Skip to main content

Aappilattumi eqqakkat anartarfiillu puui ulikkaarsimasut tipeqartitsingaatsiartut

Upernaviup nunaqarfiata ilaani eqqakkat anartarfiillu puui ulikkaaqqasut assartorneqarsinnaanngikkallarput. Eqqakkat anartarfiillu puui ulikkaarsimasut illut silataannut inissinneqaannartarput, ATV-t assartuutissaagaluit ajortissimammata.

Upernaviup eqqaani nunaqarfimmi Aappilattumi eqqakkat anartarfiillu puui ulikkaarsimasut aqquserngit sinaannut ilioraannarneqarsimapput. Upernaarsunni silaannarittussaagaluartoq, maanna eqqakkat attallu tipaannik taarserneqarsimavoq.

- Aputaarummat eqqakkat anartarfiillu puui nunaqarfiup iluani snescooterinit assartorneqarsinnaajunnaaramik. Tamassuma kinguneranik illut silataannut aqquserngullu sinaanut eqqagassat ajoraluartumik katersuutilerpagut, allatummi iliorsinnaannginnatta. Qimmiutillit qimmilivitik aamma salinnikuuaat, taamaattumik eqqagassaqarneruvoq, nunaqarfimmi aqutsisuini siulittaasoq, Karl Petersen Sermitsiaq.AG-mut oqaluttuarpoq.

Eqqakkat anartarfiillu puui ulikkaarsimasut eqqaavilerisumit anartarfilerisumillu ulluni makkunani trillebørit atorlugit assartorneqartariaqarput. Aqqusinerli ujaraaraannarnit sanaajummat tamanna suliaavoq piffissartornartoq.

Karl Petersen Aappilattumi, Naajaani Innaarsunnilu nunaqarfiit aqutsisuini siulittaasuuvoq, taanna ilisimatitsivoq eqqakkat suliarineqarneranut aaqqiissutissamik nunaqarfimmi aqutsisut arlaleriarlutik kommunimut saaffiginnittarsimasut.

ATV taarsertariaqarpoq

Karl Petersen oqaluttuarpoq ATV-t ajoquteqarnerat pillugu Avannaata Kommunianut saaffiginnereersimallutik. Kommunillu akissutigisimagaa, ajornartorsiummut aaqqiissutissaq kommunip suliareqqaartariaqassagaa.

Taamaakkallartillugulu meeqqat silami, eqqakkat anartarfiillu puuisa ulikkaarsimasut eqqaanni, aneertariaqassapput. Innuttaasullu naammagittartariaqassallutik.

Aappilattoq siorna nutaanik ATV-nik kommunimit aningaasaliiffigineqarluni pissarsisimagaluarpoq. ATV-mmi nutaanngitsut aserorluinnarsimammata taarserneqarsimapput. ATV-lli nutaat suli atorneqarsimanngikkaluartut, ikissinnaagaluarlutik aallariarsinnaanngillat.

- Kommunip kramerii ukiut siuliini ajornaquteqanngitsumik atortarnikuugaluarpagut, ukioq mannali atorumagaluaratsigit itigartinneqarpugut. Taamaammat qanoq iliorsinnaanngikkallarpugut, oqarpoq.

Upernajaarnerata, silallu kiannerunerata kingunerisaanik Aappilattumi ukiut siuliinut sanilliullugu aputaajaarneruvoq. Nunaqarfiit aqutsuisa siulittaasuat ilisimatitsivoq Aappilattoq majip aallartinnerani aputaarsimasoq, taamaattumillu eqqakkat snescooterinit assartorneqarsinnaajunnaarsimallutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER