Aallartitsisunut aaqqissuussineq ´Startup´ Sisimiuni ingerlanneqarpoq, tassani peqataasut 14-it aallartitserusuttut niuernermut pilersaarusiornissaminnut atortussanik isumassarsianillu tunineqarlutik, tamatumunnga akunnerit 54-it atortussaavaat.

Greenland Businesxs-ip aaqqissuussaa ´Startup´ niunermut pilersaarutinik tallimanik kinguneqarpoq, aaqqissuussinermilu ajugaasuuvoq Maki Seaweed, Ulrik Lyberthip suliaa, tamatumanilu unammilluarpai ilaqutariit saattussanik suliniutillit.

Tunisassiamik nunatta pigilluagaanik ajugaavoq

Ulrik Lyberth qeqqussanik panerserlugit tunisassiornermut pilersaarumminut 5.000 koruuninik akissarsivoq. Tunisassiassaq taanna Nunatta pigilluagaraa, tamakkuninngalu, siusinnerusukkut misilinneqarsimanngitsumik, tunisassiorsinnaaneq annertuumik misissuiffigineqarsimavoq, Greenland Business allappoq.

– Akissarsiakka qeqqussanik aallerluni angalanernut qulinut naapertuupput tamatumunngalu atussavakka, Ulrik Lyberth nuannaartoq tupaallassimasorlu oqarpoq.

Ulrik Lyberth aallartisamisaareerpoq tunisassianilu siulliit Danmarkimut tunereersimallugit. Piffissallu ingerlanerani qeqqussat sequtserlugit qajuusaasanngorlugit tunisassiarisalerniarpai.

Dommerit, tassaasut inuussutissarsiortut eqeersimaartut pingasut, pingaartippaat tunisassiaq nutaaq avammut tuniniarneqarsinnaammat, taamaasillunilu Kalaallit Nunaata avammut tuniniaanermigut isertitaanut iluaqutaasinnaalluni.