Aappariit meerartallit ujarneqarnerat taamaatinneqarpoq
Pingasunngornermi novembarip 28-anni aappariit ernerannillu ataatsimik ukiulimmik politiit ujaasillutik aallartipput. Ullut tallimat iluatsinngitsumik ujaasinerup kingorna ujaasineq taamaatinneqarpoq.
Aappariit ernertik ilagalugu Aasiannit Niaqornaarsummut pingasunngormat aallartut ujaarineqarnerat taamaatinneqartoq, Aasianni politiit tusagassiuutinut nalunaarummi ilisimatitsipput.
Aappariit tikiffissaminnut tikinngimmata maqaasineqartutut nalunaarutigineqarput. Unnummi tassani politiit ujaasineq aallartippaat.
Ujaasinermi peqataasut amerlasimasut politiit allapput, tamanna Issittumi Sakkutooqarfiup umiarsuaanik Lauge Kochimit, qulimiguulinnit marlunnik aamma sumiiffimmi kajumissutsimik ujaaseqataasut ikiuunnerisigut ilaqutariit namminneq angallatiminnik ujaaseqataanerisigut pivoq.
Issittumi sakkutooqarfiup aamma Illersornissaqarfiup timmisartua C-130 Hercules atorpaa. Decembarip pingajuanni Issittumi Sakkutooqarfiup umiarsuaa alapernaarsuut Hvidbjørnen aamma qulimiguulik Sea Hawk ujaasinermut ilanngupput.
Kajumissutsimik peqataasunut qujasut
Aasiaat, Kangaatsiap aamma Niaqornaarsuup eqqaanni imaanilu ammasumi sumiiffiit annertuut ujaasiffigineqarput.
Ujaasineq iluatsinngillaq aamma ilaqutariit pigisaannik takussutissanik nassaartoqanngilaq.
Kalaallit Nunaanni Politiit Issittumi Sakkutooqarfimmut aamma inunnut ujaaseqataasunut qujassuteqarput.