Aaqqiagiinngissutinik qaangiiniartarneq: Oqaatsit atorneqartut matuersaataapput
Piorsarsimassutsikkut inuiaavugut aaqqiagiinnginnernik pinaveersaagaqartartut. Kisianni oqaluuserinerisigut ajornartorsiuterpassuarnik allivallaartinnagit aaqqiiviginnissinnaavugut, palasi soraarneq Jens-Kristian Kleist, 1990-imi ukiortaami unnuakkut inuusuttut arfineq-marluk toqutaammata illoqarfimmilu suli malugineqarsinnaasumik aliasunnersuarmik pilersitsisoqarmat Narsami palasiusoq, oqarpoq.
Suliamut ilisimasaqarpalaartumik akuersaarpaluttumillu inoqatinullu isiginnittaaseqarneq Jens-Kristian Kleistip ilisarnaatigaa. Jens-Kristian Kleist pillugu aviisini ilanngutarpassuit katinnerinit takutinneqarpoq, inuusoq tunniusimasorujussuaq, unammilligassanik akiuiniarusussinnaasartoq.
Tamakkuami amerlasimaqaat. Unammilligassat annersaat ukiut 32-t matuma siorna pisimavoq. Narsami ukiortaap ullaavani, Jens-Kristian Kleist oqaluffimmi oqaluussimmat ukiortaarlu nutaaq, 1990, pilluaqqummagu. Taamani palasitut ukiut sisamassaanni sulivoq.
Aviisi AG allappoq.
Ukiortaaq
Nerliiviliartitsinerup kinguninnguatigut oqaluffiup isaariaanukarpunga, inuit angerlakaannginnerini ukiortaami pilluaqquniarlugit. Tassanngaannaq angut inuusuttoq arpalluni sanioqquppoq suaarlunilu: - Unnuaq inuusuttut tallimat toqutaasimapput! Silarsuara tassanngaannaq unippoq, Jens-Kristian Kleist oqaluttuarpoq, ukiortaamilu naalagiartitsinermi saniatigut ulloq taanna nal. 13.00 Islandimiunik aappariinnik katititsisussaasimalluni.
Qanoq ilillunga katititsineq ingerlassinnaassavara illoqarfik toqoraanernik misigisaqaqqammersimappat? Jens-Kristian Kleist aperisimavoq. Qaqortumi provstimut sianerpoq siunersiorniarlugu. Pisut taakkua marluk imminnut akerleriilluinnarput.
Kisianni provsti akivoq, katititsineq ingerlattariaqariga. Isumaqarpunga tamanna katititsinerma ajornakusoornerpaartarigaat. Tassami illoqarfik toqoraasoqarsimanera pissutigalugu isasoorluinnaleruttortoq oqaluffimmiippunga aappariinnillu katititsillunga, Jens-Kristian Kleist eqqaamasani tunngavigalugit oqarpoq, tamannalu sioqqulllugu politiit attaveqarfigisimallugit, illoqarfimmi ilaqutariit kikkut ukiortaap unnuaani asasaminnik toqumut annaasaqarsimanerat paasiniarlugu.
Oqaluttuaq tamaat AG-mi sapaatip-akunnerani matumani saqqummersumi atuaruk, ugguuna iserfigisinnaavat: