Aappariit annaanneqartut - putsumi ussissumiittut
Amerikamiut takornariat marluk unnuaq annaanneqarlutik qulimiguulimmik angisuumik S-61-imik Kangerlussuarmut isumannaatsumukaanneqarput.
Amerikamiut aappariit Sisimiut aamma Kangerlussuup akornatigut pisullutik putsumi ussittumiileriasaarput, sumiiffimmi tassani nunap ikuallannerata tamanna pilersissimavaa.
- Nalunaaqutaq 22.00 missaani aappariinnit ajornartoornermik nalunaarummik pissarsivugut, qulimiguulik politiinik ilaasoqartoq sumiiffimmut aallartinneqarpoq. Aappariit nassaaraagut, taakkulu Kangerlussualiaanneqarput, pigaartut pisortaat Mads Lynge Christiansen Nuummi Politiineersoq taama ilisimatitsivoq.
Sumiissusertik paatsiveerukkaat
Aappariit nunap ikuallanneranik imatut ulorianartorsiorsimanngitsut taassuma oqaatigaa, kisianni paarnaqutit ikuallakkaangamik pujormik ussittorujussuarmik pilersitsisarput, tamannalu sumiissusersiornissamik ajornakusoortitsisorujussuusarpoq.
- Qujanartumik aappariit kalerrisaarummik, qaammataasamut aamma annaassiniaasarfimmut qitiusoqarfimmut atassutilimmik nassataqarput. Nunatsinni pinngortitami pisullutik angalasut taakkuninnga atortunik sumiissusermik nalunaarutiginnissinnaasunik nassartarnissaat kaammattorusuppakka, pigaartoq oqarpoq.
Aappariit nalunaaqutaq 01.30-p missaani Kangerlussuarmi isumannaatsumut pitinneqarput.