Greenland Minerals Ltd.-p USA-mik suleqateqarnera aningaasaliissuteqartartut kinameersut attaveqarfigisarnerannut sunniuteqanngilaq, neriorsuilluni oqarpoq John Mair.
– US Geological Survey peqatigalugu ilisimatusarnerput Shenghe Resourcesimut attuumassuteqanngilaq. USGS aningaasarsiutiginagu teknikkikkut ilisimatusarfiuvoq, aamma ukiut arlallit ingerlaneranni ilisimatusartorpassuit assigiinngitsut suleqatigisarsimavagut, sulilu taamaaliortarniarluta. Suliat taama ittut, suliniummik ilisimatuussutsikkut paasinninnissamut aamma soqutigisalinnut tamanut ilisimatusartartunullu arlalinnut iluaqutaasartut nuannaarutigisarpavut.
– Greenland Minerals Ltd. nunani tamalaani piginneqataasorpassuaqarpoq, amerikamiut europamiullu piginneqataasut amerlanerpaallutik, taamaammat matumani suliniut nunanit tamalaanit tapersersorneqartoq pineqarpoq. Suliniutip ineriartortinneqarnissaa piginneqataasunit tamanit kissaatigineqarpoq, tassa aatsitassanik qaqutigoortunik pingaarutilimmik piffissamilu sivisuumi nunarsuarmi suliffissuarnut sullitanullu pilersuisunngortineqarnissaa kissaatigineqarpoq. Shenghe aatsitassanik qaqutigoortunik suliarinnittarnermi siuttuuvoq, aamma aatsitassarsiorfiup Mountain Pass-ip USA-mi aatsitassanik qaqutigoortunik piaaffituaasup ingerlanneqarnerani qitiusumik suliaqartuuvoq. Kuannersuarni suliniutip iluatsitsiffiulluarnissaanut Shenghep tunniussimalluni sulisarnera iluaqutaalluartussaavoq, oqarpoq John Mair.
Aviisi Sermitsiaq uani pisiariuk: