Skip to main content

Aaqqissuisuuneq innersuussivoq: 22-nik ukiulik takorluukkaminik atuisoq

21-inik ukioqarluni Poca 770-imik umiatsiaqarneq nalinginnaasuunngilaq. Aalisartoq Nukappiannguaq Kruse AG-p naapippaa. Inuunera siunissamilu aalisartutut pilersaarutai paasisaqarfigikkit

Angutaa kikkut tamarmik nalunngilaat, taannami ernini aalisartutut perorsarniarlugu 2016-imi aalisarnermut naalakkersuisutut tunuarnikuuvoq. Eqqartugarput tassaavoq Karl Kristian Kruse, erne- raliuna kinaasoq? Nukappiannguaq Kruse inuussutissarsiutigalugu aalisartuullunilu piniartoq.

1998-imi julip pingajuani Uummannamami inunngorpoq, nunaqarfimmilu Niaqornani peroriartorluni.

Angutaataa aalisarnermut piniarnermullu tunngasunik ilinniartilluarsimavaa.

- Aalisartoqarfimmi peroriartorpunga, ukiukkut sikumi ningittakanik qaleralinniarlutalu saarullinniartarpugut, tamakku meeraanermi eqqaamasani nuannernersanut ilaapput, Nukappiannguaq Kruse ilaquttaminit Nukappimik taaguuteqartinneqartoq oqarpoq.

Arnaa Lona Kruse Niaqornaninngaanneerpoq, ullumikkulli uinilu Nuummi najugaqarlutik.

Nukappiannguaq marlunnik angajoqarpoq, Arne-Per Kruse nukkaminit ukiumik ataatsimik angajulliuvoq Nuummilu najugaqarluni. Taakku marluullutik ataataminnik angajoqarput Lars Christian Krusemik atilimmik, meeraanerminnilu nunaqarfeqatigaat.

- Nunaqarfitsinni 9.klasse piareeraanni Uummannamut atuartut angerlarsimaffiannukartarput meeqqat atuarfiat naammassiar- torlugu. Angajora Arne-Per Uummanniartussanngormat kajaannikuuvunga, taamanimi nunaqarfitsinni atuartut qulit missaannaaniippugut angajoralu qimakkusunnikuunngilara. Taamaariarmat Uuummannami atuartut angerlarsimaffianniinnissannut siusinaarlunga qinnuteqarnikuuvunga akuerineqarlungalu, naliginnaasumiillu sioqqutsinerullunga Uummannamut atuariartorlunga, Nukappiannguaq Kruse AG-mut oqaluttuarpoq. Angerlarsimaffik sungiusimasani qimakkaluarlugu angerlarserpallaartarsimanngilaq.

- Niaqornaniit Uummannamut isorartunngilaq, sapaatit akunnerisa naaneranilu angerlalaarnissamut periarfissaqartarluni, Nukappiannguaq Kruse oqaluttuarpoq.

Qilaluarniarluni atuanngitsoorneq

Nukappainnguup meeraanerata nalaani nunaqarfiat 60-it missaannaani innuttaqarpoq.

- Meerarpassuunngikkaluarluta sammisassaaleqineq ajorpugut, aasaanerani isikkammik arsaannangajattarpugut, ukiuuneranilu uanga inuuninnut qimusserneq aqissiliarnerlu ilaalluinnalersarput, Nukappiannguaq oqaluttuarpoq.

Nukappiaqqat qimminik qimuttoqarfimmiut allat assigalugit Nukappiannguup qimusserneq nuannarisorujussuuaa.

- Niaqornarmiuugallaratta ukiumi ullut tamapajuisa qimussertarpunga. Ataataga 20-it missaannik amerlatigisunik qimmeqarpoq, kisianni uanga inersimasut pingasut nutaqqanik ilallugit qimusseraatigisarnikuuakka, 20-immi artorlugillu aqussinnaannginnakkit, Nukappiannguaq Kruse oqarpoq.

Leiff Josefsen

Novemberi qaammat nunaqarfiata eqqaani qilalukkat qernertat takkusimaartarput, tamatumalu nalaa meeqqamut pinialerituumut atuarfimmiiffissaanngivittarpoq.

Atuartussaagaluarluni atuanngitsoorluni ataatani qilaluarniaqatigisarpaa.

- Ataataga qilaluarnialeraagat angajoralu ilangisarparput naak atuartussaangaluarluta, taamanikkummi naliginnaasuuvoq, Nukappiannguaq qungujulluni oqarpoq. Taassuma kalaalimerngit mamaril- luinnarpai, tuttu panertoq nammineq piliani soorunalimi aamma mattak mamarinersaavai.

Ukiup affaa gymnasiami

Nukappiannguup angutaa 2013-imi Inatsisartunut qinersinermi qinigaavoq Nuummullu nuullutik.

- Ukaliusap atuarfiani 10.klasse aallartippara. Taamani Nuummiippiarnikuunnginnama tupaallaqqaarpunga. Nuuk Uummannamiit Niaqornaniillu angineroqaaq. Atuarfimmi aallarteqqaarama nipaarluuvunga tunuarsimaartuullungalu, sukkasuumilli sungiussivunga aamma ilinniartitsisut nuanneramik ikiuukkusuttorujussuullutillu, uangalu taamani atuarusullunga, Nukappiannguaq Kruse oqaluttuarpoq.

Taassuma Nuummi meeqqat atuarfiat naammassivaa, avannaanilu ilinniarnertuunngorniarfimmut

Aasianniittumut qinnuteqarpoq akuerineqarlunilu, aallartilluarpallaanngilarli.

- Avannaaniikkusukkama Aasiannut qinnuteqarnikuuvunga, kisianni aallartikkama eqqisisimavallaanngilanga. Inuusuppunga aatsaallu angajoqqaakka qimallugit, taamaammat inuunera torerpallaarnikuunngilaq, Nukappiannguaq oqarpoq nangillunilu:

- Kammalaatikkalu unnuaannarmi eqqumaartarpugut, naggataatigut atuanngitsoornikka amerlavallaalerput, ajorpoq. Taamaattumik aalajangerpunga Nuummut angerlarniarlunga tamannalu decemberip qaammataani pivoq, Nukappiannguaq Kruse ukiup affaa Aasianniinnilersaarpoq.

Qaammatit arfineq pingasut uninngareerluni GU Aasianni aallarteqippaa, sivisunerulaartumik ingerlakkaluarpaa imminulli ilikkarnerusimavoq.

- Malugisalerpara aalisartunngorusullunga. Taamaattumik atuarnera 2015-imi februarip qaammataani unitsippara Nuummullu uterlunga, inuusuttoq aalisartuullunilu piniartuusoq oqaluttuarpoq.

Nuummut pigami angutaa naalakkersuisutut atuuffeqarluni ulapittaqaaq, ernerminullu aalisartunngorusuttumut piffissaqarpallaartorsuusarani. Piffissaq siulleq Nukappiannguamut susassaaleqiffiusimavoq.

- Susassaaleqisarpunga, kisiannili kammalaatitta Edvardip umiatsiamini inuttanngoqquaanga qaleralinniartorlu ikiortalerpara, Nukappiannguaq oqarpoq.

Ullaamiit unnummut aalisarneq

Nukappiannguaq Krusep inuttaasimanini nuannaraa, namminerli umiatsiartaarnissani akuersissutitaarnissanilu sinnattorisarpai.

- Aalisartoorusuppunga namminersortoq, ataataga uanga piinnarlunga naalakkersuisutut tunuarmat qujamasunnikorujuuvunga. Meeraaninniillimi piniaqatiginissaa nuannarinerpaasarpara ilinniartikkusuppaangalu. Tamanna uannut isumaqartorujuuvoq, Nukappiannguaq Kruse oqaluttuarpoq.

Ukiorlu ataaseq qaangiutinngitsorluunniit nammineerluni Poca 600-imik 200-mik sakkortussusilimmik motorilimmik pisisinnaanngorpoq. Qaleralinniarnissamulli saarullinniarnissamullu akuersissummik utaqqeqqaartariaqarsimalluni.

- Umiatsiartaareerlunga akuersissut utaqqingaatsiaqqaarpara. 2017-imi martsi qaammat umiatsiartaarama aatsaat aasakkut akuersissutitaarpunga, taamanikkut ajornarnikuunermut, Nukappiannguaq oqaluttuarpoq. Taanna aalajangersimasunik sunngiffimmini soqutigisaqanngilaq, inuusuttullu allat assigalugit unnuakkut illoqarfissiortorsuunani.

- Aalisartuuvunga namminersortoq, ullaaralaamiit unnuttalerlugu sulisinnaasarpunga, taamaammat sunngiffinga ilaquttannut angalanissamalu tulliata piareersarneranut atorniartarpara soorunami kammalaateqarsimaalaartarpunga. Aalisartuulluni ajornannitsuunngilaq taamaammat piffissaq atorluartariaqarpoq, Nukappiannguaq Kruse oqarpoq.

