Skip to main content

Aapparisamit persuttarneqartarneq: Angerlarsimaffimmi persuttaasarnerup annikillisinniarneqarnerani ilisimasaqarnerunissaq pisariaqarpoq

Suliniutip Kattunnerup, 2014-imili ingerlanneqartup, kingunerisaanik angerlarsimaffimmi persuttaasarneq pillugu ilinniartitsissutissanik nutaanik saqqummersitsisoqarpoq.

Atuagaq “Angerlarsimaffimmi persuttaasarneq – tamatta akisussaaffipput” pingasunngornermi martsip tallimaani saqqummersinneqarpoq, isumaginninnermilu siunnersortit ilinniartinneqarnerani atugassaalluni. Sullissisut angerlarsimaffimmi persuttaasarnermut tunngasunik ilisimasaqarnerulernissaannut atugassiaavoq, taamatullu ilaqutariit persuttarneqarnermik misigisaqarsimasut ikiornissaannut sakkussaalluni.

- Paasivarput sammisami ilisimasaqarnerunissaq persuttaariaatsillu assigiinngitsut pillugit ilisimasaqarnerunissaq pisariaqartinneqartoq. Sullissisut assigiimmik oqarput, ilinniartitsissutinik nutaanik ilisimasanillu pisariaqartitsillutik, Kirsten Ørgaard, Kattunnermut peqataasumi Mælkebøttenimi pisortaq oqarpoq.

- Persuttaariaatsit assigiinngitsut tallimat pillugit sullissisut ilisimasakippallaarput. Taamaammat atuakkamik ilinniartitsissutissamik persuttaariaatsit pillugit imaqartumik persuttaasarnerullu aallartinneraniit ineriartortarneranik tunngasunik imaqartumik peqarnissaq pisariaqarpoq. Minnerunngitsumillu sullissisut qanoq ikiuunnissaannik imaqarluni, Kirsten Ørgaard Sermitsiaq.AG-mut ilisimatitsivoq.

Eqqartornissaa nangaassutigineqartartoq

Suliniut Kattunneq tunngavigalugu sullissisut arnanik persuttarneqarsimasunik sullitaqartut apeqqutinik akisassanik nassiussuuffigineqarsimapput.

56 procentii akipput namminneq suleqatitilluunniit persuttarneqarsimasut ikiornissaannut, angerlarsimaffimmi persuttaasarneq pillugu ilisimasakippallaarlutik, 79 procentiilu isumaqarlutik ilaqutariit persuttarneqarnermik misigisaqartut ikiorniarlugit suliaqartunik allanik qanoq suleqateqarsinnaaneq pillugu ilisimasanik pisariaqartitsillutik. Taakku saniatigut 59 procentii isumaqarput suliaqartut allat suleqatigisinnaasatik angerlarsimaffimmi persuttaaneq pillugu ilisimasakippallaartut.

Sullissisut ilisimasakinnerat ikiorneqarumallutik saaffiginnittoqarnerani unammillernartoqartarpoq. Sammisamik eqqartuinissamut nangaassuteqarneq pissutigalugu persuttaanermik misigisaqarsimasut naammattumik ikiorneqanngitsoorsinnaasarput – pingaartumik meeqqat oqaloqatigineqassatillugit. Taamaammat isumaginninnermi siunnersortit, ataatap anaana annersarsimappagu, meeqqanik oqaloqateqarnissamut sakkussanik tunineqarput.

- Meeqqat maannangaaq ikiorneqarsinnaassapput, taamaasillutik nalaatatik nassatarinagit peroriartorsinnaassallutik. Ilaannimi imaattarpoq inersimasunngoraangamik aatsaat ikiorneqarsinnaalersartut, Kirsten Ørgaard Sermitsiaq.AG-mut oqarpoq.

Isumaginninnermut naalakkersuisup, Martha Abelsenip (S), angerlarsimaffimmi persuttaasarneq pillugu ilinniutigineqartussamik atuagaqalernera nuannaarutigaa.

- Kattunneq aallarnisaaneruvoq ineriartornermut pitsaasumut. Isumaginninnermut siunnersortit maanna ilinniartinneqassapput, taakkulu ikiuisinnaanermut sakkussat siunissami siaruassavaat, Martha Abelsen Sermitsiaq.AG-mut oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER