Aallartitsisarfiliorniarneq arlaannaannilluunniit taperserneqanngitsoq
Dansk Folkepartip qimaasimasunut Danmarkimi najugaqarallartunut aallartitsisarfissamik Kalaallit Nunaanni inissiinissamut siunnersuutaa, ullumi Folketingimi suliarineqarpoq. Siunnersuut partiinit arlaannaannilluunniit imaluunniit Siumut sinnerlugu Folketingimi ilaasortamit Aki-Mathilda Høegh-Damimit taperserneqanngilaq.
Dansk Folkepartiimi ilaasortap Pia Kjærsgaardip novembarip qaammataani siunnersuutigimmagu, nunasinissamik qinnuteqarsimallutik itigartinneqarsimasut aallartinneqarnissamik tungaannut inissisimaffigisatagassaannik Danmarkimi pilersitsisoqarani Kalaallit Nunaanni pilersitsisoqassasoq, Danmarkimi Nunatsinnilu tusagassiorfinnit allaaserineqarpoq.
Siunnersuut Namminersorlutik Oqartussat namminneq piumassutsiminnik akiliuteqartitsilluni isumaqatigiissuteqarfigineqarnissaannik tunngavilik Folketingimi martsip tallimaani saqqummiunneqartoq maajip arfernani siullermeerlugu suliarineqarpoq.
Siumut sinnerlugu Folketingimi ilaasortap Aki-Mathilda Høegh-Damip siunnersuut tamannalu sioqqullugu suliarineqarsimasoq akuersaanngilluinnarpai.
- Danmarkimit Kalaallit Nunaat qimaasunik nunasinissamillu qinnuteqarsimallutik itigartinneqarsimasunik tigusinissamut tatineqanngilluinnassaaq, pingaartumik Kalaallit Nunaat tamatumunnga atatillugu aalajangiinissamut akisussaaffeerutsinneqarsimatillugu, Aki-Mathilda Høegh-Dam sisamanngormat Folketingimi oqaluttarfikkut oqarpoq.
Akulerutsitsinissamut suliniuteqartoqanngitsoq
Taassuma oqaatigaa, Siumut 2019-imi Folketingimut qineqqusaartoqarnerani, ilaatigut nunanit allamiut akulerutsitsiniartarnerlu danskinit akisussaaffigineqartut Kalaallit Nunaanni pissutsinut kalaallillu naleqartitaannut naleqqussarneqarnissaannik qineqqusaaruteqarsimasoq.
- Maannakkorpiaq Kalaallit Nunaanni annertuumik avissaartuuttoqarpoq, ilaatigut aamma Danmarkimit suliartortitat akulerutsinneqarneq ajornerat pissutigalugu, uagummi tassunga atatillugu nammineq inatsiseqaratalu malittarisassaqanngilagut, Aki- Matilda Høegh-Dam oqallittoqarnerani oqarpoq.
Aki-Mathilda Høegh-Damip Sermitsiaq.AG-mut itisiliilluni oqaatigaa, inuppassuit suliartorlutik nunamut tikittaraluartut Kalaallit Nunaanni akulerutsitsinissamut suliniuteqartoqannginnera pissutigalugu avissaartuuttoqartartoq.
- Tamatuma malitsigisaanik inuiaqatigiinni immikkoortitertoqalertarpoq, assersuutigalugu danskit danskiinnarnik peqateqartarput aamma filippinerit filippineriinnarnik peqateqartarput, tassa Kalaallit Nunaanni inuiaqatigiinnut akulerutissanatik.
Nunami namminermi politikkikkut qinngasaarinerit
Siumumilu politikkeri naapertorlugu, tamatuma malitsigisaanik suliffeqarfinni politikkikkullu kulturikkut paatsoornerit pisarput. Ilaatigut tamanna Aki-Mathilda Høegh-Damip Siumullu allanngortikkusuppaat, tassa Kalaallit Nunaat nunanut allanut tunngasutigut sunniuteqarnerulersinneqassappat.
Aki-Matilda Høegh-Damip aamma siunnersuutip suliarineqarnerani oqaatigaa, DF-imit aalajangiiffigisassatut siunnersuut Danmarkimi nunami namminermi politikkikkut qinngasaarutaannaarpasittoq.
Siumumi siulittaasup Siumut Erik Jensenip aamma Folketingimi ilaasortapAaja Chemnits Larsen (IA) siunnersuut siusinnerusukkut isornartorsiornikuuaat.
DF-ip aalajangiiffisassatut siunnersuutaa inersuarmi partiinit allanit taperserneqanngilaq, tassa illuatungiliuttuni Socialdemokraatinilluunniit taperserneqanngilaq.