Oqaatsut
Aappariit nunaqarfiup avataani imaani nassaarineqartut
Ilulissat avannaanni nunaqarfimmit Oqaatsunit ungasinngitsumi tyskit aappariit imaani nassaarineqarput. Ilimanarpoq umitsuaaqqamik ajunaarsimassasut
Sisamanngormat ualikkut Qaasuitsumi Politiit Ilulissat avannaanni nunaqarfimmut Oqaatsumukartitsipput, nakorsamik politiinillu sisamanik.
Politiit nalunaarfigineqarsimapput aappariit Oqaatsut avannaanni Anorituup eqqaani imaani ipeqqasut nassaarineqarsimasut.
Politiit paasitinneqarsimapput aappariit imaani umiatsiaaqamit inuttaqanngitsumit ungasinngitsumi nassaarineqarsimasut. Politiit nakorsallu takkutinnginnerini Oqaatsumi kommunefogedi tassunga takkussimavoq.
Suna toqqutigineraat qulaajarneqassaaq
Nakorsap takkukkami paasivaa marluullutik toqoreersimasut. Marluullutik Ilulissani napparsimmaviliaanneqarput. Tassani ullumikkut tallimanngornermi suna toqqutigineraat paasiniarlugu timaat misissorneqassapput.
Politiit pisimasoq maanna ajunaarnertut misissorpaat.
Ajunaartut taakkua marluk ukiuni arlalinni aasaanera Oqaatsuni najugaqartarsimapput tamassumalu eqqaa ilisimallugu. Sermitsiaq.AG-p paasisai malillugit ajunaartut tassaapput tyskit aappariit, neriniartarfimmik nuannarineqartumik ´H-8´-mik ingerlatsisut.
Politiit oqaatigaat ajunaartut ilaqutaat nalunaarfigineqarsimasut, maannalu Ilulissiartut.