Aappilattumi tunisassiorfik ammaqqinneqartoq

Qaanaamit ikiorneqarnikkut Royal Greenlandip Aappilattumi tunisassiorfini ammaqqissinnaasimavaa

Tunisassiorfimmi aqutsisoq suleqatitaanilu. Saamimmit: Tunisassiorfimmi aqutsisoq Justine Petersen, Pavia Alataq, Enok Kristiansen, Nuka Kristiansen aamma Erine Danielsen

Aappilattumi nuannattunnguaqarpoq. Qaanaammi tikisitat sisamat ikiorsiullugit Royal Greenlandip Aappilattumi tunisassiorfia tunisassioqqissinnaalerpoq. Royal Greenland tallimanngormat nittartakkamini taama allappoq.

- Inuit sisamat Qaanaameersut ikiorsiullugit tunisassiorneq ullumi aallarteqqipparput. Tunisassioqqissinnaalernitsinni Qaanaamit suleqatitaavut sisamat tulluusimaarutigeqaagut. Aalisartullu tuniseqqissinnaaleramik qungussataartorujussuullutillu qiimasorujussuupput, Justine Petersen Aappilattumi tunisassiorfimmi aqutsisoq oqaluttuarpoq.

Nuka Kristiansen 25-nik ukiulik Qaanaameersut sisamat ilagaat.

- Royal Greenlandi Aappilattumi sulisussaaleqisoq paasigakku Qaanaami Majoriamut saaffiginnippunga aperalungalu Aappilattumut suliartornissamut periarfissaqarsinnaannginnersoq. Qujanartumik tapersersorneqarpunga, ilakkalu pingasut Aappilattumut suliartorusunnersut aamma aperineqarsimapput. Massakkullu Aappilattumi aallartillualaavikkatta nuanneqaaq, Nuka Kristiansen unnersiorpoq.

Nuka Royal Greenlandip Uummannap tunisassiorfiani siornatigut sulereersimagami aalisakkanik tunisassiornermik misilittagaqalaarnerarpoq. Nammineq ilanilu pingasut Qaanaamiit Upernavimmut nalunaaquttap akunnera ataaseq minutsillu 45-t pingasunngormat timmisartuunneqariarlutik aammalu nalunaaquttap akunnerata affa umiatsiariarlutik unnuk taanna Aappilattumut apuupput.

- Qaanaami suliffissaaleqisorpaalunnut akuugaluarpunga, maannalu sulilerama iluaqaaq. Neriuppunga tunisassiorfimmi naammassinissaasa tungaannut ikiuussinnaajumaarlunga, Nuka Kristiansen oqarpoq.

Tunisassiorfimmi aqutsisoq oqaluttuarpoq suleqatitaatik sisamaasut qerititsiveqarfimmi tunitsivimmilu ilinniartinneqaleruttortut. Ataaseq 17-iinnarnik ukioqarmat eqqiaasumut ikiortinngortinneqarpoq.

- Naak tunisassiorfimmi tunisassiorneq aallartilluaraluartoq qerinasuartitsivinnillu ajornartorsiuteqarunnaaraluartugut qalerallit ilivitsuinnaat tunisassiarisinnaavagut, aatsaallu sulisut sisamanik allanik ilaqqereerutsigit qaleralinnik niaquiakkanik tunisassiorsinnaalissaagut, taamaakkaluartorli sulisut sisamat amigaativut pissarsiariniarsarineqaleruttorput, tunisassiorfimmi aqutsisoq oqarpoq.

Powered by Labrador CMS