Arsaannermi GM
Aaqqissuisussarsipput: Aappaagu GM Qasigiannguaniissaaq
Arsaattartut kattuffiat GBU aappaagu pissartanngorniunnissanik piareersaalluni aallartereerpoq
Kugsak-45 Qasigiannguaneersoq angutit inersimasut aappaagu GM-qarnissaannik aaqqissuisuusussanngorpoq. Arnat inuusuttuaqqallu unammersuarnissaannut aaqqissuisuunissamut qinnuteqaatit utaqqimaarneqarallarput GM-it allat sumiinnissaasa aalajangiiffiginissaanut.
GBUp oqaluttuarisaanerani aatsaat aappassaa GM-ip naggataarneqarnera Qasigiannguani pisussanngorpoq. Siullermik Qasigiannguani GM-qarpoq 2000-mi taamani finalemi Nagdlúnguak Kugsak-45-mut ajugaalluni.
Kugsak-45 aappaagu ukiunik 70-nngortorsiortussaagami GM-imik aaqqissuisuusussanngorpoq. Tamanna aamma Qeqertarsuup tunuamiut allat pissarsissutigissavaat tassa iligiit pingasut Qeqertarsuup tunuaniit peqataasussaammata.
Oktoberimi GM oqallisigissavaat
- Kugsak-45 aaqqissuisutut toqqaannartumik anngutissaaq. Ukiormanna unammersuariaaseq malinneqassappat Qeqertarsuup tunuaniit annguttut allat marluussapput, GBUp unammersuarnermut ataatsimiititaliaani siulittaasoq Gert Fleischer Sermitsiaq.AG-mut oqarpoq.
Avannaaniit annguttut ataasiussapput, Qeqertarsuup tunuaniit marluk, qeqqaniit marluk, kujataaniit ataaseq, tunumiit ataaseq aaqqissuisullu toqqaannartumik anngutissallutik.
GMip naggataarneqarnera Nuummi aggustip sisamaaniit pivoq unammersuarnerillu naggataarneqarnerisa inissinneqarnerat oqallisigineqartussanngorpoq.
- Sapaatip akunnerinnaannik akunneqartumik GM-it inissinneqarnerat klubbit aningaasaqarniarnerannut imaannaanngissinnaavoq. Angutimmi GM-qarnissaat sapaatip akunneranik sioqqullugu U-18-it arnallu GM-qarput. Taamaammat oktoberimi GBUp ataatsimeersuarnissaani tamanna oqaluuserineqassagunarpoq. Eqqarsaatigineqarsinnaavoq ukiormannamut sanilliullugu sapaatit akunnerinik marlunnik kingusinnerusukkut GM-rtoqarnissaanik siunnersuuteqartoqartoq, Gert Fleischer oqarpoq.