Aallartitat: USA-p Kalaallit Nunaannut tapiissutissani ullumi tamanut saqqummiutissavai
USA aningaasaliissutissanut aamma Kalaallit Nunaanni aallartitaqarnerulernissamut tunngatillugit pilersaarutiminik ullumi sisamanngornermi saqqummiussissalluni naatsorsuuteqarpoq.
USA-p Kalaallit Nunaannut minnerpaamik 12 millioner dollarsinik aningaasaliissuteqarniarnini sisamanngornermi nalunnaaruteqarnissaa naatsorsuutigineqarpoq. Aningaasat taakku 82 millioner koruunitut naleqarput.
Nutaarsiassaqartitsivik AP allappoq.
Nutaarsiassaqartitsivik sisamanngornermi nalunaaruteqartoqarnissaanik naatsorsuuteqarneq pillugu amerikamiut europamiullu aallartitaasa nalunaarutaannik issuaasimavoq.
Naatsorsuutigineqarpoq, ameriakmiut præsidentiata Donald Trumpip aqutsisoqarfianit nalunaarutigineqassasoq, Kalaallit Nunaanni aallartitat aamma amerlineqarnissaat.
Tamanna pissaaq, nunani tamalaani ineriartortitsinermut allaffissap nutaap ammarneqarneratigut, allaffik taanna USA-p Nuummi aallartitaqarfissaata nutaap iluanissaaq.
Aamma naatsorsuutigineqarpoq Kalaallit Nunaanni Naalakkersuisut suleqatigiinnissaq pillugu sisamanngornermi nalunaaruteqassasut, AP allappoq.
Sapaatip akunnerata matuma aallartilaarnerani Amerikamiut Danmarkimi aallartitaata Carla Sandsip nalunaarutigaa, USA qanittukkut Kalaallit Nunaannut aningaasaliissuteqarniartoq.
AP naapertorlugut taassuma ilisimatitsissutigisimavaa, USA Kalaallit Nunaannut USA-p "Issittumi suleqatigerusunnerusaanut", "aningaasatigut annertuunik ikiorsiissuteqarniartoq".
Tudsagassiorfiinnit arlalinnit pingasunngormat nalunaarutigineqarpoq, aningaasaliissutiginiakkat 82 millioner koruuninik annertussuseqartut.