Aallartitaq qujamasuttoq
USA-p Kalaallit Nunaanni konsulertaavata Sung Choip nuannaarutigaa angajoqqaani suliumatuut 1975-imi USA-mut nunasiartorsimammata. Sikkilerneq nuannareqaa sulilu angerlanut postkortinik allattarpoq
- Taarsiullugu uagutsinni naapissinnaavugut Issittumi Sakkutooqarfimmiunngitsoq?
Telefonikkut Sung Choi utoqqatserpoq uannit apersorneqarnissani allamut nuuttariaqaramiuk. Tassunga tunngaviliuppaa sakkutooqarfimmi isumannaatsuunissaq pissutigalugu arlalinnik piumasaqaateqartoq nammineq ilisimasimanngisaminik.
Aviisi AG taama allappoq.
Tamanna AG-p aallartitaasa, assiliisup tusagassiortullu, ajorinngikkaluarpaat. Konsulateqarfissaq, Issittup Sakkutooqarfianiikkallartussaq, takulaarusukkaluarlugu aamma soqutiginarpoq USA-p konsuliata Nuummi najugaa qanoq ittuunersoq takussallugu.
Taamaattumik pingasunngormat ualikkut Qaqortumi tummerarpassuartigut illungaatsiarsuarmut qernertumut qummukarpugut matumut silarlermut pinissatta tungaanut, silataaniipporlu allungiartorfik allannilik »HOME«.
- Hi, and welcome (haluukkut, tikilluaritsi, aaqqiss.), Sung Choi oqarpoq, tamatumalu kingorna corona-tut immitsinnut ilassivugut: Tuitsinnik.
Assiliisoq assiliisaqattaarpoq, illup iluani silataanilu aneersuartarfimmi, Akianut isikkivigilluinnartumi. Igaffeqarfik qallunaat perutiliatoqaannik pequteqarpoq, soorlu PH-p qulliliaa Koglen kanngussak Arne Jacobsenillu issiaviliaanik Syv-erinik amermik qaqqortarissarissatut qalipaatilinnik qalilinnik, illumik attartortitsisup toqqarsimasaanik.
Akerlianik assilissat iikkami nivingasut Sung Choip nammineerluni toqqarsimavai: KNI-p plakatia Maaji Peqqissuutiguk / Gør Maj Sund qalipagaarannguarlu nunatsinneersoq, Schwalbemit atsiorneqarsimasoq, taassumalu assiliartaraa pujortuleeraq Uummannap qaqqaa ilisarnartoq tunuliaqutsiullugu.
- Taanna nettimi nassaaraara, Den Blå Avisimi, Sung Choi oqaluttuarpoq, ilanngullugu oqaatigalugu aamma Emanuel A. Petersenip qalipagaaraanik E-bay-mi nassaarsimalluni.
Instagram ajornannginneruvoq
USA-p Kalaallit Nunaanni aallartitaata 47-nik ukiullip Danmarkimit tikinnermi kingorna ulluni 14-ini immikkoortitaasimanini naammasseqqammerpaa.
Sapaatit akunnerini taakkunani marlunni angerlarsimaffimmini, illorsuarmi kvadratmeterinik untritilinnik arlalinnik angissusilimmi, ukiumi tulliuttumi najugaqarfigisassamini, sulisarsimavoq.
Aammattaarli Nuup timaani kisimiilluni pisuttuartarsimavoq, tamannalu instragrammimi profilimini @uskalaallitnunaanni saqqummiuttarsimavaa. Profilini atsernialeramiuk ikiorteqartariaqarsimavoq, pissutigalugu kalaallisut oqalussinnaanngivikkami. Aammami qallunaatut. Tamanna peqatigalugu ilisimalluarpaa Kalaallit Nunaanni amerlanerpaat facebook atorusunnerugaat.
- Sooq instagram?
- Pissutigalugu uannut ajornannginnerummat. Inuit nettimi attaveqarfiini allani profileqanngilanga, Sung Choi oqarpoq, imminullu oqaatigaaq »old school«-iulluni, tassa qanganisarsiortuulluni.
Aviisimi AG-mi atuarnerusinnaavutit. Aviisi uani pissarsiariuk:
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...