Aammaaqqilluni: Aalisarfiit pisassanik killilersuiffiuinngitsut pillugit tusarniaasoqarpoq

Aalisarnermut, Piniarnermut Nunalerinermullu Naalakkersuisoqarfiup nalunaarut Kalaallit Nunaata avannaani aalisarfiit pisassanik killilersuiffiuinngitsut atorunnaarsinnissaanik imaqartoq, maanna minnerpaamik pingajussaanik tusarniaassutigivaad.

2019-imi okotberip qaammataanni nalunaarut tassunga assigusoq tusarniaassutigineqarpoq, aamma 2017-mi februaarip qaammataani tusarniaassutigineqarsimavoq.

Maannamulli nalunaarutit arlaannaalluunniit Naalakkersuisunit akuerineqarsimanngillat, taamalu aalisarfiit pisassanik killilersuiffiunngitsut atorunnaarsinneqarsimanatik.

Nutaamik siunnersuisoqarsimanera tunngaviusoq

Siorna oktoberip qaammataani tusarniaanermut atatillugu Aalisarnermut Naalakkersuisup Jens Immanuelsenip (S) erseqqissaatigaa, aalisarfiit pisassanik killilersuiffiunngitsut atorunnaarsinneqassasut. Taamanikkut tamanna pinngilaq, maannali Naalakkersuisut misileeqqinnialerpasipput.

Aalisarnermut, Piniarnermut Nunalerinermullu Naalakkersuisoqarfiup Sermitsiaq.AG-mut ilisimatitsissutigaa, Aasianniit Nunap Isuata tungaanut qaleralinniarfinnut tunngatillugu biologit siunnersuutaat akuersaarnartut tunngavigalugit nalunaarut nutaaq suliarineqarsimasoq.

Ukioq manna juunip qaammataani siunnersuisoqartoq.

MSC-mik allagartalertinnissaq anguniagaasoq

Nalunaarummi nutaamit taamaammat siunertarineqarpoq, Aasianniit Nunap Isuata tungaanut aqutsiveqarfinnik atuutsitsilernissaq, peqatigitillugulu Kalaallit Nunaata avannaani aalisarfiit pisassannik killilersuiffiunngitsut atorunnarsinneqarnissaat.

Piffissarmi ungasinnerusoq eqqarsaatigalugu anguniagaavoq, sineriammi qanittumi qaleralinniartarnerup MSC-mi allagartalerneqarnissaa, naalakkersuisoqarfillu naapertorlugu aalisarfiit pisassanik killilersuiffiunngitsut allagartalertinnissamut akorngutaapput.

Nalunaarummik tusarniaaneq aggustusip naalernerata tungaanut ingerlanneqassaaq, tamatumalu kingorna Naalakkersuisut, nalunaarut atuutsinneqalissanersoq aamma aalisarfiit pisassanik killilersuiffiunngitsut atorunnaarsinneqassanersut isummerfigissavaat.