Aallartitamut tunngasumik siunnersuut pillugu sakkortuumik oqallinneq: Aki-Matilda ammip qalipaataanik immikkoortitsinnginnerarpoq

Kalaallit Nunaata Kunngeqarfiup Issittoq pillugu aallartitamik toqqaanermi sunniuteqarnissaa Naalakkersuisut ilungersuuteqarnikuupput, taanna maanna toqqarneqaqqammerpoq.

Nunanut allanut tunngasunut ministerip Lars Løkke Rasmussenip (M) siunnersuut itigartikkaa, tamannalu Naalakkersuisut nukillalaarutigigaat, naalakkersuisoq Vivian Motzfeldt (S) aviisimut AG-mut oqarpoq.

Aallartitatut atorfik Naalakkersuisut aamma danskit naalakkersuisa akornanni isumaqatigiinngissutigineqarneranni, aamma Folketingimut ilaasortat akornanni annertuumik oqallisigineqarpoq.

Qaammammi matumani Aki-Matilda Høegh-Dam Issittoq pillugu oqallinnermi aamma oqaatigaa, Issittoq pillugu aallartitaq Kalaallit Nunaanneertariaqartoq.

- Ammip qalipaataanik immikkoortitsinermik assigiinngisitsinermullu akerliusoq

SF-ip nunanut allanut tunngasunut oqaaseqartartuata Karsten Høngep siunnersuut ammip qalipaataanik immikkoortitsinertut oqaatigaa. Tamanna tusagassiorfimmut Altinget.dk-mut oqaatigaa.

- Atorfinitsitinermut tunngatillugu ammip qalipaataa apeqqutaatinneqartassanngilaq. Ammimik immikkoortitsisarneq aamma immikkoortitsisarneq uagut akerleraarput, Karsten Hønge tusagassiorfik naapertorlugu oqarpoq. Partiinit danskit naalakkersuisuiniittunit oqaaseqartartut arlallit Socialdemokratimeersut aamma Moderatimeersut siunnersuummut qularnartoqartitsipput.

Aki-Matilda Høegh-Damip ernumassuteqarnerit pingaartumillu ammip qalipaataanik immikkoortitsisutut oqaatigineqarnini akerlilerpai. Taannalu suliffeqarfinni arnat siulersuisut amerlanerunissaat qulakkeerniarlugu qanoq amerlassuseqarnissaannik atulersitsisarnermut taanna sanilliussaqarpoq.

Tassunga atorfimmut Kalaallit Nunaannit sinniisoqarnissamik qulakkeerinninnissamut tunngasoq taanna isumaqarpoq, aammalu inuup Kalaallit Nunaannut Issittumullu ilisimasaqarluartuusariaqartoq. Ippassaq marlunngornermi apeqqut taanna Folketingip oqaluttuarfiani qaqeqqippaa:

- Eqqissillusi, sumi inunngorsimaneq malillugu immikkoortitsinerunngilaq

- Siumumit kalaallimik imaluunniit inummik issittoq pillugu aallartitamik nutaamik Afrikamut ujartuinermut taarsiullugu toqqaasarnissamik siunnersuuteqarnitsinni amerlasuut tupaallaateqarpasipput, Aki-Matilda Høegh-Dam, Issittoq pillugu aallartitanngortussap, Tobias Elling Rehfeldip, ullumikkut Afrika Kujallermi aallartitaaneranut innersuussilluni taama oqarpoq.

Aki-Matilda Høegh-Damip danskit assigiinngisitsinermut tunngatillugu ernumassuteqarnerat sakkortuumik akerlilerpaa:

- Allaanngilaq Danmarkip tungaanit Kalaallit Nunaata pissusilersorfigineqarsimaneratut pissusilersorfigineqarnissaq ernumassutigineqartoq. Taamaassimassagaluarpat paasisinnaassagaluarpara. Kisianni eqqissigitsi, uani sumi inunngorsimaneq malillugu aalajangersaanerit issuarneqarnianngillat, tassani danskit Kalaallit Nunaanni aaqqissuussaanikkut kalaallinit akissarsiaqarnerutinneqartarput.

Olsen Dyhr ilisimanninnginnerarpoq

- Naagga, piginnaasat malillugit atorfinitsitsinissaq pineqarpoq, tassani issittumi inuiaqatigiinnut, kulturimut, oqaatsinut nunataanut, innuttaasut aaqqissugaanerannut ilisimasaqarnissamut tunngavoq. Atorfimmut pingaaruteqartumut piumasaqaatit ajornanngitsut naapertuuttullu, politikeri oqarpoq.

Ministeriuneq Mette Frederiksen (Soc.) Aki-Matilda Høegh-Damimut oqaaseqaateqarpoq, tassanilu ministeriunerup siornatigut Danmarkimi naalakkersuisuusimasut maannalu naalakkersuisut Naalakkersuisunut pitsaasumik suleqateqartut oqaaatigaa.

SF-imi partiimi siulittaasup Pia Olsen Dyhrip oqallinnermi parteeqatimi Karsten Høngep Altingetimut oqaaseqaataanut nangaassuteqarpoq:

- Taamatut oqaaseqartoqarnera ilisimanngilaq. SF nalinginnaasumik allanik ammip qalipaataanik immikkoortitsisutut oqaatiginninnissani mianerisarpaa, kisianni soorunami paasiniaaffigissavara. Tupigusuutigeqaara, Pia Olsen Dyhr oqarpoq.