Politikkimik soqutigisaqanngitsoq

Sapaatit akunnerata siuliani Nukappiannguaq Kruse ullup ataatsip iluani tonsi sinnerlugu qaleralinnik pisaqarpoq.

- Ullut kingulliit Ameralik qaleralilerujuuvoq. Aalisartunngoramali qalerallit angissutsimikkut nikinnikuunngillat, Nukappiannguaq unnersiorpoq. Taassuuma aamma sinerissap qanittuani aalisapiluttoqarneraaneq upperinngilaa, akerlianilli avataasiortunut ernummateqarluni.

- Inuit qinikkallu sinerissap qanittuani aalisapiluttoqarnerarlugu oqaluleraangamik kilisaatit avataasiortut uatsinnit pisaqarnerujussuusartut eqqaaneq ajorpaat. Taakkumi qalerallit tulattussaagaluit qalorsuarminnik pisarisarpaat uffa uagut oqummersaannarmik pisarisarigut, pinngittaalinagit, keerusuttut kisimik kiisarput, Nukappiannguaq Kruse tikkuaavoq.

Leiff Josefsen

Naak angunni assiginagu politikkimik soqutigisaqanngikkaluarluni Naalakkersuisut kukkusumik iliulertutut isigai, taakkumi Nuuk aalisarfittut aqutsiveqarfinngortikkusuppaat.

- Politikkimik imannak soqutigisaqanngilanga, qinersisoqaleraangalli malinnaalaartarlunga, taamaattoq isumaqarpunga Nuuk aqutsiveqarfinngortinneqartariaqanngitsoq ullumikkutullu ingerlaannassasugut, aalisarluarpugummi, Nukappiannguaq Kruse isummersorpoq. Nuup aalisarfia aqutsiveqarfiunngilaq aalisarsinnaasallu killilersugaanatik.

Nukappiannguup aasaq manna umiatsiani anginerusumik taarserpaa, Poca 770-imik V8-mik 300-imik sakkortussusilimmik motorilimmik. Umiatsiartaava anginerungaatsiarpoq inuttamillu pisariaqartitsilersimalluni.

- Juli naasoq ataatagalu assigiinnik umiatsiartaarpugut, siulianit angineroqaaq 2 tonsilu sinnerlugu usisinnaalluni. Aquttarfia initaqarpoq kiassaatilimmik, sinittarfeqarlunilu soorunami malungusunnarpoq, Nukappiannguaq Kruse oqarpoq.

Umiatsiartaava nutaaq angutaata atserpaa Nanoq. Tamanna peqquteqannguatsiarpoq.

- Uumasuni nanoq pisarerusunnerpaavara imaluunniit aaveq, qungujulluni oqarpoq.

Avannaanut uterusuttoq

Sapaatit akunnerata siuliani aningaaseriviup Grønandsbankenip aalisartunut aningaasaliisarunnaarluni nalunaarutaa oqallisigineqangaatsiarpoq. Aalajangerneq tamanna Nukappianguaq Krusep paasisinnaanngilaa.

- Oqallinnermut malinnaanngikkaluarpunga. Kisianni umiatsiartaalerama Grønlandsbankimut atornikuuvunga, nammineerlunga umiatsiap nalingata 40 procentia akilerpara 60 procentialu bankimut taarsigassarsillunga akilerlugu. Aalisartuulluni bankimut taarsigassarsisinnaaneq iluaqutaasorujussuungaluarpoq. Piniutigut atortussallu akisupput taamaattumillu bankimut atorniartariaqartarpugut, Nukappiannguaq Kruse oqaluttuarpoq.

Aningaaseriviulli aalajangernera siunissami nunatta avannaanut angerlarusuttumut nalorninartorsiortitsilinngilaq.

- Avannaani qilalugarniarneq nuannareqaara, aalisarfiilu qaatuussaralugit. Kisianni naluara sumorpiaq qaqugulu nuussanerlunga. Takorloorsinnaavara Ilulissanuunngikkuni Uummannamuussasoq. Aammali nunaqarfimmik misilitaqarusuppunga tassalu Saqqaq, kisianni Niaqornanut uteqqinnissara naatsorsuutaanngilaq ukiorli ataaseq immaqa najoqqissinnaavara, Nukappiannguaq Kruse siunissami aalisartuuginna- rusuttoq naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER