Aaqqissuilluni unammersuaartitsinissaq KAK-mit kinguartinneqarpoq
Nordic Futsal Cupip aappaagu aaqqissuunneqarsinnaanera KAK-mit neriuutigineqarpoq
Kalaallit Nunaat ukioq manna Nordic Futsal Cupimi aaqqissuussisussatut naatsorsuuteqarfigineqaraluarpoq.
Aaqqissuussinissarli kinguartinneqartoq kattuffimmit nalunaarutigineqarpoq.
- Nordic Cupip 2020-mi Nuummi ingerlanneqarnissaanut periarfissat misissorluarsimavagut, kisianni Skandinaviami angallannernik killilersuinerit, isiginnaartut amerlassusaata killeqarnissaat, 2020-mi decembarip qaammataani Nuummi avannaamioqatigiit pissartanngorniunnissaannut pilersaarutit eqqorlugit ingerlatsisoqarsinnaanersoq il.il. pissutigalugit aningaasatigut timersornermullu tunngasutigut qularnartulerujussuusoq ajoraluartumik paasivarput. Nunat Skandinaviamiittut tamarmiullutik isumaqatigiipput KAK-p aaqqissuisuunissani kinguartikkuniuk pitsaanerpaassasoq, KAK-mi siulersuisuni siulittaasoq Finn Meinel tusagassiutinut nalunaarummi oqarpoq.
Sverige aaqqissuussissagunartoq
Nalorninartut taaneqareersut saniatigut COVID-19 pissutigalugu UEFA-mi/FIFA-mi futsalimik unammiffiusussat Skandinaviamiut peqataaffigisassaat allannguuteqarsinnaapput Nordic Cupimullu peqataanngitsoornermik kinguneqartitsisinnaallutik.
- Taama inissisimanitsinnut ajuusaaraluaqaagut, aalajangiussaqarnissarpulli tassaniippoq timersornikkut kiisalu aningaasatigut qularnartut eqqarsaatigalugit, Finn Meinel oqarpoq.
Nunat Skandinaviameersut tamarmiullutik isumaqatigiipput 2020-mi unammersuartitsinissamut Sverigep aaqqissuisuunissani periarfissaanersoq misissussagaa.
Nordic Futsal Cup ukiut tamaasa nunanit ukunannga peqataaffigineqarluni pisarpoq: Danmark, Finland, Norge, Sverige aamma Kalaallit Nunaat. Pissartanngorniunnermi ajugaasut Nunani Avannarlerni pissartanngortarput.