mianersorlusi

Aamma! – Nuummi Ukkisissamut ikiuiartortoqaqqippoq

Arnat pingasut sapaammi unnukkut Nuup qaqqaanit Ukkusissamiit ikiortissarsiorput

Ukkusissamit isikkivigissorsuarmit ammut aqqutaa navianarsinnaavoq. Aasaq manna Nuummi qatserisartut Ukkusissamut ikiuukkiartortariaqarsimapput

Aasaq manna sisamassat Nuummi qatserisartut qaqqamit Ukkusissamit ammukartunut ikiuuttariaqarsimapput. Sapaammi unnukkut arnat pingasut sivingavallaamut pisut ikiorneqartariaqarsimapput.

Tamannali navialinertaqanngitsumik qaangerneqarpoq. Qatserisartut Ukkusissamut pisummi majuarput arnallu aqqutissamut isumannaannerusumut innersuussinnaasimallugit.

- Ajoraluartumik inuit ilaasa Ukkusissamut aqqut nalunaaqutsersugaasoq uniorlugu ingerlaartarput imaluunnit allakkut nammineq aqqutissarsiortarlutik. Inuit kaammattorusuppagut aqqut nalunaaqutsersugaasoq atorlugu tappikani angalasaqqullugit imaluunniit sungiussisimalluartumik ilisimasortaqarlutik angalasaqqullugit, Nuummi qatserisartut pisortaat Knud Petersen Sermitsiaq.AG-mut oqarpoq.

Arnat pingasut ikiorniarnerannut nalunaaquttap akunneri sisamat sapaammi unnukkut qatserisartut atorpaat.

Powered by Labrador CMS